ބިންވެރިޔާ ސްކީމުގެ ދަށުން ގޯތި ލިބޭ މީހުންގެ ލިސްޓުގައި ޝަރުތުހަމަނުވާ ކަމަށް އޮތުމުން، އޭރުގެ ހައުސިން މިނިސްޓްރީގެ ސްޓޭޓް މިނިސްޓަރު އަކްރަމް ކަމާލުއްދީނާ ބައްދަލުކުރި ކަމަށް، އެޗްޑިސީގެ އެމްޑީ އިބްރާހިމް ފަޒުލް ރަޝީދުގެ ބޭބެ އިބްރާހިމް ފަޒީލް ރަޝީދު ވިދާޅުވެ ހެއްދެވީ ދޮގެއް ކަމަށް އަކްރަމް ވިދާޅުވެއްޖެ އެވެ.
ސޯޝަލް މީޑިއާގައި ކުރެއްވި ޕޯސްޓެއްގައި އަކްރަމް ވިދާޅުވީ، އޭނާ ފަޒީލް އާ ދުވަހަކު ވެސް ބައްދަލުވެފައި ނުވާ ކަމަށާއި އެއްވެސް މުއުމަލާތެއް ވެސް ނުކުރާ ކަމަށެވެ. އަދި، އެއްވެސް ކަމެއްގައި އޭނާއާ ބައްދަލުކުރަން ފަޒީލް އެދިފައިނުވާ ކަމަށްވެސް އަކްރަމް ވިދާޅުވި އެވެ.
ގޯތީގެ މައްސަލާގައި ފަޒީލް ގެންގުޅޭ ވަގު ލިޔުމަކީ ކުރީގެ ސަރުކާރުން ދިން ލިޔުމެއް ކަމަށާއި އެ ލިޔުން ލިބުނީ އަކްރަމް އާ ބައްދަލުކޮށް ޝަކުވާ ކުރުމަށްފަހު ކަމަށް ފަޒީލް ބުނިކަން ހާމަކުރީ މި މައްސަލާގައި ފުލުހުން ރޭ ބޭއްވި ނޫސްވެރިންގެ ބައްދަލުވުމެއްގަ އެވެ.
ފަޒީލް އަކީ މި މައްސަލަ ފެންމަތިވި ފަހުން ކޯޓު އަމުރެއްގެ ދަށުން ޕާސްޕޯޓު ހިފަހައްޓާފައިވާ 20 މީހުންގެ ތެރޭގައި ވެސް ހިމެނޭ މީހެކެވެ. އޭގެ ތެރޭގައި އަކްރަމު ނުހިމެނެ އެވެ. ފުލުހުން ރޭ ބުނީ މި މައްސަލާގައި މިހާތަނަށް އެއްވެސް މީހަކަށް ތުހުމަތު ނުކުރެވޭ ކަމަށެވެ.
އަކްރަމްގެ ޕޯސްޓުގައި އިތުރަށް ވިދާޅުވެފައިވަނީ، ބިންވެރިޔާ އަދި ގެދޮރުވެރިޔާ ސްކީމްގެ ދަށުން އެއްވެސް ލިޔުމެއް އުސޫލުން ބޭރުން ނުވަތަ ގަވާއިދާ ހިލާފަށް ނުވަތަ ނުރަސްމީކޮށް އެއްވެސް ފަރާތަކަށް ކުރީގެ ހައުސިން މިނިސްޓްރީން ދޫކޮށްފައި ނުވާނެކަމަށެވެ.
"އެގްރީމަންޓެއް ކަމަށް ދެއްކުމަށް ޓަކައި ތައްޔާރުކޮށްފައިވާ ޑޮކިއުމަންޓަކާ މެދު ސުވާލު އުފެދުމުން ވެސް، އެ ޑޮކިއުމަންޓްގެ ސައްހަކަން ކަށަވަރުކުރުމަށް ފޮރެންސިކް ތަހުލީލެއް ވެސް ނުހަދައި، ކުރީ ސަރުކާރުން ދޫކުރި ލިޔުމެއްގެ ގޮތުގައި އެވާހަކަ ދެއްކީ ރައްޔިތުންނަށް ހަގީގަތް އޮޅުވާލުމަށް ކަމަށް ދެކެން،" އަކްރަމް ލިޔުއްވާފައިވެ އެވެ.
ވަގު ލިޔުންތަކެއް ތައްޔާރުކޮށް ވަގަށް ގޯތިތަކެއް ވިއްކި ކަމަށް ތުހުމަތުކުރެވޭ މައްސަލަ ފުލުހުންގެ އިތުރުން އެންޓީ ކޮރަޕްޝަން ކޮމިޝަން (އޭސީސީ) އިން ވެސް އަންނަނީ ތަހުގީގު ކުރަމުންނެވެ. މި މައްސަލަ ފެންމަތިވި ފަހުން ޗެއާމަން ފިޔަވާ އެޗްޑީސީގެ ބޯޑުގެ ހުރިހާ މެންބަރުންނާއި ހައުސިން މިނިސްޓްރީގެ ބައެއް މުވައްޒަފުން ވަނީ ސަސްޕެންޑުކޮށްފަ އެވެ.
