ދައުލަތުން މުދަލާއި ހިދުމަތް ހޯދުމުގައި ކޮރަޕްޝަން ހިންގާ ކަމުގެ ތުހުމަތުތަކާއި އެފަދަ މައްސަލަތައް ފެންމަތިވުން ހުއްޓުވުމަށް ދައުލަތުގެ ޕްރޮކިއުމަންޓާއި ގުޅޭ މިނިވަން އިދާރާއެއް އުފައްދައި އެ އިދާރާގެ ދަށުން ދައުލަތުގެ ޕްރޮކިއުމަންޓާ ގުޅޭ ކަންކަން ކުރިއަށްގެންދެވޭނެ ގޮތަށް ނިޒާމީ އިންތިޒާމަށް ބަދަލު ގެނައުމަށް އިދިކޮޅު މައި ޕާޓީ، މޯލްޑިވިއަން ޑިމޮކްރަޓިކް ޕާޓީ (އެމްޑީޕީ)ގެ ޗެއާޕާސަން ފައްޔާޒު އިސްމާއީލް ހުށަހަޅުއްވައިފި އެވެ.
ދައުލަތުގެ އޮފީސްތަކުގެ ޕްރޮކިއުމަންޓާ ގުޅޭ ގިނަ މައްސަލަތަކެއް ފެހި ގާނޫނުއަސާސީއަށް އަމަލުކުރަން ފެށިފަހުން ތިލަވެފައިވެ އެވެ. އޭގެ ތެރެއިން ބައެއް މައްސަލަތަކުގައި ދައުލަތަށް ބޮޑެތި އަދަދުން ފައިސާ ގެއްލި ފޫނުބެއްދޭނެ ވަރުގެ ގެއްލުންތަކާ ކުރިމަތިލާން ޖެހިފައި ވެސް އެބަހުއްޓެވެ.
ދައުލަތުގެ ނިޒާމީ އިންތިޒާމަށް ގެނެވިދާނެ ބައެއް ބަދަލުތަކަށް އަލިއަޅުވާލައި "އަދަދު" ނޫހުގައި ލިޔުއްވި ކޮލަމެއްގައި މިދިޔަ ސަރުކާރުގެ އިކޮނޮމިކް މިނިސްޓަރުކަން ވެސް ކުރެއްވި ފައްޔާޒު ވަނީ ސަރުކާރު ހިންގާ މީހުން ޕްރޮކިއުމަންޓު ނިޒާމުން ބޭރު ކުރުމަށް ހިޔާލު ހުށަހަޅުއްވާފަ އެވެ.
"ސަރުކާރު ހިންގާން ހިދުމަތްކުރާން ތިބޭ މީހުން ދައުލަތުގެ ޕްރޮކިއުމަންޓް ނިޒާމުން އެއްކޮށް ބޭރުކުރުމަކީ، ތުހުމަތުތަކުން ބަރީއަވެތިބެ، އެ މީހުންގެ މަގާމުގެ ހަގީގީ މަސްއޫލިއްޔަތު އަދާކުރުމަށް ބާރު އެޅޭނޭ ކަމެއް،" އޭނާ ލިޔުއްވި އެވެ.
މިކަން ކުރުމުގެ ގޮތުން ޕްރޮކިއުމަންޓަށް ހާއްސަ މިނިވަން މުސްތަގިއްލު އިދާރާއެއް އުފެއްދުމަށް ވެސް އޭނާ ހުށަހެޅުއްވި އެވެ. އެ އޮފީސް ހިންގާނީ ސަރުކާރުގެ ނިޒާމާއި، ސިޔާސީ ގުޅުންތަކުން އެކަހެރިވެފައިވާ ބައެއް ގޮތަށް ކަނޑައެޅިދާނެ ކަމަށް ފައްޔާޒު ލިޔުއްވި އެވެ.
"އެ އިދާރާ ހިންގާނީ، ރައްޔިތުންގެ މަޖިލީހުން އެ މަގާމުތަކަށް ކުރިމަތިލުމަށް ހުޅުވާލުމުން އެކަމަށް ކުރިމަތިލައި، ރައްޔިތުންގެ ވޯޓުން ހޮވާ ބައެއް. އެއީ ތިން މެންބަރުންތޯ ފަސް މެންބަރުންތޯ ނުވަތަ އެގާރަ މެންބަރުންތޯ އަޅުގަނޑުމެން ބަހުސްކޮށް ނިންމާނީ،" އެ ބަހުސަށް ދައުވަތު ދެއްވައި ފައްޔާޒު ލިޔުއްވި އެވެ.\
މިގޮތަށް ޕްރޮކިއުމަންޓުގެ ކަންކަން ބަދަލުކުރެވުމުން ސަރުކާރުތަކަށް އަމާޒުވާ ތުހުމަތުތަކުން ބަރީއަވެ، އެފަދަ ތުހުމަތެއް ކުރެވިއްޖެނަމަ އެ މައްސަލަތައް ބެލުމަށްވެސް ސަރުކާރުގެ ފަސްޖެހުމެއް ނޯންނާނެ ކަމަށް ފައްޔާޒު ލިޔުއްވި އެވެ.
ދުނިޔޭގެ ބައެއް ގައުމުތަކުގައި ދައުލަތުގެ ޕްރޮކިއުމަންޓުގެ ކަންކަން ބެލެހެއްޓުމަށް މިނިވަން އިދާރާތައް އުފައްދައި ހިންގަމުންދެ އެވެ. މިފަދަ އިދާރާތަކާ ގުޅޭ ގާނޫނީ އޮނިގަނޑުތައް އެކުލަވާލާފައި ވަނީ ވާދަވެރިކަމާއި، ޖަވާބުދާރީވުމާއި، ދެފުށް ފެންނާނެ ގޮތަށް ކޮންޓްރެކްޓުތައް އެވޯޑު ކުރެވޭނެ ގޮތަށެވެ.
