ލަންޑަން (ޖެނުއަރީ 2) - ޗެލްސީ އަށް ކުޅެމުން އަންނަ އިނގިރޭސި ވާތުބެކް، ބެން ޗިލްވެލް ފަސޭހައިން ދޫކޮށްލެވެން ނެތް ކަމަށް އިނގިރޭސި މީޑިއާ ރިޕޯޓްތައް ބުނެފި އެވެ.
ޗެލްސީން ޗިލްވެލް، 28، ގަތީ، 2020 ވަނަ އަހަރު އޮގަސްޓް މަހު، ލެސްޓާ ސިޓީ އަށް 50 މިިލިއަން ޑޮލަރު ދީފަ އެވެ. ޗިލްވެލް މި ވަގުތު ޗެލްސީގެ ކޮންޓްރެކްޓްގައި ހުރީ، 2027 ވަނަ އަހަރު ޖޫން މަހުގެ ނިޔަލަށެވެ.
މި ސީޒަން ފެށުމުގެ ކުރިން، ޗެލްސީގެ ކޯޗު އެންޒޯ މަރެސްކާ ވަނީ ރަހީމް ސްޓާލިން އާއި ޗިލްވެލް އަކީ އޭނާގެ ޕްލޭނުގައި ނުހިމެނޭ ކުޅުންތެރިން ކަމަށް ބުނެފަ އެވެ. އޭގެ ތެރެއިން ސްޓާލިން ވަނީ އާސެނަލަށް ބަދަލުވެފަ އެވެ. އެކަމަކު، ޗިލްވެލް ޝައުގުވެރިވާ ވަރުގެ ހުށަހެޅުމެއް ނުލިބޭތީ އޭނާ އެ ކްލަބްގައި މަޑުކުރީ އެވެ.
އިއްޔެ އިން ފެށިގެން މި މަހުގެ ނިޔަލަށް ހުޅުވިފައިވާ ފިނި މޫސުމުގެ ޓްރާންސްފާ މާކެޓްގައި ޗެލްސީން ކުޅުންތެރިންތަކެއް ވިއްކާލާއިރު، އެ ލިސްޓުގެ ކުރިގައި ޗިލްވެލްގެ ނަން ހިމެނެ އެވެ. ޗިލްވެލް ހޯދަން ހަތަރު ވަރަކަށް ކްލަބެއްގެ އޮފާ ލިބިފައިވާއިރު، ޗެލްސީ އަށް އޭނާ ދޫކޮށްލުމުގައި ވަނީ ހުރަސްތަކެއް ކުރިމަތިވެފަ އެވެ.
ޗެލްސީގައި ޗިލްވެލް ހުރީ ހަފްތާ އަކު، 210،000 ޑޮލަރުގެ މުސާރަ އަކަށެވެ. ޗިލްވެލްއާ އެކު، ޗެލްސީން ހަދާފައިވާ ކޮންޓްރެކްޓްގައިވާ ގޮތުން، އޭނާ އެދިގެން ނޫން ގޮތަކަށް ވިއްކާލެވެނީ، ކޮންޓްރެކްޓްގެ ބާކީ މުއްދަތަށް އޮތް މުސާރަ އެއްކޮށް ހަމަޖައްސައިދީފަ އެވެ.
އެއްބަސްވުމުގައިވާ ގޮތުން، ކޮންޓްރެކްޓް މުއްދަތު ހަމަވުމުގެ ކުރިން، ޗެލްސީ އަށް ޗިލްވެލް ދޫކޮށްލެވެން އޮތީ ދެ ގޮތެކެވެ. އެއީ، އޭނާގެ ކޮންޓްރެކްޓްގައި ބާކީ އޮތް އެއް އަހަރަށް ވާ މުސާރަ އެއްކޮށް ދިނުމަށް ފަހު ނޫނީ، އެހެން ޓީމަކަށް ލޯން އުސޫލެއްގެ ދަށުން ކޮންޓްރެކްޓް ނިމެންދެން ދޫކޮށްލާއިރު، ޗެލްސީން ލިބެމުން އައި މުސާރަ ލިބޭ ގޮތަށް ޑީލް ހަަމަޖައްސައިގެންނެވެ.
މި ސީޒަނުގައި ޗިލްވެލް ކުޅެފައިވަނީ އެންމެ މެޗެއްގަ އެވެ. އެއީ، އިނގިރޭސި ހަތަރު ވަނަ ޑިވިޝަނުގެ ބަރޯއާ ދެކޮޅަށް ސެޕްޓެމްބަރު މަހު ޗެލްސީން ކުޅުނު ލީގު ކަޕްގެ މެޗުގަ އެވެ.
