ބަހުރެއިންގެ ރަސްގެފާނު ހަމަދު ބިން އިސާ އަލް-ހަލީފާއަށް ރައީސް ޑރ. މުހައްމަދު މުއިއްޒު ހާއްސަ ސިޓީއެއް ފޮނުއްވައިފި އެވެ.
މި ސިޓީ ރަސްގެފާނަށް އެރުވުމަށް ހަވާލުކުރެއްވީ ފޮރިން މިނިސްޓަރު މޫސާ ޒަމީރެވެ. އެ ގައުމުގެ ފަރާތުން މި ސިޓީއާ ހަވާލުވެވަޑައިގެންނެވީ ރަސްގެފާނުގެ ދޮށީ ދަރިކަލުން އެ ގައުމުގެ ބޮޑުވަޒީރު ވަލީއަހުދު ސަލްމާން ބިން ހަމަދު އަލް-ހަލީފާ އެވެ.
އެ ދެ ބޭފުޅުން މިއަދު ބައްދަލުކުރެއްވިއިރު ދެ ގައުމުގެ މެދުގައި އޮތް ގާތް ގުޅުން އިތުރަށް ބަދަހި ކުރުމާ ގުޅޭގޮތުން މަޝްވަރާ ކުރެއްވި ކަމަށް ޒަމީރު އެކްސްގައި ވިދާޅުވެފައިވެ އެވެ.
މި މަހުގެ 15 ގެ ނިޔަލަށް ޒަމީރު ކުރައްވަމުން ގެންދަވާ ދަތުރުގެ ތެރެއިން ބަހުރެއިންގެ ފިނޭންސް އެންޑް ނޭޝަނަލް އިކޮނޮމީ މިނިސްޓަރާއި، އޮއިލް އެންޑް އެންވަޔަރަންމަންޓް މިނިސްޓަރު އަދި ޓޫރިޒަމް މިނިސްޓަރާ ވެސް ބައްދަލު ކުރައްވައި، އެ ދާއިރާތަކުން ގުޅުން ބަދަހި ކުރުމާ ގުޅޭ ގޮތުން މަޝްވަރާ ކުރައްވާނެ ކަމަށް ފޮރިން މިނިސްޓްރީން ބުނެފައިވެ އެވެ.
ބަހުރެއިނަށް ޒަމީރު ކުރައްވަމުން ގެންދަވާ ދަތުރަކީ އެ ގައުމުގެ ފޮރިން މިނިސްޓަރު އަބްދުއްލަތީފް ބިން ރާޝިދު ޒަޔާނީގެ ދައުވަތަކަށް ކުރައްވަމުން ގެންދަވާ ދަތުރެކެވެ.
