މީގެކުރީގައި އަމިއްލަ ގޭގޭގައި ބޮންޑެޑް ވެއާހައުސްތައް ހިންގޭ ގޮތަށް އޮތް އޮތުން ބަދަލުކޮށް، މީގެ ފަހުން އެފަދަ ގުދަންތައް ހިންގޭނީ ކަސްޓަމްސްގެ ފުރިހަމަ ކޮންޓްރޯލް އޮންނަ ސަރަހައްދުތަކުގައި އެކަނި ކަމުގައި ކަނޑައަޅައިފި އެވެ.
މާލޭގެ ގެއެއްގައި ހުރި ބޮންޑެޑް ވެއާހައުސްއަކުން ގިނަ އަދަދެއްގެ ސިނގިރޭޓު ގެއްލުނު މައްސަލައަކާ ގުޅިގެން ހޯމްލޭންޑް ސެކިއުރިޓީ މިނިސްޓަރު އަލީ އިހުސާން އެކްސްގައި ކުރެއްވި ޕޯސްޓެއްގައި ވިދާޅުވީ، ކުރިން ކަން އޮތްގޮތަކީ ސަލާމަތީ ގޮތުންނާއި ކޮންޓްރޯލް ކުރުމުގެ ގޮތުން ވިސްނިޔަސް އެންމެ ރަނގަޅު ގޮތް ނޫން ކަމަށެވެ.
"ސަރުކާރުން ވަނީ ބޮންޑެޑް ވެއާހައުސް ދެން ހިންގޭނީ ހަމައެކަނި ކަސްޓަމްސްގެ ފުލް ކޮންޓްރޯލް އޮންނަ ސަރަހައްދުތަކުގަ އެކަނި ކަމަށް ކަނޑައަޅާ އެ ސިޔާސަތު ތަންފީޒު ކުރަން ފަށާފަ،" އިހުސާން ލިޔުއްވާފައިވެ އެވެ.
މިކަމާ ގުޅިގެން "އަދަދު" ނޫހާ ވާހަކަދައްކަވަމުން އިހުސާން ވިދާޅުވީ ކުރިން އޮތްގޮތުން ކަސްޓަމްސްގެ އޮފީހެއް ހުންނަ ކޮންމެ ރަށެއްގައި ބޮންޑެޑް ވެއާހައުސް ހިންގޭ ކަމަށެވެ. ނަމަވެސް މާލެ ސަރަހައްދުގައި ދެން އެކަން ކުރެވޭނީ ހުޅުލެ އަދި ހުޅުމާލޭގައި ހުންނަ ކަސްޓަމްސްގެ ބިންތަކުގައި ކަމަށްވެސް އޭނާ ވިދާޅުވި އެވެ.
މީގެ ކުރިން އަމިއްލަ މީހުންގެ ގެތަކުގައި ހުންނަ މިފަދަ ގުދަންތައް ހިންގަނީ ވެރިފަރާތަށް އަދި ކަސްޓަމްސްއަށް ވަކި ދެ ތަޅެއް ހަރުކޮށް، ކަސްޓަމްސްގެ ހުއްދަނެތި ނޫނީ ނުހުޅުވޭ ގޮތަށެވެ. ނަމަވެސް މިގޮތަށް ހިންގި ތަންތަނުން ތަކެތި ގެއްލިފައިވެ އެވެ. އެފަދަ މައްސަލަތަކުގައި ކަސްޓަމްސްގެ އޮފިޝަލުން ބައިވެރިވާ ކަމަށްވެސް ތުހުމަތުކުރެވިފައިވެ އެވެ.
މިގޮތުން، މި ނޫހުން މިއަދު ވާނީ މާލޭގެ ގެއެއްގައި ހުރި މިފަދަ ބޮންޑެޑް ވެއާހައުސް އަކުން ގާތްގަނޑަކަށް 34،500 ސިނގިރޭޓު ކާޓޫނު ގެއްލުނު މައްސަލައެއް ރިޕޯޓުކޮށްފަ އެވެ. މީގެތެރޭގައި ރާއްޖޭގައި އާންމުކޮށް ބޭނުންކުރާ ތިން ބްރޭންޑެއްގެ ސިނގިރޭޓު ހިމެނެ އެވެ.
އިހުސާން އެކްސްގައި ކުރެއްވި ޕޯސްޓުގައި ވަނީ މިއީވެސް މިފަދައިން ހިންގި ގުދަނެއް ކަމަށާއި ސިނގިރޭޓު ގެއްލުނު މައްސަލަ ފުލުހުން ބަލަމުންދާ ކަމަށް ވިދާޅުވެފަ އެވެ. އަދި ގެއްލުނު މުދަލަށް ޑިއުޓީ ދެއްކުމަށް ވެރިފަރާތައް އެންގިފައިވާކަމަށްވެސް ވަޒީރު ވިދާޅުވި އެވެ.
ގެއްލުނު ސިނގިރޭޓުތަކަށް އިމްޕޯޓު ޑިއުޓީ އާއި ރެވެނިއު ސްޓޭމްޕުގެ ގޮތުގައި ދައުލަތަށް ދައްކަން ޖެހޭ ފައިސާގެ އަދަދު މަދުވެގެން 60 މިލިއަން ރުފިޔާއަށް އަރާ ކަމަށްވެ އެވެ. މިތަކެތި ގެއްލުނީ ގާނޫނަށް ބަދަލު ގެނެސް ސިނގިރޭޓާއި ދުންފަތުގެ އުފެއްދުންތަކުން ނަގާ އިމްޕޯޓު ޑިއުޓީ ބޮޑުކުރަން ނިންމި ފަހުންނެވެ.
