ދިވެހި ޔޫތު ލީގުގެ 16 އަހަރުން ދަށުގެ ކެޓަގަރީގައި، ސުޕަ ޔުނައިޓެޑް ސްޕޯޓްސް (ސަސް) އާއި މާޒިޔާ ސްޕޯޓްސް އެންޑް ރެކްރިއޭޝަން ކުޅުނު މެޗުތައް ކާމިޔާބުކޮށްފި އެވެ.
މި މުބާރާތުގައި އިއްޔެ ދެ މެޗު ކުޅެފައިވާއިރު, ފުރަތަމަ މެޗުގައި ސަސް އިން ކްލަބް އީގަލްސްގެ މައްޗަށް ކުރިހޯދީ 4-0 ގެ ނަތީޖާ އަކުންނެވެ.
މި މެޗުގެ ފުރަތަމަ ހާފު އެއްވަރުވެގެން ނިމުނުއިރު, ދެވަނަ ހާފު ފަށައިގެން ހަތްވަނަ މިނެޓުގައި ސަސްގެ އަހުމަދު އަފްނާން އަލީ ވަނީ ގޯލު ޖަހާ އެ ޓީމަށް ލީޑު ނަގާދީފަ އެވެ. އަދި އޭގެ ދެ މިނެޓު ފަހުން އަފްނާން ވަނީ އިތުރު ގޯލެއް ޖަހާ ލީޑު ފުޅާކޮށްފަ އެވެ. ސަސްގެ ތިން ވަނަ ލަނޑު މެޗުގެ 62 ވަނަ މިނެޓުގައި އެ ޓީމަށް ކާމިޔާބު ކޮށްދިނީ ލޫތު ބިން ހުސެއިން އެވެ. އަދި މެޗު ނިމެން މިނެޓަކަށްވެފައި ހުއްޓަ ސަސްގެ ފަހު ގޯލު އެ ޓީމަށް ކާމިޔާބުކޮށްދިނީ އަބްދުالله އައިދާން ސާޖިދު އެވެ.
މީގެ އިތުރުން ރޭ މާޒިޔާ އިން ހުއްރިޔާ ސްޕޯޓްސް ކްލަބްގެ މައްޗަށް ކުރިހޯދީ 2-1 ގެ ނަތީޖާ އަކުންނެވެ.
މި މެޗުގެ ވަރަށް ކުރީކޮޅު މާޒިޔާ އިން ވަނީ ލީޑު ނަގައިފަ އެވެ. މެޗުގެ ހަ ވަނަ މިނެޓުގައި މާޒިޔާ އަށް ލީޑު ނަގާދިނީ ލޫތު ޖެހި ގޯލުންނެވެ. އެކަމަކު، ފުރަތަމަ ހާފު ނިމެން ދެ މިނެޓަށްވެފައި ހުއްޓައި ހުއްރިއްޔާގެ އަލީ ސިޒާން އަހުމަދު ގޯލު ޖަހާ ނަތީޖާ ހަމަހަމަކުރި އެވެ. މި މެޗުން މާޒިޔާ މޮޅުކޮށްދިން ގޯލު މެޗުގެ 67 ވަނަ މިނެޓުގައި އެ ޓީމަށް ޖަހާދިނީ މުހައްމަދު ލާމިހް އެވެ.
