އެމްއެމްޕީއާރުސީ ހިޔާނާތުގެ މައްސަލާގައި ކުރީގެ ނައިބު ރައީސް އަހުމަދު އަދީބުގެ މައްޗަށް ކުރި ދެ މިލިއަން ރުފިޔާގެ ޖޫރިމަނާއިން އެއް މިލިއަން ރުފިޔާ އަދިވެސް ނުދައްކާ އޮތުމުން، އެ ފައިސާ އެއް މަސް ދުވަހުގެ ތެރޭގައި ދައުލަތަށް ދެއްކުމަށް ސިވިލް ކޯޓުން ހުކުމްކޮށްފި އެވެ.
އަންގާރަ ދުވަހު ސިިލް ކޯޓުން އަދީބުގެ މައްޗަށް ހުކުމްކުރީ ޑިސެމްބަރު 31، އިން ފެށިގެން ދައުލަތަށް ދައްކަން ޖެހޭ އެއް މިލިއަން ރުފިޔާ މޯލްޑިވްސް އިންލަންޑް ރެވެނިއު އޮތޯރިޓީއަށް އެއްކޮށް ދައްކައި ހަލާސް ކުރުމަށެވެ.
އެމްއެމްޕީއާރުސީ ހިޔާނާތާއި ގުޅިގެން އުފުލުނު ދެ ދައުވާއަކަށް ކޮންމެ ދައުވާއަކަށް އެއް މިލިއަން ރުފިޔާއިން އަދީބު ޖޫރިމަނާކުރި އެވެ. އޮކްޓޯބަރު، 5، 2020 ގައި ކުރި ހުކުމުގައި އެ ދެ މިލިއަން ރުފިޔާ ދައުލަތަށް ދައްކައި ހަލާސް ކުރުމަށް އޭރު ދިނީ އެއް މަސް ދުވަހެވެ.
ނަމަަވެސް ހުކުމާ އެއްގޮތަށް އެއް މިލިއަން ރުފިޔާ ދައުލަތަށް ދެއްކައި، ބާކީ ފައިސާ ދައްކައި ހަލާސް ނުކުރާތީ އެޓާނީ ޖެނެރަލް އޮފީހުން އެ މައްސަލަ ސިވިލް ކޯޓަށް ވެއްދީ މެއި، 2023 ގަ އެވެ.
އޭރު އަދީބުގެ ފަރާާތުން އެދިފައި ވަނީ ކޮމިޓްމެންޓުގެ ގޮތުގައި ފުރަތަމަ އެއްލައްކަ ރުފިޔާ ހުށަހެޅުމަށް ފަހު، ކޮންމެ މަހަކު 20،000ރ. ގެ މަގުން އެ ޖޫރިމަނާ ދައްކާ ހަލާސްކުރުމަށެވެ. އެކަމަކު ދައުލަތުން އޭރު އެދުނީ ކޮމިޓްމެންޓުގެ ގޮތުގާ ދެލައްކަ ދެއްކުމަށް ފަހު ބާކީ ބައި 36 މަހަށް ބަހާލައިގެން ދެއްކުމަށެވެ.
އެ މައްސަލައިގައި ދައުލަތުން ފަހުން ވަނީ އަދީބުގެ ފަރާތުން އެ ފައިސާ ދެއްކުމަށް ބޭނުންވާ ގޮތް ލިޔުމުން ހުށަހެޅުމުގެ ފުރުސަތަކަށެވެ. ނަމަވެސް ފަހުން ދައުލަތުން އެދުނީ އެ ފުރުސަތު އަދީބަށް ނުދީ މައްސަލައިގައި ޝަރީއަތުގެ އިތުރު އަޑުއެހުމެއް ނުބާއްވައި ހުކުމްކޮށްދިނުމަށެވެ.
