ލަންޑަން (ޖެނުއަރީ 25) - އާސެނަލަށް ކުޅެމުން އަންނަ އިޓަލީ ގައުމީ ޓީމުގެ މިޑްފީލްޑަރު، ޖޯޖީނިއޯ އެ ކްލަބް ދޫކޮށްލުމަށް ޑިމާންޑްކޮށްފައިވާ ކަމަށް މީޑިއާ ރިޕޯޓްތައް ބުނެފި އެވެ.
ޖޯޖީނިއޯ، 33، އާސެނަލާ އެކު ހަދާފައިވާ ކޮންޓްރެކްޓް މި ސީޒަނުގެ ނިޔަލަށް ހަމަވާނެ އެވެ. އާސެނަލުން ޖޯޖީނިއޯ އަށް އިތުރު އެއް އަހަރުގެ އެއްބަސްވުމެއް ދީފައިވީނަމަވެސް ފަހަކަށް އައިސް އޭނާ އަށް އާސެނަލްގައި އެކަށީގެންވާ ވަރަށް ކުޅުމުގެ ފުރުސަތު ނުލިބެ އެވެ.
އެހެންވެ، ޖޯޖީނިއޯ އަންނަނީ މި މަހުގެ ޓްރާންސްފާތެރޭގައި އާސެނަލް ދޫކޮށްލަން ވިސްނަމުންނެވެ. އަދި އެކަން ދާދި ފަހުން މެޗެއްގެ ފަހުން، މީޑިއާ އިންޓަވިއުއެއްގައި ވެސް ޖޯޖީނިއޯ ބުނެފައިވެ އެވެ. ނޫސްވެރިއެއްގެ ސުވާލަށް މުސްތަގުބަލާ ގުޅޭގޮތުން ދިން ޖަވާބުގައި ޖޯޖީނިއޯ ބުނީ، އޭނާގެ އުފަން ގައުމު ބްރެޒިލްގެ ކްލަބަކަށް ކުޅުމަކީ އެދޭ ކަމެއް ކަމަށެވެ.
އީއެސްޕީއެން ބްރެޒިލް އިން ރިޕޯޓްކުރާގޮތުގައި، ބްރެޒިލްގެ ކްލަބް ޕަލްމެއިރާސް އިން ވަނީ ޖޯޖީނިއޯ އަށް ހުށަހަޅައިފަ އެވެ. އެކަމަކު، ޖޯޖީނިއޯ އަށް އެ ކްލަބަށް ބަދަލުވެވެން އޮތީ މިހާރު ލިބެމުން އަންނަ މުސާރަ ކުޑަކޮށްގެންނެވެ.
އިނގިރޭސި މީޑިއާ ރިޕޯޓްތައް ބުނާގޮތުން، ޖޯޖީނިއޯ ވަނީ އާސެނަލުން އޭނާ އަށް މުސްތަގުބަލު އޮތްގޮތެއް މެޗުތަކުގައި ކުޅުމުގެ ފުރުސަތު ލިބޭނެ ގޮތަކަށް ބުނެނުދެވިއްޖެނަމަ، އޭނާ ކްލަބް ދޫކޮށްލަން ފުރުސަތު ދިނުމަށެވެ.
ދާދި ފަހުން، ޔުއެފާ ކޯޗިން ބީ ލައިސަންސް ހާސިލްކުރި ޖޯޖީނިއޯ، މީގެ ދެ އަހަރު ކުރިން ޗެލްސީ ދޫކޮށް އާސެނަލަށް ބަަދަލުވީ 12 މިލިއަން ޕައުންޑް (15 މިލިއަން ޑޮލަރު)ގެ ޓްރާންސްފާ ފީ އަކަށެވެ. އިޓަލީގެ ނަޕޯލީން 2014 ވަނަ އަހަރު ޗެލްސީއާ ގުޅުނު ޖޯޖީނިއޯގެ ސޮއި ހޯދަން އެ ފަހަރު މެންޗެސްޓާ ސިޓީން ވެސް މަސައްކަތްކުރި އެވެ.
