ނެޝަނަލް ސޯޝަލް ޕްރޮޓެކްޝަން އެޖެންސީ (އެންސްޕާ)ގެ އޮފީސް އިމާރާތް ބަދަލު ކުރަން އަގުބޮޑުކޮށް އޮފީސް އިމާރާތެއް ކުއްޔަށް ހިފި މައްސަލަ އެމަނިކުފާނާ ހިސާބަށް އަދި ނާންނަ ކަމަށް ރައީސް ޑރ. މުހައްމަދު މުއިއްޒު އިއްޔެ ވިދާޅުވި އެވެ.
އެޗްޑީސީގެ ހިޔާނާތުގެ މައްސަލަތައް ގޯހުން ގޯހަށް ދިޔުމުގެ ޒިންމާ ރައީސް ޑރ. މުހައްމަދު މުއިއްޒު ނަންގަވަންޖެހޭ ބުނެ ފާޑުކިޔުން އަމާޒުވެފައި ވަނިކޮށް، އެ މަނިކުފާނު ބައެއް މީޑިއާތަކާ ވާހަކަ ދައްކަވަމުން ވިދާޅުވީ އެންސްޕާގެ މައްސަލަ ލިބިފައި ނެތް ކަމަށެވެ.
ސަރުކާރާ އެއްކީލި ބައެއް މީޑިއާތަކަށް ދައުވަތު ދީގެން ރައީސް އޮފީސް ކައިރިއަށް މިއަދު މެންދުރު ފަހު ގެންދިޔަ އެވެ. އެ މަނިކުފާނު އޮފީސް ނިންމެވުމަށް ފަހު މީޑިއާތަކާ ވާހަކަ ދައްކަވާކަން އެނގިގެން އަދަދު ނޫހުން އެ ސަރަހައްދަށް ގޮސް ކުރި ސުވާލުގެ ޖަވާބުގައި ވިދާޅުވީ އެއްވެސް ތަނެއްގައި ކޮރަޕްޝަންގެ ކަމެއް ހިނގާނަމަ އެކަން ބަލަން ޖެހޭނެ ކަމަށާއި ގަވާއިދާ ހިލާފަށް .ބަޔަކު ކަމެއް ކުރާނަމަ ފިޔަވަޅު އަޅަން ޖެހޭނެ ކަމަށެވެ.
"އަޅުގަނޑާ ހަމައަށް އެކަމުގެ [އެންސްޕާގެ] އެއްވެސް މައުލޫމާތެއް އަދި ނާދޭ އެނގޭތޯ. އަޅުގަނޑާ ހަމައަށް ލިބިއްޖެއްޔާ އަޅުގަނޑު ހަމަ ކަމާބެހޭ ފަރާތްތަކަށް ދެންމެގަ ވެސް މިދެންނެވި ފަދައިން ހުށަހަޅާނަން،" ރައީސް ވިދާޅުވި އެވެ.
އެންސްޕާއަށް ރައްދުވާ ކޮރަޕްޝަނުގެ މައްސަލައަކީ ރައީސް ޑރ. މުހައްމަދު މުއިއްޒާ ގުޅުން އޮތް އެމްއެމްޓީވީ ހިންގަން އެ އެޖެންސީއަށް އޮފީހެއް ބޮޑު އަގުގައި ކުއްޔަށް ދިން މައްސަލަ އެވެ.
