ލަންޑަން (ޑިސެމްބަރު 18) - އިނގިރޭސި ފުޓްބޯޅަ ސީޒަން ފަށަން ކުޅޭ ޗެރިޓީ ޝީލްޑް ދެ ފަހަރު ހޯދާފައިވާތީ، އޭނާ އާސެނަލްގައި ހޯދި ޓްރޮފީގެ އަދަދަކީ ތިނެއް ކަމަށް އާސެނަލްގެ ކޯޗު މިކޭލް އާޓެޓާ ބުނެފި އެވެ.
އާސެނަލްގެ ކޯޗުކަމާ 2019 ވަނަ އަަހަރު ހަވާލުވި އާޓެޓާ އެ ކްލަބާ އެކު، އެ ސީޒަނުގައި އެފްއޭ ކަޕްގެ ޗެމްޕިއަންކަން ހޯދި އެވެ. މިދިޔަ އަހަރުތަކުގައި ލީގަށް ވާދަކުރި އާސެނަލަށް އެ ކާމިޔާބީ ހާސިލްނުވިއިރު، އެ ޓީމުން މުބާރާތެއް ކާމިޔާބު ނުކުރާތީ އާޓެޓާ އަށް ވެސް އޮތީ ޕްރެޝަރު ބޮޑުވެފަ އެވެ.
އިނގިރޭސި ލީގު ކަޕްގެ ކުއާޓާ ފައިނަލުގައި މިރޭ ކްރިސްޓަލް ޕެލަސްއާ ދެކޮޅަށް އާސެނަލް ކުޅޭ މެޗުގެ ކުރިން، އާސެނަލްގައި އާޓެޓާ ހޭދަވި ފަސް އަހަރު ތެރޭ ލިބުނު ކާމިޔާބީ އަކީ އެންމެ ޓްރޮފީއެއް ކަމަށް ބުނުމުން އޭނާ ވަނީ އެ އަށް ރައްދެއްދީފަ އެވެ.
"އަހަރެމެން ޗެރިޓީ ޝީލްޑް ދެ ފަހަރު ހޯދިން، އެހެންވީމަ އެވީ ތިން ޓްރޮފީ،" އާޓެޓާ ބުންޏެވެ.
"އަހަރެމެން ބޭނުން ތި ބުނާ ބޮޑު ޓްރޮފީތައް ވެސް އެ މަސައްކަތް މި ކުރަނީ، މި ޓީމު ކުރިއަރާ މިންވަރު އަހަންނަށް ފެނޭ، ކާމިޔާބީއާ ގާތަށް އެބަދެވޭ، އެ ހާސިލްކުރުން ދެން، އޮތީ،"
އާސެނަލާ އެކު، އާޓެޓާ ވަނީ 2020 އާއި 2023 ވަނަ އަހަރުގެ ޗެރިޓީ ޝީލްޑް ހޯދައިފަ އެވެ.
އާޓެޓާ ބުނީ، ބޮޑެތި މުބާރާތްތަކުގައި ކާމިޔާބު ހޯދުމުގެ މަސައްކަތުގައި ކުރިއަށްދާއިރު، ލީގު ކަޕް ފަދަ މުބާރާތެއް ހޯދުމަކީ ވެސް ޓީމުގެ ވިސްނުމާއި ކޮންފިޑެންސަށް ގިނަ ބަދަލުތަކެއް އަންނާނެ ކަމެއް ކަމަށެވެ. އެހެންކަމުން، ލީގު ކަޕްގައި ކާމިޔާބު ހޯދަން ހާއްސަ އަޒުމެއްގައި، މަސައްކަތް ކުރާ ކަމަށާއި މެޗުތަކުގައި ބޭނުންކުރާނީ އެެ އިރެއްގައި އެންމެ ފޯމުގައި ތިބި 11 ކުޅުންތެރިން ކަމަށް ވެސް އާޓެޓާ ވަނީ ބުނެފަ އެވެ.
