ބާސެލޯނާ (ޖެނުއަރީ 30) - ޗެމްޕިއަންސް ލީގުގައި ރޭ ޕީއެސްވީ އައިންދޯވަން އަތުން 3-2 އިން ބަލިވެ، ލިވަޕޫލުން މުބާރާތުގައި ދަމަހައްޓަމުން އައި ސައްތަ އިން ސައްތަ ރެކޯޑް ނިމުމަކަށް އައި ނަމަވެސް ދެ ވަނައިގައި އޮތް ބާސެލޯނާ އިން އެޓަލަންޓާއާ 2-2 އިން އެއްވަރުވެ، އެއް ވަނަ އަށް އަރަން ލިބުނު ފުރުސަތު ނަގާލައިފި އެވެ.
ލިވަޕޫލުން ފުރަތަމަ އެގާރައިގައި ކުޅޭ ގިނަ ކުޅުންތެރިންތަކެއް ނުލައި، ކުޅުނު ރޭގެ މެޗުގައި ލީޑުނެގީ ކުރިން ޕީއެސްވީ އަށް ކުޅުނު ގަކްޕޯ ޖެހި ޕެނަލްޓީންނެެވެ. ޕީއެސްވީން އެއްވަރުކުރީ ޔޯހަން ބަކަޔޯކޯ ޖެހި ގޯލުންނެވެ.
ހާވީ އެލިއަޓް އަލުން ލިވަޕޫލަށް ލީޑުނަގައިދިންއިރު، ޕީއެސްވީން އެއްވަރުކުރީ، އިސްމާއިލް ސައިބާރީ ޖެހި ގޯލުންނެވެ. އަދި ފުރަތަމަ ހާފުގެ އިތުރު ވަގުތު ރިކާޑޯ ޕެޕީ ގޯލު ޖަހައި ޕީއެސްވީ މޮޅުކޮށްދީފަ އެވެ.
ބާސެލޯނާ އިން ރޭ ކުޅުނު މެޗުގައި އެ ޓީމުގެ ލަނޑުތައް ޖެހީ، ލަމީން ޔަމާލް އާއި ރޮނާލްޑް އަރައުހޯ އެވެ. އެޓަަލަންޓާގެ ގޯލުތައް ޖެހީ މާރިއޯ ޕަސާލިޗް އާއި އެޑަސަން އެވެ.
ޗެމްޕިއަންސް ލީގުގެ ލީގު ބުރު ނިމުނުއިރު، ލިވަޕޫލް އެއް ވަަނަ ހޯދީ 21 ޕޮއިންޓާ އެކު އެވެ. ލީގުގެ ދެ ވަނަ ހޯދި ބާސެލޯނާ އާއި ތިން ވަނަ އާސެނަލް އަދި ހަތަރު ވަނަ އިންޓަ މިލާނަށް ވެސް ވަނީ 19 ޕޮއިންޓް ލިބިފަ އެވެ.
އާސެނަލުން ވަނީ ރޭ 2-1 އިން ޖިރޯނާ އަތުން މޮޅުވެފަ އެވެ. އަދި އިންޓަ މިލާނުން ވަނީ ރޭ މޮނާކޯ އަތުން 3-0 އިން މޮޅުވެފަ އެވެ. ބަޔާން މިއުނިކް ކުޅުނު މެޗުން ސްލޮވަން ބްރަޓިސްލާވާ އަތުން ވަނީ 3-1 އިން މޮޅުވެފަ އެވެ. ބްރެސްޓް އަތުން ރެއާލް މެޑްރިޑް ވަނީ 3-0 އިން މޮޅުވެފަ އެވެ.
