އިޒްރޭލުން ފަލަސްތީނުގެ ގާޒާގައި ހިންގާ ނަސްލުހޭދައިގައި ގާޒާގެ ހިއުމެނިޓޭރިއަން ޒޯނަށް ހަމަލާދީ 11 މީހުން މަރާލައި، 15 މީހުން ޒަހަމް ކޮށްލައިފި އެވެ.
އަލްޖަޒީރާއިން ބުނީ އިޒްރޭލުން ދިން އެ ހަމަލާގައި މަރުވި 11 މީހުންގެ ތެރޭގައި ތިން ކުޑަކުދިންނާއި ދެ އަންހެނުން ހިމެނޭ ކަމަށެވެ.
ސޯޝަލް މީޑިއާގައި އާންމުވެފައިވާ ވީޑިއޯތަކުން ފެންނަ ގޮތުގައި ހަމަލާއަށްފަހު އެ ސަރަހައްދުގައި ހުރި ޓެންޓްތައް އަނދާ މަންޒަރު ފެނެ އެވެ.
ހިއުމެނިޓޭރިއަން ސަރަހައްދަށް އިޒްރޭލުން ހަމަލާދިން ސަބަބެއް މިހާތަނަށް ހާމަ ކޮށްފައެއް ނުވެ އެވެ.
ގާޒާގެ ހިއުމެނިޓޭރިއަން ސަރަހައްދަށް މިދިޔަ ޑިސެމްބަރު 22، ގައި ވެސް އިޒްރޭލުން ހަމަލާދީ ތިން ކުޑަކުދިން ހިމެނޭ ގޮތަށް އަށް މީހުން މަރާލި އެވެ.
އިޒްރޭލުން ވަނީ ޑިސެމްބަރު 3، ގައި ގާޒާގެ އަލް މަވާސީގެ ޓެންޓުތަކަށް ހަމަލާދީ 20 މީހުން މަރާލައިފަ އެވެ. އިޒްރޭލުން ބުނީ އެ ހަމަލާދިނީ ހަމާސްގެ އޮފިޝަލަކަށް އަމާޒުކޮށް ކަމަށެވެ.
ނަމަވެސް އިޒްރޭލުން ދޭ ހަމަލާތަކުގައި ގިނައިން މަރުވަނީ ކަމާނުބެހޭ ކުޑަކުދިންނާއި އަންހެނުންނެވެ. އެގޮތުން އޮކްޓޯބަރު 7، 2023، އިން ފެށިގެން އިޒްރޭލުން ގާޒާއަށް ދެމުން އަންނަ ހަމަލާތަކުގައި 45،533 މީހުން ވަނީ މަރުވެފަ އެވެ.
