މެންޗެސްޓާ (ޑިސެމްބަރު 18) - މެންޗެސްޓާ ޔުނައިޓެޑްގެ ޑިފެންޑަރު ހެރީ މެގުއާ ކޮންޓްރެކްޓް އެ ޓީމުން އާ ކުރާނެ ކަމުގެ ޔަގީންކަން އެބައޮތް ކަމަށް ބުނެފި އެވެ.
ޔުނައިޓެޑުން މެގުއާއާ އެކު ހަދާފައިވާ ކޮންޓްރެކްޓް މި ސީޒަނުގެ ނިޔަލަށް ހަމަވާނެ އެވެ. މީގެ ކުރިން ރިޕޯޓްތައް ބުނާ ގޮތުން މެގުއާއާ އެކު ޔުނައިޓެޑުން ހަދާފައިވާ އެއްބަސްވުން އާ ނުކުރާނެ ކަމަށް ބެލެވުނެވެ. އެކަމަކު، މެގުއާ ވަނީ މި ފަހުން ކޮންޓްރެކްޓް އާ ކުރަން ޔުނައިޓެޑާއެކު ވާހަކަ ދައްކާކަމަށް ހާމަކޮށްފަ އެވެ.
ދާދި ފަހުން، އިނގިރޭސި މީޑިއާ އަކަށް މެގުއާ ދިން އިންޓަވިއުއެއްގައި ބުނީ ކޮންޓްރެކްޓް އާ ކުރުމަށް ޔުނައިޓެޑާއެކު ވާހަކަ ދައްކަމުން އަންނަ ކަމަށެވެ. އަދި ޔުނައިޓެޑާ އެކު މިހާތަނަށް ކުރެވުނު މަޝްވަރާތައް ކާމިޔާބު ކަމަށްވެސް މެގުއާ ވަނީ ބުނެފަ އެވެ.
"އަހަރެން އަށް ފުރިހަމަ ޔަގީންކަން އެބައޮތް ޔުނައިޓެޑުން އަހަރެންގެ ކޮންޓްރެކްޓް އާކުރާނެ ކަމުގެ. މިހާރު މިދަނީ އެކަމާ ވާހަކަ ދައްކަމުން" މެގުއާ ބުންޏެވެ.
ކުރިން ޔުނައިޓެޑްގެ ކެޕްޓަންކުރި މެގުއާ އަށް އެ ޓީމުގެ ފުރަތަމަ އެގާރައިން ފުރުސަތު ގެއްލުނީ ޔުނައިޓެޑްގެ ކޯޗުކަމާ އެރިކް ޓެން ހާގް ހަވާލުވި ފަހުންނެވެ. އެކަމަކު އެ ފަހަރުތަކުގައި ވެސް އިންގްލަންޑް ގައުމީ ޓީމުގެ ސްކޮޑުން މެގުއާ އަށް ޖާގަ ލިބުނެވެ.
ޔުނައިޓެޑްގެ މިހާރުގެ ކޯޗު ރުބެން އަމޮރިމް ވެސް ވަނީ މި ފަހުން މެގުއާ އަށް އިތުބާރު އެބައޮތް ކަމަށް ބުނެފަ އެވެ.
މީގެ ފަސް ވަރަކަށް އަހަރު ކުރިން، 2019 ވަނަ އަހަރު ލެސްޓާ ސިޓީ އިން 93 މިލިއަން ޑޮލަރަށް، ދުނިޔޭގެ އެންމެ އަގުބޮޑު ޑިފެންޑަރުގެ ގޮތުގައި ޔުނައިޓެޑާ ގުޅުނު މެގުއާ ދޫކޮށްލަން މިދިޔަ ދެ ސީޒަނުގައި ވެސް ޔުނައިޓެޑުން މަސައްކަތް ކުރި އެވެ.
