ދިވެހި ޔޫތު ލީގުގައި އިއްޔެ ހަވީރު ސުޕަ ޔުނައިޓެޑް ސްޕޯޓްސް 3-2 އިން ބަލިކޮށް ކްލަބް ވެލެންސިއާ އިން 16 އަހަރުން ދަށުގެ ލީގުގެ އެއް ވަނައިގައި ލީޑެއްނަގައިފި އެވެ.
އިއްޔެގެ ނަތީޖާ އަށް ފަހު ވެލެންސިއާ އިން ކުރީގައި އޮތީ ތިން ޕޮއިންޓުގެ ލީޑަކާ އެކު އެވެ. ވެލެންސިއާ އަށް ހަތަރު މެޗުން 12 ޕޮއިންޓް ލިބިފައިވާއިރު، ސަސް އިން ދެ ވަނައިގައި އޮތީ ހަތަރު މެޗުން ނުވަ ޕޮއިންޓް ހޯދައިގެންނެވެ. ތިން ވަނައިގައި އޮތް ޓީސީ ސްޕޯޓްސް ކްލަބާއި ހަތަރެއްގައި އޮތް މާޒިޔާ ސްޕޯޓްސް އެންޑް ރެކްރިއޭޝަނަށް ވަނީ ތިން މެޗުން ހަ ޕޮއިންޓް ލިބިފަ އެވެ.
ވިކްޓަރީ އާއި ހުރާ ކުޅުނު މެޗު ރޭ ވަނީ 1-1 އިން އެއްވަރުވެފަ އެވެ. ފަސް ވަނައިގައި އޮތް ވިކްޓަރީ އަށް ހަތަރު މެޗުން ހަތަރު ޕޮއިންޓް ލިބިފައިވާއިރު، ހަ ވަނައިގައި އޮތް ހުރާ އަށް ހަތަރު މެޗުން ލިބިފައިވަނީ ދެ ޕޮއިންޓެވެ. އަދި ހަތް ވަނައިގައި އޮތް އީގަލްސް އަށް ތިން މެޗުން ޕޮއިންޓެއް ލިބިފައިވާއިރު، ފުލުގައި އޮތް ޔުނައިޓެޑް ވިކްޓަރީ އަށް އަދި ޕޮއިންޓެއް ނުލިބެ އެެވެ.
އިއްޔެ ހަވީރު ހެންވޭރު ދަނޑުގައި ކުޅުނު މެޗުގައި، ސަސްގެ ގޯލުތައް ފުރަތަމަ ޖަހައިދިނީ، އަނާން އިބްރާހިމް، އަބްދުﷲ އައިދާން ސާޖިދު އެވެ. އަދި ވެލެންސިއާ އިން ލަނޑުތައް ޖެހީ ކެޕްޓަން، އީތަން އިބްރާހިމް ޒަކީ، އާއިދު މުހައްމަދު ޖަވީޒު ދެ ގޯލެވެ.
ރޭ ވިކްޓަރީގެ ގޯލު ޖެހީ ބާސިލް އަހުމަދު އެވެ. އަދި ހުރާ އިން ލަނޑު ކާމިޔާބުކުރީ، މުހައްމަދު ސަމްއާން ސައްމޫން އެެވެ.
ދިވެހި ޔޫތު ލީގުގައި މިއަދު ވެސް އޮތީ 16 އަހަރުން ދަށުގެ ދެ މެޗެވެ. ހަވީރު ކުޅޭ މެޗުގައި، އީގަލްސް އިން ޔުނައިޓެޑް ވިކްޓަރީއާ ކުޅޭއިރު، މިރޭ ޓީސީން މާޒިޔާއާ ބައްދަލުކުރާނެ އެވެ.
