މި ސަރުކާރުން ފަށާފައިވާ ކަމަށް ބުނާ މާލީ އިސްލާހީ ފިޔަވަޅުތައް ޗައިނާގެ ސަރުކާރުގެ އިސް ވަފުދަކާ އެ ގައުމަށް މިހާރު ރަސްމީ ދަތުރެއްގައި ވަޑައިގެން އުޅުއްވާ ދިވެހި ވަޒީރުންގެ ވަފުދުން ހިއްސާކޮށްފި އެވެ.
ޗައިނާއަށް ވަޑައިގެންނެވި ވަޒީރުންގެ ވަފުދުގައި ހިމެނެނީ ފޮރިން މިނިސްޓަރު މޫސާ ޒަމީރު، ފިނޭންސް މިނިސްޓަރު ޑރ. މުހައްމަދު ޝަފީގު، އަދި އިންފްރާސްޓްރަކްޗާ މިނިސްޓަރު ޑރ. އަބްދުالله މުއްތަލިބު އެވެ.
މި ދަތުރުގެ ތެރެއިން ފޮރިން މިނިސްޓަރު ޒަމީރު، ޗައިނާގެ ފޮރިން މިނިސްޓަރު ވަންގް ޔީ އާ މިއަދު ވަނީ ބައްދަލުކުރައްވާފަ އެވެ.
ދެ ގައުމުގެ ދެމެދު ރަސްމީ މަޝްވަރާތައް ކުރި މި ބައްދަލުވުމާ ގުޅޭގޮތުން ދިވެހި ހާރިޖިއްޔާއިން ބުނީ، އެ ބައްދަލުވުމުގައި ރައީސް ޑރ. މުހައްމަދު މުއިއްޒު، ޗައިނާގެ ރައީސް ޝީ ޖިންޕިން އަށް ފޮނުއްވި ދެ ސިޓީއެއް ޗައިނާގެ ފޮރިން މިނިސްޓަރަށް ރައްދު ކޮށްދެއްވާފައިވާ ކަމަށެވެ.
އަދި، މި ބައްދަލުވުމުގައި ރައީސް މުއިއްޒު އިއުލާނުކުރައްވާފައިވާ މާލީ އިސްލާހުތައް ހިއްސާކުރައްވާ، އެކަންކަމަށް ޗައިނާއިން އެހީތެރިކަން ފޯރުކޮށްދޭނެ ކަމަށް އުންމީދުކުރައްވާ ކަމަށް ފޮރިން މިނިސްޓަރު ވަނީ ވިދާޅުވެފަ އެވެ.
ރާއްޖޭގެ މާލީ ހާލަތު ގޯސްވެ މިދިޔަ މަހު ރައީސް އިއުލާނުކުރެއްވި މާލީ ފިޔަވަޅުތަކުގެ ތެރޭގައި ސިޔާސީ މުވައްޒަފުންގެ އަދަދު މަދުކުރުމާއި ބޮޑެތި ހަފުލާތައް ނުބޭއްވުން ހިމެނެ އެވެ. އޭގެ އިތުރުންވެސް ގިނަ ފިޔަވަޅުތަކެއް އަޅުއްވާނެ ކަމަށް އެމަނިކުފާނު ވިދާޅުވި އެވެ.
މި ފިޔަވަޅުތަކުގެ އިތުރު ތަފުސީލެއް ސަރުކާރުން ހާމަކޮށްފައި ނުވާއިރު، ސިޔާސީ މަގާމުތައް މަދުކުރުމުގެ ފިޔަވަޅާ ހިލާފަށް ސަރުކާރުގެ އެކި ވުޒާރާތަކުން ދަނީ އަދިވެސް މަގާމުތަކަށް މީހުން އައްޔަންކުރަމުންނެވެ.
