ގެދޮރުވެރިޔާ ސްކީމުގެ ފްލެޓު ލިސްޓު އަލުން އިއުލާނު ކުރާއިރު، ފްލެޓު ކަށަވަރުކޮށް ދޭނެ ކަމަށް ބުނެ ފައިސާ ނަގަމުންދާކަން އެނގިއްޖެ އެވެ.
މި ޖަރީމާގެ އަޑީގައި ތިބީ ހުޅުމާލޭން ގޯއްޗާއި ބިމާއި ވިނަރެސް ފްލެޓުތައް ވިއްކުމުގައި ވެސް އުޅޭ މީހުންނެވެ.
އެ މައުލޫމާތު އެނގޭ މީހަކު "އަދަދު" ނޫހަށް ކިޔައިދިން ގޮތުގައި، މިހާރު ނިމިފައިވާ ގެދޮރުވެރިޔާ ސްކީމުގެ ފްލެޓުތަކާއި އެ ސްކީމުގެ ދަށުން އިމާރާތް ކުރުން މިހާރު ވެސް ކުރިއަށްދާ ފްލެޓުތައް ލިބޭ 4000 މީހުންގެ އާ ލިސްޓެއް އިއުލާނު ކުރާނެ އެވެ.
"އެ ލިސްޓުގައި ނަން ހިމެނުމަށް ހަމައެކަނި ޝަރުތަކީ ގެދޮރުވެރިޔާ ޕޯޓަލް މެދުވެރިކޮށް ފްލެޓަށް ހުށަހަޅާފައިވުން. ފްލެޓު ކަށަވަރުކުރަން ފުރަތަމަ ދޭންޖެހެނީ 35،000ރ.،" އަދަދު ނޫހާ ވާހަކަ ދެއްކި މީހާ ބުންޏެވެ.
ހުޅުމާލޭ ފޭސް 2 ގައި ތަރައްގީކުރާ 3 ކޮޓަރީގެ އެ ފްލެޓުތަކަށް 20،697 އަށްވުރެ ގިނަ ފޯމު ހުށަހަޅާފައިވެ އެވެ. އެ ސްކީމުގެ ފުރަތަމަ 4000 ފްލެޓު ލިބޭ މީހުންގެ ލިސްޓު ކުރީގެ ސަރުކާރުން ގެޒެޓުކުރި އެވެ. ނަމަވެސް އެއް އަހަރަށް ވުރެ ގިނަ ދުވަސް ވޭތުވެދިޔަ ދިޔައިރު އެ ފްލެޓުތައް ހަވާލު ނުކޮށް ހިފަހައްޓާފައި ވަނީ ލިސްޓުގައި މައްސަލަތައް އުޅޭ ކަމަށް ތުހުމަތުކޮށްފަ އެވެ.
ގެދޮރުވެރިޔާ ސްކީމުގެ 4000 ފްލެޓު ވިއްކަމުންދާ ކަމަށް، ވެލިދޫ ދާއިރާގެ މެންބަރު މުހައްމަދު އައްބާސް ވެސް އެކްސްގައި ވިދާޅުވެފައިވެ އެވެ.
"ކުރީގެ ސަރުކާރުން ދޫކުރަން ނިންމަފައިވާ 4000 ފުލެޓްގެ ތެރެއިން ގިނަ ފުލެޓްތަކެއް 50،000 ގެ ރޭޓުން އެޑްވާންސްއަށް 20،000 ނަގާފައި، ފުލެޓް ލިސްޓު ނެރުނީމަ ބާކީ 30،000 ދޭ ގޮތަށް ފުލެޓް ކޮމެޓިގައި ތިއްބެވި ބޭފުޅުން ފުލެޓްތައް ބަދަލު ކުރަމުން ދަނީ،" އޭނާ ވިދާޅުވި އެވެ.
ޕީއެންސީ އަށް ނިސްބަތްވާ ރައްޔިތުންގެ މަޖިލީހުގެ މެންބަރުން މި ވާހަކަ ތަކުރާރުކޮށް ވެރިންނަށް ދަންނަވައިފި ކަމަށާއި ނަމަވެސް ދެއްވީ ބީރު ކަންފަތެއް ކަމަށް އައްބާސް ވިދާޅުވި އެވެ.
ކުރީގެ ރައީސް އިބްރާހިމް މުހައްމަދު ސޯލިހުގެ ސަރުކާރުން ފެށި ގެދޮރުވެރިޔާ ސްކީމުގެ ދަށުން މިހާރު ނިންމަމުންދާ 4،000 ފްލެޓު ލިބޭ މީހުންގެ ލިސްޓު އާންމުކޮށް، މި އަހަރު ނިމުމުގެ ކުރިން އެ ފްލެޓްތައް ހަވާލުކޮށް ނިންމާނެ ކަމަށް ހައުސިން މިނިސްޓަރު ޑރ. އަލީ ހައިދަރު އަހުމަދު ވިދާޅުވެފައި ވިޔަސް، މިހާރު ވަނީ މުއްދަތެއް ނެތް ގޮތަށް އެކަން ފަސްކޮށްފަ އެވެ.
ހުޅުމާލޭ ދެ ވަނަ ފިޔަވަހީގައި އިމާރާތްކޮށްފައިވާ ވިނަރެސް ފްލެޓުތަކުން ނުވިކި ހުރި 100 އަށް ވުރެ ގިނަ ފްލެޓު، އާންމުކޮށް ހުޅުވާ ނުލައި، ސިޔާސީ ގޮތުން ބާރުގަދަ ފަރާތްތަކާއި، ރިޝްވަތުގެ ގޮތުގައި ފައިސާ ނަގައިގެން ވިއްކަމުންދާ ކަމަށް ވަނީ އެނގިފަ އެވެ.
