މެޑްރިޑް (ޖެނުއަރީ 20) - ކީލިއަން އެމްބާޕޭ ޖެހި ދެ ގޯލާ އެކު 4-1 އިން ލަސް ޕަލްމާސް އަތުން މޮޅުވެ، ރެއާލް މެޑްރިޑުން ސްޕެނިޝް ލީގުގެ އެއް ވަނަ އަށް ޖެހިލައިފި އެވެ.
މި ހަފްތާގައި ބާސެލޯނާ އާއި އެތުލެޓިކޯ މެޑްރިޑް އަތުން ޕޮއިންޓް ގެއްލުމުގެ ފައިދާ ރެއާލުން މި ވަނީ ރަނގަޅަށް ނަގައިފަ އެވެ. ރެއާލަށް 20 މެޗުން 46 ޕޮއިންޓް ލިބިފައިވާއިރު، ދެ ވަނައިގައި އޮތް އެތުލެޓިކޯ މެޑްރިޑް އަށް 20 މެޗުން ވަނީ 44 ޕޮއިންޓް ލިބިފަ އެވެ. ތިން ވަނައިގައި އޮތް ބާސެލޯނާ އަށް 20 މެޗުން ލިބިފައިވަނީ 39 ޕޮއިންޓެވެ.
ރެއާލް ދަނޑުގައި ލަސް ޕަލްމާސް އިން ވަނީ ފުރަތަމަ މިނިޓްގައި ލަނޑު ޖަހައި ލީޑުނަގައިފަ އެވެ. މިއީ، ސަންޑްރޯ ރަމިރޭޒް ދިން ބޯޅައަކުން ފަބިއޯ ސިލްވާ ޖެހި ގޯލެކެވެ.
ރެއާލުން ނަތީޖާ ހަމަހަމަކުރީ 18 ވަނަ މިނިޓްގައި އެމްބާޕޭ ޖެހި ޕެނަލްޓީ އަކުންނެވެ. މި ޕެނަލްޓީ އަކީ ލަސް ޕަލްމާސްގެ ރަމިރޭޒް އޭރިއާތެރެއިން ރެއާލްގެ ރޮޑްރީގޯ އަށް ކުރި ފައުލަކަށް ދިން ޕެނަލްޓީ އެކެވެ.
މެޗުގެ 33 ވަނަ މިނިޓްގައި ރޮޑްރީގޯ ދިން ބޯޅައަކުން ބްރަހިމް ޑިއާޒް ރެއާލަށް ލީޑުހޯދައިދިންތާ ތިން މިނިޓް ފަހުން، އެމްބާޕޭ ވަނީ އިތުރު ގޯލެއް ޖަހައި، ލީޑުފުޅާކޮށްދީފަ އެވެ. އަދި ދެ ވަނަ ހާފުގައި ރެއާލުން ހަތަރު ވަނަ ގޯލު ޖެހީ، ފްރާން ގާސިއާ ދިން ބޯޅައަކުން ރޮޑްރީގޯ އެވެ.
ލަސް ޕަލްމާސް އިން މި މެޗު ނިންމާލީ އެއް ކުޅުންތެރިއަކު މަދުކޮށެވެ. އެއީ، މެޗުގެ 64 ވަނަ މިނިޓްގައި އެ ޓީމުގެ ބެނިޓޯ ރަމިރޭޒަށް ރަތް ކާޑެއް ދެއްކުމުންނެވެ. ރެއާލްގެ ލޫކަސް ވަޒްކޭޒަށް ބެނީޓޯ ކުރި ފައުލަށް ފުރަތަމަ ދެއްކި ރީނދޫ ކާުޑު ވަނީ ވީޑިއޯ އެސިސްޓަންޓް ރެފްރީ (ވީއޭއާރް) އިން ބަލައިފައި ރަތް ކާޑަކަށް ބަދަލުކޮށްފަ އެވެ.
