މެޑްރިޑް (ޖެނުއަރީ 4) - ސްޕެނިޝް ލީގުގައި ރޭ ފަހު ވަގުުތު 2-1 އިން ވެލެންސިއާ ބަލިކޮށް ރެއާލް މެޑްރިޑް ލީގުގެ އެއް ވަނަ އަށް ޖެހިލައިފި އެވެ.
ރެއާލުން މި މެޗުގެ ނަތީޖާ ބަދަލުކޮށްލީ އެއް ކުޅުންތެރިއަކު މަދުކޮށް ކުޅެމުންނެވެ. އެއީ، ވިނީޝިއުސް ޖޫނިއާ އަށް ދެއްކި ރަތް ކާޑަށް ފަހު 10 ކުޅުންތެރިންނާ އެކު ކުޅެމުންނެވެ.
ލީގުގެ އެއް ވަނައިގައި ރެއާލް އޮތީ 19 މެޗުން 43 ޕޮއިންޓާ އެކު އެވެ. ދެ ވަނައިގައި އޮތް އެތުލެޓިކޯ މެޑްރިޑަށް 18 މެޗުން 41 ޕޮއިންޓް ލިބިފައިވާއިރު، ތިން ވަނައިގައި އޮތް ބާސެލޯނާ އަށް ވަނީ 19 މެޗުން 38 ޕޮއިންޓް ލިބިފަ އެވެ.
ވެލެންސިއާ ދަނޑުގައި ރޭ ކުުޅުނު މެޗުގައި އެ ޓީމުން ވަނީ 27 ވަނަ މިނިޓްގައި ލީޑުނަގައިފަ އެވެ. އެ ލަނޑު ޖެހީ ހޫގޯ ޑޫރޯ އެވެ. މިއީ، ޖަވީ ގޭރާ ޖެހި ބޯޅައެއް ރެއާލް ކީޕަރު ތިބޯ ކޯޓުއާ އަތުގައި ޖެހިފައި ނުކުތް ވަގުތު ރީބައުންސަކުން ޑޫރޯ ޖެހި ގޯލެކެވެ.
ދެ ވަނަ ހާފުގެ ކުރީކޮޅުގައި ކީލިއަން އެމްބާޕޭ އަށް ކުރި ފައުލަކަށް ލިބުނު ޕެނަލްޓީ އަކުން ޖޫޑް ބެލިންހަމް ފޮނުވާލި ބޯޅަ އަމާޒުވީ ގޯލުގެ ދަނޑިއަށެވެ.
ނަތީޖާ ހަމަހަމަކުރަން ކުރި މަސައްކަތުގެ ތެރޭގައި، ރެއާލަށް މައްސަލަ ދިމާވީ މެޗުގެ 79 ވަނަ މިނިޓްގައި އެ ޓީމުގެ ވިނީޝިއުސް ޖޫނިއާ އަށް ރަތް ކާޑެއް ދެއްކުމުންނެވެ. ވިނީޝިއުސް އަށް ރަތް ކާޑެއް ދެއްކީ ވެލެންސިއާގެ ކީޕަރު ސްޓޯލް ޑިމްޓްރިއޭވްސްކީ އަށް ހަމަލާ ދިނުމުންނެވެ. އަދި އެކަން ވީޑިއޯ އެސިސްޓަންޓް ރެފްރީ (ވީއޭއާރް) އިން ވަނީ ޔަގީންކޮށްފަ އެެވެ.
އެއް ކުޅުންތެރިއަކު މަދުކޮށް ކުޅެން ޖެހުނު ނަމަވެސް، ރެއާލުން ވަނީ އެޓޭކަށް ޖެހި ތަފާތު ދައްކައިފަ އެވެ. ރެއާލުން އެއްވަރުކުރީ މެޗުގެ 85 ވަނަ މިނިޓްގައި ލޫކަ މޮޑްރިޗް ޖެހި ގޯލުންނެވެ. އަދި މެޗުގެ އިތުރު ވަގުުުތުގައި ބެލިންހަމް ވަނީ ގޯލު ޖަހައި ރެއާލް މޮޅުކޮށްދީފަ އެވެ.
