ލަންޑަން (ސެޕްޓެމްބަރު 17) - ޗެލްސީ އަށް ކުޅެމުން އަންނަ ޔޫކްރެއިންގެ ތަރި، މިހައިލޯ މުޑްރިކް، މަނާބޭހަކަށް ޕޮޒިޓިވްވެ، ވަގުތީ ގޮތުން ސަސްޕެންޑްކޮށްފި އެވެ.
އިނގިރޭސި އެފްއޭ އިން މިދިޔަ އޮގަސްޓް މަހުގައި ނެގި ރުޓީން ޓެސްޓެއްގައި، މުޑްރިކް، 23، ގެ ސާމްޕަލް ވަނީ މަނާބޭހަކަށް ޕޮޒިޓިވްވެފަ އެވެ. އެހެންވެ، އިނގިރޭސި އެފްއޭ އިން ނިންމާފައިވަނީ، އިތުރު ސާމްޕަލެއް ނެގުމަށް ފަހު، އިތުރަށް ކަންކަން ބެލުމަށެވެ. އެ ގޮތުން، ދެ ވަނަ ސާމްޕަލްގެ ޓެސްޓްތައް ނިމެންދެން މުޑްރިކް މި ވަގުތު ހުރީ އިނގިރޭސި އެފްއޭ އިން ދިން ސަސްޕެންޝަނެއްގަ އެވެ.
ޗެލްސީން ނެރުނު ބަޔާނެއްގައި ބުނެފައިވަނީ، މުޑްރިކްގެ ކަންކަން އެ ކްލަބްގެ ސަމާލުކަމަށް އައިސްފައިވާ ކަމަށާއި އިނގިރޭސި އެފްއޭއާ އެކު މި ކަމުގެ ވާހަކަތައް ދައްކަމުން އަންނަ ކަމަށެވެ.
ޔޫކްރެއިން ގައުމީ ޓީމުގެ ތަރި، މުޑްރިކް، އޭނާގެ އިންސްޓަގްރާމްގައި ކުރި ޕޯސްޓެއްގައި ބުނެފައިވަނީ، މިއީ އޭނާ އަށް ލިބުނު ޝޮކެއް ކަމަށާއި އެއްވެސް ސިފައެއްގައި މަނާބޭހެއް ބޭނުންކޮށްފައިނުވާނެ ކަމަށެވެ. އަދި އުންމީދަކީ ދެ ވަނަ ސާމްޕަލުން ކަންކަން ސާފުވެގެން ގޮސް ވީ އެންމެ އަވަހަށް ކުޅުމަށް އެނބުރި އައުމަށް ކަމަށް މުޑްރިކް ބުނެފައިވެ އެވެ.
މުޑްރިކް، އެންމެ ފަހުން މެޗެއްގައި ކުޅެފައިވަނީ، މިދިޔަ މަހުގެ 28 ވަނަ ދުވަހު އެވެ. ޗެލްސީން މި މަހު އެއް ވަނަ ދުވަހު އެސްޓަން ވިލާއާ ކުޅުނު މެޗުގެ ސްކޮޑުގައި މުޑްރިކް ހިމެނުނު ނަމަވެސް އޭނާ ކުޅެން އަރާފައިނުވެ އެވެ.
މީގެ އެއް އަހަރު ކުރިން، އާސެނަލްގެ ޑީލެއް ހައިޖެކްކުރުމަށް ފަހު، ޗެލްސީން މުޑްރިކްގެ ސޮއި ހޯދީ ޔޫކްރެއިންގެ ޝަހުތަރު ޑޮނެސްކަށް 100 މިލިއަން ޑޮލަރު ދައްކައިފަ އެވެ. ޗެލްސީ އަށް ކުޅުނު 73 މެޗުން މުޑްރިކަށް ޖެހުނީ އެންމެ 10 ގޯލެވެ.
