ބިންވެރިޔާ ސްކީމުގެ ދަށުން ގޯތި ނުލިބޭ ބަޔަކަށް އެ ސްކީމުން ގޯތި ލިބުނު ކަމަށް ވަގު ލިޔުންތަކެއް ތައްޔާރުކޮށް ވަގަށް ގޯތިތަކެއް ވިއްކި ކަމަށް ތުހުމަތުކުރެވޭ މައްސަލައިގެ ތަހުގީގުގައި ފުލުހުން އަމަލުކުރި ގޮތުގެ މައްސަލަ ބަލައި ދިނުމަށް ހައުސިން މިނިސްޓްރީގެ ކުރީގެ ސްޓޭޓް މިނިސްޓަރު އަކްރަމް ކަމާލުއްދީން ނެޝަނަލް އިންޓަގްރިޓީ ކޮމިޝަން (އެންއައިސީ) އަށް އިއްޔެ މައްސަލަ ހުށަހަޅައިފި އެވެ.
ފުލުހުން މިދިޔަ ޑިސެންބަރު 19، ގައި ބޭއްވި ނޫސްވެރިންގެ ބައްދަލުވުމުގައި ގޯތި ވައްކަމުގެ ތަހުގީގުގައި ސުވާލުކުރި މީހުންނަށް ލިޔުން ލިބުނީ ކުރީ ސަރުކާރުން ކަމަށާއި ގޯއްޗަށް ޝަރުތު ހަމަނުވެގެން ތުހުމަތު ކުރެވޭ އެކަކު އަކްރަމްއާ ކުރިން ބައްދަލު ކޮށްފައިވާކަން ހާމަކުރި އެވެ.
އަކްރަމް އިންޓަގްރިޓީއަށް ހުށަހެޅުއްވި މައްސަލައިގައި ފުލުހުންގެ އެ ނޫސްވެރިންގެ ބައްދަލުވުމަކީ އެޗްޑީސީން ގޯތިތަކެއް ދޫކުރި މައްސަލަ ކަމަށްވާއިރު، އެ މައްސަލައިގެ ތެރެއަށް ކުރީ ސަރުކާރުގެ އިސްވެރިންގެ މައުލޫމާތު ހިއްސާ ކުރަން ޖެހޭ އެއްވެސް ސަބަބެއް ނެތްކަން ފާހަގަކޮށްފައިވެ އެވެ.
ފުލުހުންގެ ނޫސްވެރިންގެ ބައްދަލުވުމުގެ ކުރިން ކުރީގެ ސަރުކާރުން ކަމެއް ކޮށްގެން އުޅޭ ކަމުގެ ތުހުމަތެއް ނެތްއިރު، އެ މައުލޫމާތު އެގޮތަށް ހިއްސާ ކުރުމުގެ ބޭނުމަކީ ކުރީ ސަރުކާރަށް ނިސްބަތްވާ ފަރާތްތަކުގެ ނަން ކިލަނބުކޮށް، މި ސަރުކާރުގެ ތެރޭގައި ފެންމަތިވެގެން އުޅޭ ކޮރަޕްޝަންގެ މައްސަލައިގެ ހަގީގަތް އޮޅުވާލައި، އާންމުންގެ މެދުގައި ކުރީ ސަރުކާރަށް ނިސްބަތްވާ ފަރާތްތަކާ މެދު ނުރަނގަޅު ތަސައްވުރެއް އުފެއްދުން ކަމަށް އަކްރަމް ހުށަހެޅުއްވި މައްސަލައިގައި އިތުރަށް ފާހަގަކުރެއްވި އެވެ.
އެއްވެސް މީހަކަށް ތުހުމަތު ނުކުރާކަމަށް ފުލުހުން ތަކުރާރުކޮށް ބުނި ނަމަވެސް، ނޫސްވެރިންގެ ބައްދަލުވުމުގައި އޭނާގެ ނަން ފިޔަވައި އިތުރު މީހެއްގެ ނަން ފާހަގަ ނުކުރާކަން އަކްރަމް ފާހަގަކުރި އެވެ. އަދި ތަހުގީގު ކުރަމުންދާ މައްސަލަތަކުގައި ފުލުހުން އާންމުކޮށް އަމަލުކުރަމުންދާ އުސޫލުތަކާ ހަމަތަކާވެސް ހިލާފަށް އެ މައްސަލައިގައި އަމަލުކުރިކަން ފާހަގަކުރި އެވެ.
ފުލުހުންގެ އަމަލުގެ ސަބަބުން އެކި ގޮތްގޮތުން ގެއްލުންވަމުންދާ ކަމަށް އަކްރަމް ވިދާޅުވި އެވެ. އެއީ:
1. އަކްރަމްގެ މައްޗަށް ކުށެއްގެ ތުހުމަތު ކުރެވިފައި ނުވަނީސް އަދި އޭނާއާ ގުޅުމެއް ނެތް މައްސަލައެއްގެ މައުލޫމާތު ހިއްސާކުރުމުގެ ތެރޭގައި އޭނާގެ ނަން ވަކިން ފާހަގަކޮށް، ތުހުމަތު އަމާޒުވާ ގޮތަށް މައުލޫމާތު ފެތުރުމަކީ، އޭނާގެ ނަމާއި އަބުރަށް ހުތުރުވާ ގޮތަށް ފުލުހުންގެ ހިދުމަތުގެ އޮފިސަރަކު ހިންގި އަމަލެއް ކަމާއި، އޭގެ ސަބަބުން ސޯޝަލް މީޑިއާގައި އަކްރަމާ މެދު ތުހުމަތުތައް އަމާޒުވެ، އެކި އެކި ގޮތްގޮތުން ފުރައްސާރަތަކާ ކުރިމަތިވަމުން ދާކަން.
2. ގާނޫނުއަސާސީގައި ބަޔާންކުރާ ހައްގުތަކާއި މިނިވަންކަން ލިބިދިނުމުގައި އެއްވެސް މީހެއްގެ މެދުގައި ތަފާތުނު ކުރުމާއި، ވަކިން ހާއްސަކޮށް އެމީހެއްގެ ސިޔާސީ ވިސްނުމަށް ބަލައި ތަފާތުނުކުރުމަކީ ވެސް ގާނޫނުއަސާސީން ކަށަވަރު ކޮށްދީފައިވާ ހައްގަކަށްވާއިރު، ފުލުސް އޮފިސަރުގެ އަމަލުތައް ހުރިގޮތުގެ ސަބަބުން، އެ ހައްގަށް ވެސް އުނިކަން އައިސްފައިވާކަން.
3. ކުށެއްގެ ތުހުމަތު ކުރެވިއްޖެނަމަ، ކޮންމެ މީހަކަށް ލިބިދޭ އަސާސީ ހައްގުތަކެއް ގާނޫނުއަސާސީގައި ބަޔާން ކޮށްފައި އޮތުމާއި އަދި ގާނޫނުއަސާސީގައި ނިޔާކުރާ ގޮތުން، މީހަކު ކުށެއް ކޮށްފިކަން، ޝަރީއަތުގައި ސާބިތުވުމާ ހަމައަށް، އެމީހަކީ ކުށެއް ނެތް މައުސޫމު މީހެއްކަމުގައި ބެލުމުގެ ހައްގު ކޮންމެ މީހަކަށްމެ ލިބިދޭކަން.
4. ކުށްކުށުގައި ތުހުމަތު ކުރެވޭ މީހުންގެ މައްޗަށް ގާނޫނުގައިވާ ގޮތުގެމަތީން ތަހުގީގު ހިންގުމުގައްޔާއި، ޝަރީއަތް ކުރުމުގައްޔާއި، ކުށް ސާބިތުވެގެން ޙުކުމް ތަންފީޒު ކުރުމުގައި އެނޫން މީހެއްގެ ގާނޫނީ ހައްގަކަށް ނުވަތަ ގާނޫނީ ވާޖިބަކަށް ހުރަސް އަޅައިގެނެއް ނުވާނެ ކަމަށްވެސް ގާނޫނުއަސާސީގައި ބަޔާންކުރާ ކަމާއި، އޭގެ މާނައަކީ، ކުށެއް ސާބިތުނުވާހާހިނދަކު، ގާނޫނީ ގޮތުން ލިބިގެންވާ އެންމެހައި ހައްގުތައް ފުރިހަމައަށް ލިބިގެންވާނެކަން ކަމަށް.
5. އެސިސްޓަންޓް ކޮމިޝަނަރ އޮފް ޕޮލިސް އަބްދުﷲ ޝަރީފް އަމަލުކޮށްފައިވަނީ، ގާނޫނުއަސާސީން ކަށަވަރުކޮށްދޭ ހައްގަށް އުނިކަން އަންނަ ގޮތަށް، އަދި އަކްރަމްގެ ހައްގުތަކާއި މިނިވަންކަމަށް ފަރުވާލެއް ބެހެއްޓުމެއް ނެތިކަން.
6. ފުލުހުންގެ ފަރާތުން އެ ބައްދަލުވުމުގައި އަކްރަމަށް ނިސްބަތްކޮށް ދެއްކި ވާހަކަތަކުގެ ސަބަބުން، މުޖްތަމައުގެ ތެރޭގައި އަކްރަމްގެ ނަން ކިލަނބުވެ، އޭނާއަކީ ކުށެއްގެ ތުހުމަތުކުރެވިފައިވާ މީހެއްގެ ގޮތުގައި މުޖްތަމައުގެ ތެރޭގައި ބެލެވެން ފެށުމުގެ އިހްތިމާލު އޮތްކަން.
ގޯތި ވައްކަމުގެ މައްސަލަ ފުލުހުން ތަހުގީގު ކުރަން ފެށީ ސޯޝަލް މީޑިއާގައި އާންމުވި މައުލޫމާތުތަކާ ގުޅިގެންނެވެ. އެގޮތުން ފުލުހުންނާއި އެންޓި ކޮރަޕްޝަން ކޮމިޝަން (އޭސީސީ) ގުޅިގެން އެ މައްސަލަ ދަނީ ތަހުގީގު ކުރަމުންނެވެ.
ފުލުހުން އެންމެ ފަހުން ބުނީ ގޯތި ވައްކަމާ ގުޅިގެން އެއްވެސް މީހެއްގެ މައްޗަށް މިހާތަނަށް ޖިނާއީ އެއްވެސް ތުހުމަތެއް ނުކުރާ ކަމަށެވެ.
އެޗްޑީސީން ބުނާ ގޮތުން ގޯތިތަކުގެ މައްސަލަ ފުރަތަމަ ފެންމަތިވީ ޖުލައި މަހު އެވެ. ދެ މީހަކަށް އެއް ބިމެއް ދީފައި އޮތްކަން އެނގިގެން އެކަމުގައި އެޗްޑީސީ އާއި ހައުސިން މިނިސްޓްރީއާ ދެމެދު މުއާމަލާތް ކުރި އެވެ. ނަމަވެސް އެ މައްސަލަ އޭރު ތަހުގީގީ އިދާރާއަކަށް ހުށަހައެއް ނާޅަ އެވެ.
