ދިވެހި ޔޫތު ލީގުގެ 16 އަހަރުން ދަށުގައި އެންމެ ފަހުން ކުޅުނު މެޗުތަކުން، ސުޕަ ޔުނައިޓެޑް ސްޕޯޓްސް (ސަސް) އިން 1-0 އިން މާޒިޔާ ސްޕޯޓްސް އެންޑް ރެކްރިއޭޝަން ބަލިކޮށް ފުރިހަމަ ރެކޯޑް ދެމެހެއްޓިއިރު، ވިކްޓަރީ ސްޕޯޓްސް ކްލަބުން 9-0 އިން ޔުނައިޓެޑް ވިކްޓަރީ (ޔޫވީ) އަތުން ބޮޑު މޮޅެއް ހޯދައިފި އެވެ.
މި ނަތީޖާތަކާ އެކު، 16 އަހަރުން ދަށުގެ ލީގުގައި ކޮންމެ ޓީމެއް ވަނީ، ތިން މެޗު ކުޅެފަ އެވެ. އެއް ވަނައިގައި އޮތް ވެލެންސިއާ އާއި ދެ ވަނައިގައި އޮތް ސަސް އިން ކުޅުނު ތިން މެޗުން މޮޅުވެ، ނުވަ ޕޮއިންޓް ހޯދާފައިވާއިރު، ތިން ވަނައިގައި އޮތް ޓީސީ ސްޕޯޓްސް ކްލަބާއި ހަތަރެއްގައި އޮތް މާޒިޔާ ދެ މެޗުން މޮޅުވެ، ހަ ޕޮއިންޓް ލިބިފައިވާއިރު، ވިކްޓަރީ ވަނީ ތިން ޕޮއިންޓާ އެކު ފަސް ވަނަ އަށް ޖެހިލައިފަ އެވެ.
ހަ ވަނައިގައި އޮތް ކްލަބް އީގަލްސް އާއި ހަތް ވަނައިގައި އޮތް ހުރިއްޔާ ސްޕޯޓްސް ކްލަބް (ހުރާ) އަށް ވަނީ ޕޮއިންޓެއް ލިބިފަ އެވެ. ޔުނައިޓެޑް ވިކްޓަރީ އަށް އަދި ޕޮއިންޓެއް ނުލިބެ އެެވެ.
އިއްޔެ ހަވީރު ގަލޮޅު ދަނޑުގައި ކުޅުނު މެޗުގައި ސަސްގެ ހަމައެކަނި ލަނޑު ޖެހީ، އަބްދުﷲ އައިދާން ސާޖިދު އެެވެ.
ރޭ ޔުނައިޓެޑް ވިކްޓަރީ ކޮޅަށް ވިކްޓަރީގެ ލަނޑުތައް ޖެހީ، އިބްރާހިމް އަރުޝާން ނަޝާދު ދެ ގޯލާއި މުހައްމަދު ސާއީން ޝަހީން މަހުމޫދު ހެޓްރިކެއްގެ އިތުރުން ނައްވާފު އަބްދުﷲ ނަޝީދު، އަދްހަމް އަދާން އިބްރާހިމް އަދި ޖުމާން އަބްދުﷲ ޖަމީލް އެވެ.
ޔޫތު ލީގުގެ މެޗުތައް ދެން އޮންނާނީ މާދަމާ އެވެ. އެއީ 12 އަހަރުން ދަށާއި 14 އަހަރުން ދަށުގެ ލީގުގެ މެޗުތަކެވެ. އެ ގޮތުން، ހަވީރު ކުޅޭނީ ޔުނައިޓެޑް ވިކްޓަރީ އާއި މާޒިޔާ އެވެ. އަދި ރޭގަނޑު ކުޅޭނީ، ޓީސީ އާއި އީގަލްސް އެވެ.
