ދިވެހި ޔޫތު ލީގުގެ 12 އަހަރުން ދަށާއި 14 އަހަރުން ދަށުގެ މުބާރާތުގައި، މާޒިޔާ ސްޕޯޓްސް އެންޑް ރެކްރިއޭޝަން ބަލިކޮށް ވިކްޓަރީ ސްޕޯޓްސް ކްލަބުން ފިޔަވަޅެއް ކުރިއަށް ޖެހިލައިފި އެވެ.
އެ ގޮތުން، ރޭ 12 އަހަރުން ދަށުގެ ލީގުގައި މާޒިޔާ އަތުން ވިކްޓަރީ 1-0 އިން މޮޅުވިއިރު، 14 އަހަރުން ދަށުގެ ލީގުގައި ވިކްޓަރީން މާޒިޔާގެ މައްޗަށް ކުރިހޯދީ 3-1 އިންނެވެ.
ރޭގެ ނަތީޖާ ތަކަށް ފަހު، 12 އަހަރުން ދަށުގެ ލީގުގެ އެއް ވަަނައިގައި އޮތް ސުޕަ ޔުނައިޓެޑް ސްޕޯޓްސް (ސަސް) އަށް ފަސް މެޗުން 15 ޕޮއިންޓް ލިބިފައިވާއިރު، ދެ ވަނަ އަށް ޖެހިލި، ވިކްޓަރީ އަށް ހަ މެޗުން ވަނީ 13 ޕޮއިންޓް ލިބިފަ އެވެ. މާޒިޔާ އޮތީ ހަ މެޗުން 12 ޕޮއިންޓާ އެކު އެވެ. އަދި 14 އަހަރުން ދަށުގެ ލީގުގެ އެއް ވަނަ އަަށް ވިކްޓަރީ ޖެހިލީ، ހަ މެޗުން 14 ޕޮއިންޓާ އެކު އެވެ. ދެ ވަނައިގައި އޮތް ސަސް އަށް ވަނީ ފަސް މެޗުން 13 ޕޮއިންޓް ލިބިފަ އެވެ.
ބާރަ އަހަރުން ދަށުގެ މެޗުގައި، މާޒިޔާ ކޮޅަށް ވިކްޓަރީގެ ލަނޑު ޖެހީ، އަހުމަދު ލަސަން އިސްމާއިލް އެވެ. އަދި 14 އަހަރުން ދަށުގެ މެޗުގައި ވިކްޓަރީގެ ލަނޑުތައް ޖެހީ، މުހައްމަދު ޔަޒްދާން އަހުމަދު ދެ ގޯލާއި މުހައްމަދު ނީލް ބިން ޒަހީން އެވެ. އަދި މާޒިޔާގެ ލަނޑު ޖެހީ، ޔޫސުފް ޔުއާން އެވެ.
މުބާރާތުގައި އިއްޔެ ހަވީރު، 12 އަހަރުން ދަށުގެ މެޗުން، ވެލެންސިއާ އިން 2-0 އިން އީގަލްސް ބަލިކުރިއިރު، 14 އަހަރުން ދަށުގެ މެޗުން ވެސް ވަނީ 2-0 އިން އީގަލްސްގެ މައްޗަށް ކުރިހޯދައިފަ އެެވެ. ބާރަ އަހަރުން ދަށުގެ މެޗުގައި ވެލެންސިއާގެ ލަނޑުތައް ޖެހީ، މުހައްމަދު ލީވާން އަލީ އާއި އަހުމަދު އާލް މުހައްމަދު އެވެ. އަދި 14 އަހަރުން ދަށުގެ މެޗުގައި، ވެލެންސިއާގެ ލަނޑުތައް ޖެހީ، ނަހީކް އަހުމަދު ނިޔާޒް ދެ ގޯލެވެ.
ބާރަ އަހަރުން ދަށުގެ ލީގުގެ ފުލުގައި އީގަލްސް އޮތީ ކުޅުނު ހަތް މެޗުން ވެސް ބަލިވެގެންނެވެ. ވެލެންސިއާ ފަސް ވަނައިގައި އޮތީ ހަ މެޗުން އަށް ޕޮއިންޓް ހޯދައިގެންނެވެ. އަދި 14 އަހަރުން ދަށުގެ ލީގުގެ ފުލުގައި އީގަލްސް އޮތީ ހަތް މެޗުން ތިން ޕޮއިންޓާ އެކު އެވެ. އީގަލްސް އަތުން ހޯދި ތިން ޕޮއިންޓާ އެކު، ވެލެންސިއާ އިން ހަތަރު ޕޮއިންޓް ހަމަކޮށް އޮތީ ތާވަލުގެ ފަަސް ވަނައިގަ އެވެ.
މުބާރާތުގައި މިއަދު އޮތީ 12 އަހަރުން ދަށާއި 14 އަހަރުން ދަށުގެ މެޗުތަކެވެ. އެ ގޮތުން، ހަވީރު ކުޅޭނީ މި ދެ އުމުރުފުރާގެ ލީގުގައި ޔުނައިޓެޑް ވިކްޓަރީ އާއި ހުރިއްޔާ ސްޕޯޓްސް ކްލަބް (ހުރާ) އެވެ. އަދި މިރޭ ކުޅޭނީ ޓީސީ ސްޕޯޓްސް ކްލަބާއި ސަސް އެވެ.
