ގައުމުގެ ތަރައްގީގައި ޒުވާނުން އަދާކުރާ މުހިންމު ދައުރު ފާހަގަކޮށް ދޭ ޔޫތު އެވޯޑު އެކި ފަހަރު މަތިން ބާއްވަން މަސައްކަތް ކުރުމަށް ފަހު އަންނަ އަހަރު ބޭއްވުމަށް ނިންމައިފި އެވެ.
ޔޫތު މިނިސްޓަރު އިބްރާހިމް ވަހީދު "އަދަދު" އަށް ވިދާޅުވީ ޔޫތު އެވޯޑު މި އަހަރު ނުބޭއްވީ ވީހާ ވެސް ގިނަ ބަޔަކު އެކަމުގައި ބައިވެރި ކުރުމަށް ކަމަށާއި ހުރިހާ އެންމެންގެ ބައިވެރިވުމާ އެކު އަންނަ އަހަރު އެވޯޑު ބާއްވާނެ ކަމަށެވެ.
"މިފަހަރު ވީ ގޮތަކީ ވީހާ ވެސް ގިނަ ބަޔަކު އެކަމުގައި ބައިވެރި ކުރަން ވެގެން. ފަހުކޮޅު މިދިޔައީ ވަރަށް ގިނަ އިވެންޓްތަކާ އެއްޗެހި ގޮސްގެން. އެހެންވެގެން ރަނގަޅު ޓައިމަކަށް ސެޓްކޮށްލަން ވެގެން،" މިނިސްޓަރު ވިދާޅުވި އެވެ.
ތަފާތު ދާއިރާތަކުން ގައުމުގެ ތަރައްގީއަށް ޒުވާނުންކުރާ އަގުހުރި މަސައްކަތްތައް ފާހަގަކޮށް ހިތްވަރު ދިނުމުގެ ގޮތުން ދޭ ޔޫތު އެވޯޑު އެންމެ ފުރަތަމަ އޯގަސްޓް 12، ގައި ބޭއްވުމަށް ހަމަޖެއްސި ނަމަވެސް، ފަހުން މުއްދަތެއް ނެތް ގޮތަށް އެވޯޑު ހަފްލާ ފަސްކުރި އެވެ.
ޔޫތު އެވޯޑު ފަސްކުރަން ސަރުކާރުން އެންމެ ފުރަތަމަ ނިންމީ ސަރުކާރުގެ ހަރަދުތައް އިތުރުވުމާ ގުޅިގެން، ހަރަދުތައް ކުޑަ ކުރުމުގެ ގޮތުންނެވެ.
ނަމަވެސް އެ އެވޯޑް ހަފްލާ އޮކްޓޯބަރު 22، ގައި ބާއްވަން ނިންމައި، މާލޭގައި ނެތް މީހުން އޮކްޓޯބަރު 20، ގައި މާލެ އައުމަށް އެންގި އެވެ. ނަމަވެސް އޮކްޓޯބަރު 20، ގައި އެވޯޑު ހަފްލާ ވަނީ ދެވަނަ ފަހަރަށް ފަސްކޮށްފަ އެވެ.
"އަދަދު" އަށް މައުލޫމާތު ދިން މީހަކު ބުނީ އޮކްޓޯބަރު 20، ގެ ހަވީރު ޖަލްސާ ބޭއްވުމަށް ހަމަޖެހިފައި އޮއްވައި، އެ ޖަލްސާ ފަސްކުރިކަން އެންގީ އޮކްޓޯބަރު 20، ގެ ހެނދުނު 11:00 ޖެހިއިރު ކަމަށެވެ.
މި އަހަރު ޔޫތު އެވޯޑުގެ ގޮތުގައި ތަފާތު 17 ދާއިރާއަކުން އިނާމު ދިނުމަށް އޮތީ ކަނޑައަޅާފަ އެވެ.
ޔޫތު އެވޯޑު އެންމެ ފަހުން ދިނީ 2022 ގަ އެވެ. އެފަހަރު 10 ޒުވާނަކަށް އެވޯޑު ދިނެވެ.
