މާލީ ހާލަތު ގޯސްވެގެން ގައުމުތަކުގެ ވެރިންނަށް ރައީސް ފޮނުއްވި ސިޓީތައް ސިއްރުކޮށްފި

މި އަހަރު މެދުތެރޭ ރާއްޖޭގެ މާލީ ހާލަތު އެންމެ ގޯސްވި ދަނޑިވަޅުގައި، އޭރުގެ ފޮރިން މިނިސްޓަރު އަތަށް ދެއްވާ ރައީސް ޑރ. މުހައްމަދު މުއިއްޒު ގައުމުތަކުގެ ވެރިންނަށް ފޮނުއްވި ސިޓީތައް ސަރުކާރުން ސިއްރުކޮށްފި އެވެ.

ދިވެހި ހާރިޖިއްޔާއިން އާންމުކުރި މައުލޫމާތުތަކުން އެނގޭ ގޮތުގައި އޭރު ހާރިޖީ ވަޒީރުގެ ގޮތުގައި ހުންނެވި މިހާރުގެ ފިނޭންސް މިނިސްޓަރު މޫސާ ޒަމީރު އަތަށް ދެއްވާ ރައީސް މުއިއްޒު ވަނީ ހަތަރު ގައުމެއްގެ ވެރިންނަށް ޖުމްލަ ފަސް ސިޓީއެއް ފޮނުވާފަ އެވެ.

މި ސިޓީތައް ފޮނުވި ދެތިން މަސް ވެގެންދިޔައީ މި ފަހުގެ ތާރީހެއްގައި މާލީ ގޮތުން ރާއްޖެއަށް ދިމާވި އެންމެ ދަތި އެއް ދުވަސްވަރަށެވެ. އެގޮތުން އެމްއެމްއޭގެ ބޭނުންކުރެވޭ ރިޒާވު ރެކޯޑު އަދަދުތަކުން ދަށަށް ދިޔުމާއި ޑޮލަރުގެ ބޮޑެތި ތާށިތަކެއް ކުރިމަތިވުމާއި ކްރެޑިޓް ރޭޓިން އެޖެންސީ ރާއްޖޭގެ ރޭޓިން ދަށް ކުރީ ވެސް މި ދެތިން މަހުގެ ތެރޭގަ އެވެ.

ރައީސް ސިޓީ ފޮނުއްވި ވެރިން

• ޗައިނާގެ ރައީސް ޝީ ޖިންޕިން (ޖުލައި 22، 2024)
• ބަހުރެއިންގެ ރަސްގެފާނު ހަމަދު ބިން އިސާ އަލް-ހަލީފާ (12 އޮގަސްޓު، 2024)
• ސައުދީ ވަލީއަހުދު އަދި ބޮޑު ވަޒީރު މުހައްމަދު ބިން ސަލްމާން ބިން އަބްދުލްއަޒީޒު (އޮގަސްޓު 19، 2024)
• ޔޫއޭއީގެ ވަލީއަހުދު ޝެއިހް މުހައްމަދު ބިން ޒައިދް އަލް ނަހްޔަން (ސެޕްޓެމްބަރު 4، 2024)

އޭގެތެރެއިން، ޗައިނާގެ ރައީސަށް ވަނީ ދެ ސިޓީއެއް ފޮނުއްވާފަ އެވެ. ޒަމީރު ކުރެއްވި ރަސްމީ ދަތުރުތަކުގެ ތެރެއިން ސިޓީތައް ހަވާލުކުރެއްވީ އެ ގައުމުތަކުގެ ހާރިޖީ ވަޒީރުން ނުވަތަ ސަރުކާރުގެ އިސް އެހެން އޮފިޝަލުންނާ އެވެ.

މި ސިޓީތަކުގައިވާ މައުލޫމާތު ހޯދުމަށް، މައުލޫމާތު ހޯދާ ލިބިގަތުމުގެ ހައްގުގެ ގާނޫނުގެ ދަށުން މި ނޫހުން ރައީސް އޮފީހުގައި އެދުނީ ސެޕްޓެމްބަރު މަހުގެ ކުރީކޮޅު އެވެ.

ވަކިވަކިން ހުށަހެޅި ހަތަރު އާރުޓީއައި އަށްވެސް ރައީސް އޮފީހުން ދިން ޖަވާބަކީ، ރާއްޖެއިން ބޭރުގެ އެކިއެކި ފަރާތްތަކާ އެކު ބަދަލުކުރާ ސިޓީތަކަކީ ގާނޫނުގެ ދަށުން ސިއްރެއް ކަމަށެވެ.

މި މައުލޫމާތު ސިއްރުކޮށް ރައީސް އޮފީހުން ރިއާޔަތް ކުރީ އާރުޓީއައި ގާނޫނުގެ 31 ވަނަ މާއްދާއަށެވެ. އެއީ ސަރުކާރުގެ ސިޔާސަތު ކަނޑައެޅުމާއި ހިންގުމަށް ހުރަސްއެޅިފާނެ ފަދަ މައުލޫމާތު ސިއްރުކުރުމަށް އިސްތިސްނާ ހާލަތު ދޭ މާއްދާ އެވެ. ނަމަވެސް ގާނޫނުގައި ބުނާ އާންމު މަސްލަހަތު އިސްކުރުމުގެ މާއްދާއަށް ރިއާޔަތްކޮށް މި ނޫހުން މިހާރު ވާނީ ރައީސް އޮފީހުގެ ނިންމުން މުރާޖައާ ކުރުމަށް އެދިފަ އެވެ.

މި ސަރުކާރުން ހާމަކުރި ސިޓީ

ރާއްޖެއިން އެހެން ގައުމުތަކަށް ފޮނުވާ ސިޓީތަކަކީ ސިއްރެއް ކަމަށް ރައީސް އޮފީހުން ބުނި ނަމަވެސް މި ސަރުކާރުގެ ކުރީކޮޅު، ކުރީގެ ރައީސް އިބްރާހިމް މުހައްމަދު ސޯލިހު ބޭރު ގައުމެއްގެ ވެރިޔަކަށް ފޮނުއްވި ސިޓީއެއް ވަނީ ހާމަކޮށްފަ އެވެ.

މޮރިޝަސްގެ ބޮޑުވަޒީރަށް ސޯލިހު ފޮނުއްވި ސިޓީގެ ކޮޕީއެއް ޑިސެމްބަރު 19، 2023 ގައި ހާމަކުރީ ރައީސް އޮފީހުން ނެރުނު ބަޔާނަކާއެކު އެވެ.

ރައީސް މުއިއްޒު ސަރުކާރުން މި ސިޓީ ހާމަކުރީ، އިދިކޮޅުގައި ތިއްބަވައިގެން މިއީ ރާއްޖޭގެ ދެކުނުން އޮންނަ ޗާގޯސް މޮރިޝަސް އަށް 'ދިނުމަށާއި' އެކަމާ ގުޅިގެން ދެކުނުގެ ކަނޑުން ބައެއް 'ގެއްލުވާލަން' ނުވަތަ 'ވިއްކާލަން' އެއްބަސްވި ސިޓީ ކަމަށް ތަކުރާރުކޮށް ބުނުމަށްފަހު އެވެ.

ނަމަވެސް އާންމުކުރި ސިޓީގައި އެފަދަ ވާހަކައެއް ނެތެވެ. އެ ސިޓީގައި ވާގޮތުން ކަނޑުގެ ސަރަހައްދުގެ މައްސަލާގައި ރާއްޖެއިން އެންމެ ކުރީއްސުރެ ގެންގުޅެފައިވާ ސްޓޭންޑު ދަމަހައްޓާނެ ކަމަށް ރައީސް ސޯލިހު ވިދާޅުވެފައިވެ އެވެ. އެގޮތުން ސިޓީގައި ރައީސް ވިދާޅުވެފައިވަނީ ކަނޑުގެ މައްސަލާގައި ރާއްޖޭގެ ސްޓޭންޑު ބަދަލުނުވާނެ ކަމަށެވެ.