ލިވަޕޫލް (ޖެނުއަރީ 22) - ޗެމްޕިއަންސް ލީގުގައި ކުޅުނު މެޗުތަކުން މޮޅުވެ، ލިވަޕޫލާއި ބާސެލޯނާ އިން ވަނީ ގަދަ 16 ބުރުގެ ޖާގަތައް ޔަގީންކޮށްފި އެވެ.
ލިވަޕޫލުން އަމިއްލަ ދަނޑުގައި 2-1 އިން ފްރާންސްގެ ލިލް ބަލިކުރިއިރު، ބާސެލޯނާ އިން ވަނީ ފަހަތުން އަރައި، ރަށުންބޭރުގައި 5-4 ޕޯޗުގަލްގެ ބެންފީކާ ބަލިކޮށްފަ އެވެ.
ލިވަޕޫލުން ކުޅުނު ހަތް މެޗުން ވެސް މޮޅުވެ، ސައްތަ އިން ސައްތަ ރެކޯޑެއް ދަމަހައްޓަމުން އަންނައިރު، ބާސެލޯނާ އިން ވަނީ ލީގު ބުރުގެ ގަދަ އަށެއްގެ ކަށަވަރުކޮށް، ގަދަ 16 އިން ސީދާ ޖާގައެއް ހޯދައިފަ އެވެ. ޗެމްޕިއަންސް ލީގުގެ ގްރޫޕް ފޭސްގައި ގަދަ އަށް ޓީމަށް ގަދަ 16 ގެ ސީދާ ޖާގައެއް ލިބޭއިރު، 9-24 އާ ދެމެދުގެ ޓީމުތަކުގެ މެދުގައި ކުޅޭނީ ޕްލޭއޮފެކެވެ. އަދި 25-26 އަށް ނިންމާ ޓީމުތައް ކަޓާނެ އެވެ.
ފުރަތަމަ ހާފުގައި ލިވަޕޫލުން ލީޑުނެގީ މުހައްމަދު ސަލާހު ޖެހި ގޯލުންނެވެ. މިއީ ޔޫރަޕްގެ މުބާރާތްތަކުގައި ސަލާހު ލިވަޕޫލަށް ޖަހައިދިން 50 ވަަނަ ގޯލެވެ. ދެ ވަނަ ގޯލެއް ޖަހަން ލިވަޕޫލަށް ލިބުނު ފުރުސަތުތަކުގެ ބޭނުންނުހިފިދިޔައިރު، ލިލް އިން ނަތީޖާ ހަމަހަމަކުރީ ޖޮނަތަން ޑޭވިޑް ޖެހި ގޯލުންނެވެ. ޑޭވިޑް މި ލަނޑު ޖެހީ ލިލްގެ އައިސާ މަންޑީ އަށް ދެ ވަނަ ރީނދޫ ކާޑާ އެކު ރަތް ކާޑެއް ދެއްކިތާ އިރުކޮޅެއް ފަހުންނެވެ.
ލިލް އިން އެއްވަރުކުރިތާ މާގިނައިރެއްނުވެ، ލިވަޕޫލުން އަނެއްކާ ލީޑުނެގީ ހާވީ އެލިއަޓް ޖެހި ގޯލުންނެވެ. އޭރިއާބޭރުން އެލިއަޓް ޖެހި ބޯޅަ ގޯލަށް ވަނީ ލިލް ކުޅުންތެރިއަކު ފައިގައި ޖެހިފަ އެވެ.
ގްރީސްގެ ފޯވާޑް، ވަންޖެލިސް ޕަވްލީޑީސް ހެޓްރިކެއް ހަދައި ފުރަތަމަ ހާފުގައި ބެންފީކާ އަށް ރަނގަޅު ލީޑެއް ނަގައިދިންއިރު، މި ހާފުގައި ބާސެލޯނާގެ ރޮބަޓް ލެވަންޑޯސްކީ ވެސް ލަނޑެއް ޖެހި އެވެ. ރަފީނިއާ، ދެ ވަނަ ހާފުގައި ބާސެލޯނާ އަށް ލަނޑެއް ޖަހައިދީފައިވަނިކޮށް ރޮނާލްޑް އަރައުހޯ އަތުން ބައިކޮޅަށް ވަން ގޯލުން ބެންފީކާ އިން ދެ ގޯލުގެ ލީޑެއް އަލުން ނެގި އެވެ.
ބާސެލޯނާ އިން ނަތީޖާ އަނބުރާލީ ފަހު ވަގުތު ފަހަތުން އަރައި ތިން ލަނޑު ޖަހައިގެންނެވެ. މި ލަނޑުތައް ޖެހީ، ލެވަންޑޯސްކީ، އެރިކް ގާސިއާ އަދި ރަފީނިއާ އެވެ. ރަފީނިއާ، މޮޅުވި ގޯލު ޖެހީ އިތުރު ވަގުތުގެ ހަ ވަނަ މިނިޓްގަ އެވެ.
މެޗުގެ ގިނަ ވަގުތު އެއް ކުޅުންތެރިއަކު މަދުކޮށް ކުޅެން ޖެހުނު ނަމަވެސް އެތުލެޓިކޯ މެޑްރިޑުން ވަނީ 2-1 އިން ބަޔާ ލެވަކޫސަން ބަލިކޮށްފަ އެވެ.
