ނައިންޓީ ޕްލަސް ގޯލްޑް ކަޕްގެ ކުއާޓާ ފައިނަލުގެ ފުރަތަމަ މެޗުގައި، ޅ. ނައިފަރު އަތުން 5-0 އިން ތަފާތު ބޮޑު މޮޅެއް ހޯދައި ބ. އޭދަފުށިން ސެމީ ފައިނަލުގެ ފުރަތަމަ ޖާގަ ކަށަވަރުކޮށްފި އެވެ.
މި މެޗަށް ނުކުތްއިރު، އޭދަފުށްޓަށް ލިބިފައި އޮތް އެންމެ ބޮޑު ހިތްހަަމަޖެހުމަކީ، އެ ޓީމުގެ ލިސްޓުގައި ހިމަނާފައިވާ ގައުމީ ޓީމުގެ ތިން ކުޅުންތެރިން ކަމަށްވާ ހައިޝަމް ހަސަން (ބިޑި)، އަލީ ފާސިރު (ސެންޓޭ) އަދި ހަމްޒާ މުހައްމަދު (ހަމްޕު) އަށް މާޒިޔާ ސްޕޯޓްސް އެންޑް ރެކްރިއޭޝަން އިން ރިލީސްދީފައި އޮތުމެވެ. ހައިޝަމް އާއި ސެންޓޭ ފުރަތަމަ އެގާރައިގައި ކުޅުނުއިރު، ހަމްޕު ކުޅެން އެރީ ފަހު 25 ވަރަކަށް މިނިޓަށެވެ.
ގަލޮޅު ދަނޑުގައި އޭދަފުށީގެ ގިނަ ސަޕޯޓަރުންގެ ކުރިމަތީގައި ކުޅުނު މި މެޗުގައި، އޭދަފުށިން ވަނީ ފުރަތަމަ 25 މިނިޓް ތެރޭ ތިން ގޯލު ޖަހައިފަ އެެވެ. މި މެޗުގައި އޭދަފުށިން ލީޑުނެގީ ނައިފަރުގެ އިބްރާހިމް ވިޝާމް އަތުން ބައިކޮޅަށް ވަން ގޯލުންނެވެ. މިއީ، އޭދަފުށީގެ އައިހަމް ނެގި ހިލޭޖެހުމެއްގައި ވިޝާމް ބޮލުން ޖައްސާލި ބޯޅައެއް ބައިކޮޅަށް ވަން ގޯލެކެވެ.
އޭގެ ފަހުން، މުހައްމަދު ފާސިރު (ފާއްޓޭ) ދިން ބޯޅައަކުން، އޭދަފުށީގެ ސެންޓޭ ވަނީ ނައިފަރުގެ ކީޕަރު، އަބްދުﷲ މުހައްމަދު ކައިރިން ނައްޓާފައި އެ ޓީމުގެ ދެ ވަނަ ގޯލު ޖަހައިފަ އެވެ. އޭގެ އިރުކޮޅެއް ކުރިން، ސެންޓޭ އަށް ކުރި ފައުލަކަށް ދިން ޕެނަލްޓީން ހައިޝަމް ފޮނުވާލި ބޯޅަ ކީޕަރު އަބްދުﷲ ވަނީ މަތަކޮށްފަ އެވެ.
އޭދަފުށީގެ ތިން ވަނަ ލަނޑު ޖެހީ އޭރިއާބޭރުން ފޮނުވާލި ބޯޅައަކުން، އައިހަމް ޖެހި ގޯލެކެވެ.
ނައިފަރަށް ލަނޑެއް ޖަހައިދޭން ފުރަތަމަ ހާފުގައި، މަޖުދާން ސޯލިހަށް ލިބުނު ފުރުސަތެއްގައި އޭރިއާތެރެއިން ފޮނުވާލި ބޯޅަ ދިޔައީ ހުރަސްދަނޑިމަތިންނެވެ.
ދެ ވަނަ ހާފުގައި، މެޗުގެ 65 ވަަނަ މިނިޓްގައި، އޭދަފުށިން ހަތަރު ވަނަ ގޯލު ޖެހީ، އިޝާން އިބްރާހިމް (ސައްޓު) ދިން ބޯޅައަކުން ހަނި އޭންގަލަކުން ގޯލަށް ވައްދާލައިގެން ފާއްޓޭ އެވެ. އޭގެ ފަސް މިނިޓް ފަހުން، އައިހަމް ނެގި ހުރަހަކުން ސައްޓު ވަނީ ބޮލުން ގޯލަށް ބޯޅަ ފޮނުވާލައި، އޭދަފުށީގެ ފަސް ވަނަ ގޯލު ޖަހައިފަ އެވެ.
ސެމީ ފައިނަލުގައި އޭދަފުށި ކުޅެން ޖެހޭނީ ކުއާޓާ ފައިނަލުގައި މާލެ ސިޓީ އާއި ކ. ގުރައިދޫ ކުޅެގެން މޮޅުވާ ޓީމަކާ އެވެ.
