ޕިއްޒާ ބޯނާއިން އިއްޔެ ހުޅުމާލޭގައި ބޭއްވި "އަލްޓިމޭޓް ޕިއްޒާ ޗެލެންޖް 2025" މުހައްމަދު އަބާން ހުސެއިން ކާމިޔާބުކޮށްފި އެވެ.
ހުޅުމާލެ ސެންޓްރަލް ޕާކުގައި ބޭއްވި ފުޑް އެންޑް ބެވަރޭޖު ޝޯގެ ތެރެއިން އިއްޔެ ހަވީރު ބޭއްވި މި ޗެލެންޖުގައި 30 މީހުން ބައިވެރިވި އެވެ. އެ މީހުންގެ މަސައްކަތަށް ޕިއްޒާ ބޯނާގެ 18 އިންޗީގެ ޕިއްޒާއެއް 18 މިނެޓު ހަމަވުމުގެ ކުރިން ކައި ހުސްކުރުމެވެ. އެއްވަނަ ލިބެނީ އެންމެ އަވަހަށް ކައި ހުސްކުރި މީހަކަށެވެ.
މުބާރާތުގެ އެއްވަނަ އަބާން ހޯދީ 12.44 މިނެޓުން މުޅި ޕިއްޒާ ހުސް ކޮށްގެންނެވެ. ދެވަނަ 13.18 މިނެޓުން ޕިއްޒާ ކައި ހުސް ކޮށްގެން ނިރުޖާލް ކުމާރު ހޯދިއިރު، ތިންވަނަ ހަސަން ޝިފާއު ހޯދީ 14.51 މިނެޓުން ޕިއްޒާ ކައި ހުސް ކޮށްގެންނެވެ.
އެއްވަނައަށް 5،000ރ. ގެ ފައިސާގެ އިނާމެއް ދިންއިރު، ދެވަނައަށް 2،500ރ. އަދި ތިންވަނައަށް ދިނީ 1،000ރ. އެވެ.
ޕިއްޒާ ބޯނާއިން ބޭއްވި ޕިއްޒާ ކެއުމުގެ މުބާރާތުގެ ތެރެއިން: މުބާރާތުގެ އެއްވަނަ ހޯދި އަބާން ވަނީ 18 އިންޗީގެ ޕިއްޒާއެއް 12 މިނެޓުން ކައި ހުސްކޮށްފައި -- ފޮޓޯ: މިރާޝް ނާޝިމް / އަދަދު
މީގެއިތުރުން މުބާރާތުގައި ބައިވެރިވި 30 މީހުންނަށް ޕިއްޒާ ބޯނާއިން ވަނީ ހާއްސަ ވައުޗަރެއް ދީފަ އެވެ.
މުބާރާތުގެ އެއްވަނަ ހޯދި އަބާން ބުނީ އޭނާ އެ ޗެލެންޖުގައި ބައިވެރިވީ ރަށްޓެހިންނާ އެކު މަޖާ ކޮށްލުމުގެ ގޮތުން ކަމަށާއި އެއްވަނަ ލިބިދާނެ ކަމަށް އުންމީދު ވެސް ނުކުރާ ކަމަށެވެ.
"އިންސްޓަގްރާމުން ފެނުނީ ޕޯސްޓެއް ޗެލެންޖު އޮތްކަން. ރަށްޓެހިންނާ އެކު މަޖާކޮށްލަން ބައިވެރިވެލީ. އެއްވަނަ ހޯދޭނެ ކަމަށް އުންމީދެއް ވެސް ނުކުރަން. ވަރަށް އުފަލުން މިހުރީ،" އޭނާ ބުންޏެވެ.
ޕިއްޒާ ބޯނާގެ ޑިރެކްޓަރު ހުސެއިން ހާލީ ވިދާޅުވީ މުބާރާތަށް ބޮޑު ތަރުހީބެއް ލިބުމުން، އެފަދަ މުބާރާތްތައް ކުރިއަށް އޮތްތަނުގައި ވެސް ބޭއްވުމަށް ވިސްނަމުންދާ ކަމަށެވެ.
