މެންޗެސްޓާ (ޑިސެމްބަރު 28) - މެންޗެސްޓާ ޔުނައިޓެޑް އަށް ކުޅެމުން އަންނަ އިނގިރޭސި ފޯވާޑް މާކަސް ރެޝްފޯޑް އިޓަލީގެ ކްލަބް ޔުވެންޓަސް އަށް ވިއްކާލަން ޔުނައިޓެޑުން ހުށަހަޅާފައިވާ ކަމަށް މީޑިއާ ރިޕޯޓްތައް ބުނެފި އެވެ.
ޔުނައިޓެޑުން ރެޝްފޯޑް ވިއްކާލަން އުޅޭކަމުގެ ވާހަކަތައް ޔުވެންޓަސްގެ ސްޕޯޓިން ޑިރެކްޓަރު، ކްރިސްޓިއާނޯ ޖިއޯންޓޮލީ ވަނީ ކަށަވަރުކޮށްދީފަ އެވެ.
ރިޕޯޓްތައް ބުނާ ގޮތުން ރަޝްފޯޑް ވިއްކާލަން ޔުނައިޓެޑުން ތައްޔާރުވަނީ 50 މިލިއަން ޑޮލަރު އަށެވެ. އަދި ބަހާލައިގެން ދެ އަހަރުން މި ފީ ދެެއްކުމަށް ފުރުސަތު ދޭން ވެސް ޔުވެންޓަސް އިން ތައްޔާރެވެ.
ރިޕޯޓްތައް ބުނާ ގޮތުން ރެޝްފޯޑް އަކީ ޔުވެންޓަސްގެ ކޯޗު ތިއާގޯ މޮޓާގެ ސިސްޓަމް އަށް ފެތޭ ކުޅުންތެރިއެކެވެ. އަދި އޭނާ އަންނަ ސީޒަނަށް ހަދާ ޕްލޭނުގައި ރަޝްފޯޑް އަކީ މުހިންމު ކުޅުންތެރި އެކެވެ.
ޔުނައިޓެޑުން އެންމެ ފަހުން ކުޅުނު ހަތަރު މެޗުގެ ސްކޮޑަށް ވެސް ރެޝްފޯޑް ނާރަ އެވެ. އެ ޓީމުގެ ކޯޗު ރުބެން އަމޮރިމް ބުނެފައިވަނީ، ޓީމު ދާން ބޭނުންވާ މިސްރާބުގައި ކުރިއަށްދާއިރު، އެއް ވިސްނުމެއްގައި މަސައްކަތް ނުކުރާ ކުޅުންތެރިން އަދި އެންމެ ރަނގަޅަށް ނެތް ކުޅުންތެރިން ޓީމުގައި ނުހިމެނޭނެ ކަމަށެވެ.
ޔުނައިޓެޑްގެ ޔޫތު ޓީމުތަކަށް ކުޅެ، ރެޝްފޯޑް އެންމެ ފުރަތަމަ ސީނިއާ ޓީމަށް މެޗެއް ކުޅެދިނީ، 2016 ވަނަ އަހަރު އެވެ. އޭގެ ފަހުން، ސީނިއާ ޓީމުގައި މި ހޭދަވީ އަށް އަހަރު ތެރޭ އޭނާ ވަނީ އެ ޓީމަށް 426 މެޗުން 138 ގޯލު ޖަހައިފަ އެވެ.
