ޓޫރިޒަމްއާ ގުޅޭ ގޮތުން އަލަށް ގެނެސްފައިވާ ބަދަލުތަކާ އެކު ޓޫރިމަށް އޭގެ ސަބަބުން އަންނާނެ ގޮންޖެހުންތައް ދެނެގަތުމުގެ މަސައްކަތް އެމްއެމްޕީއާރްސީން ކުރަމުންދާ ކަމަށް ޓޫރިޒަމް މިނިސްޓަރު އިބްރާހިމް ފައިސަލް މިއަދު ވިދާޅުވެއްޖެ އެވެ.
ރާއްޖެއަށް ދެ މިލިއަން ވަނަ ފަތުރުވެރިޔާ ޒިޔާރަތް ކުރި ރަސްމިއްޔާތުގައި ބޭއްވި ނޫސްވެރިންގެ ބައްދަލުވުމުގައި "އަދަދު" އިން ކުރި ސުވާލަކަށް ޖަވާބު ދެއްވަމުން ފައިސަލް ވިދާޅުވީ އާ ގަވާއިދުތަކާ އެކު ރާއްޖެ އަންނަ ޓޫރިސްޓުންގެ ނަންބަރުތަކަށް ކުރާނެ އަސަރުތައް އެމްއެމްޕީއާރްސީން ދެނެގަނެ ހައްލުތައް ހޯދޭނެ ކަމަށެވެ.
"އަންނަ އަހަރުގެ މާކެޓިން ޕްލޭން އެކުލަވާލުމުގައި ވެސް އެމްއެމްޕީއާރްސީން ވަރަށް ބޮޑަށް އަލަށް ހެދުނު ގަވާއިދުތަކުގެ ސަބަބުން ދިވެހިރާއްޖެއަށް އަންނަ ފަތުރުވެރިންނަށް ކުރާނީ ކޮން ކަހަލަ އަސަރުތަކެއްތޯ، އެހެންވީމަ ކޮން ގޮތަކަށްތޯ އަޅުގަނޑުމެން އެކަންކަމުގައި މަސައްކަތް ކުރާނީ," މިނިސްޓަރު ވިދާޅުވި އެވެ.
"އެހެންވީމަ އަޅުގަނޑަށް ގަބޫލު ކުރެވެނީ ކޮންމެ ކަމެއް ވެސް ވަރަށް ޕޮޒިޓިވްކޮށް އަޅުގަނޑުމެން އެންމެ ގުޅިގެން ޗެލެންޖެސްތަކަށް ހައްލު ހޯދޭނެ ކަމަށް،"
ފައިސަލް ވިދާޅުވީ ޓޫރިޒަމާ ސީދާ ގުޅުންހުރި ކަންކަމަށް ގަވާއިދުތަކެއް ކަނޑައެޅީ އެ ނޫން ގޮތެއް ނެތުމުން ކަމަށާއި އިލްތިމާސަކީ ޓޫރިޒަމް ދާއިރާގައި ތިބި އެންމެން ވެސް ރައިސް މުއިއްޒު ކުރައްވަމުން ގެންދަވާ މަސައްކަތަށް އެއްބާރުލުން ދެއްވުން ކަމަށެވެ.
"ދެން މި ވަގުތު ދައުލަތަށް ބައެއް ކަންކަމުގައި ވަރަށް ބޮޑަށް ދަތިވެފައި ހުރީމަ އެ ނޫން ގޮތެއް ނެތިގެން ކުރަން ޖެހުނު ބައެއް ކަނަކަން ރައީސުލްޖުމްހޫރިއްޔާ ވަނީ ކޮށްފައި. އަޅުގަނޑުގެ އިލްތިމާސަކީ އިންޑަސްޓްރީން މިހާރު ވެސް ތި ދެއްވާ ގޮތަށް މިއަދުގެ ސަރުކާރަށް ހާއްސަކޮށް ރައީސް ޑރ. މުހައްމަދު މުއިއްޒުއަށް އެއްބާރުލުން ދެއްވުން،" ފައިސަލް ވިދާޅުވި އެވެ.
އެއާޕޯޓުތަކުން ފުރާ ފަސިންޖަރުންގެ އަތުން ނަގާ ފީ އާއި ޓެކުހުގެ ގާނޫނަށް ގެނައި ބަދަލުގެ ދަށުން، މިދިޔަ ޑިސެމްބަރު 1، އިން ފެށިގެން ޑިޕާޗާ ޓެކްސް އާއި އެއާޕޯޓު ޑިވެލޮޕްމަންޓް ފީތައް ވަނީ ބޮޑުވެފަ އެވެ.
ސަރުކާރުން ހުށަހަޅައިގެން މި ގާނޫނު ބަދަލުކުރީ ދައުލަތަށް ލިބޭ ޑޮލަރު އާމްދަނީ މަތިކޮށް، ބޭރު ފައިސާގެ ތާށިކަމަށް ލުޔެއް ހޯދުމުގެ ބޭނުމުގަ އެވެ. މި ބަދަލާއެކީގައި ދައުލަތުގެ ޖުމްލަ އާމްދަނީ ވެސް އިތުރުވެގެން ދާނެ ކަމަށް ފިނޭންސް މިނިސްޓްރީން ލަފާކޮށްފައިވެ އެވެ.
ދައުލަތުގެ އާމްދަނީ އިތުރު ވިޔަސް، އެއާޕޯޓު ފީ އާއި ޓެކުހަށް ގެނައި ބަދަލުތަކާ މެދު ޓޫރިޒަމް ސިނާއަތުގެ ކަންބޮޑުވުން އެބަހުއްޓެވެ. އަންނަ އަހަރުގެ ތެރޭގައި އެ ސިނާއަތާ ގުޅުން ހުރި އެހެން ޓެކްސްތައް ވެސް ބޮޑު ވާތީ، މީގެ ސަބަބުން އަންނަ ޓޫރިސްޓުންގެ އަދަދު މަދުވެދާނެ ކަމުގެ ކަންބޮޑުވުން ވެސް ފާޅުކޮށްފައި ވެ އެވެ.
ޓެކުހާއި ފީތައް އަގު ބޮޑުވާތީ، ބައިނަލްއަގުވާމީ މީޑިއާގެ ސަމާލުކަމަށް ވެސް މިކަން އައިސް، ރާއްޖެ އަންނަން ބޭނުންވާ ޓޫރިސްޓުން ކުރަން ޖެހޭ ހަރަދުތައް ބޮޑުވާ ހަބަރުތައް ލިޔެފައި ވެ އެވެ.
