ނައިންޓީ ޕްލަސް ގޯލްޑް ކަޕްގެ ދެ ވަނަ ބުރުގެ ގްރޫޕް ސްޓޭޖުގައި ކުޅުނު ފަހު މެޗުން 3-1 އިން މާލެ ސިޓީ ބަލިކޮށް ރ. އަލިފުށިން ގްރޫޕްގެ އެއް ވަނަ ޓީމުގެ ގޮތުގައި ކުއާޓާ ފައިނަލަށް ދަތުރުކޮށްފި އެވެ.
މި މެޗަކީ އިއްޔެ ހަވީރު ކުޅުމަށް އެންމެ ފުރަތަމަ ތާވަލުކުރި މެޗެކެވެ. އެއީ، މި ގްރޫޕްގައި، ޅ. ކުރެންދޫ 1-0 އިން މާލެ މޮޅުވި މެޗުގައި، މާލެ ޓީމުގައި އެހެން ރަށެއްގެ ރަޖިސްޓްރީގައި ހިމެނޭ ދެ ކުޅުންތެރިއަކު ކުޅުވާފައިވާތީ، އެ މައްސަލަ ބަލަން ކުރެންދޫން ހުށަހަޅާފައިވާތީ އެވެ.
ކުރެންދޫން، ގޯލްޑް ކަޕް އިންތިޒާމްކުރާ ނައިންޓީ ޕްލަސް އަށް މައްސަލަ ހުށަހެޅިއިރު، ފާހަގަކޮށްފައިވަނީ މާލެ ސިޓީ ޓީމުގެ އަހުމަދު މާއިޝް ރަޝީދު (މާއި) އާއި އަހުމަދު ނާހިލް އިބްރާހިމް އަކީ ދ. ހުޅުދެލީގެ ރަޖިސްޓަރީގައި އޮތް ދެ ކުޅުންތެރިން ކަމަށެވެ. ކުރެންދޫން ވަނީ އެކަމުގެ ހެކި ވެސް ހުށަހަޅައިފަ އެވެ. އެއީ، ކުރެންދޫ އާއި މާލެ ކުޅުނު މެޗާ ހަމައަށް، މާއި އާއި ނާހިލްގެ ރަޖިސްޓްރީ އޮތީ ހުޅުދެލީ އިރުވާގޭގަ އެވެ. އެ މައްސަލަ ބެލުމަށް ފަހު، ގޯލްޑް ކަޕްގެ ކޮމިޓީން ނިންމީ މާލޭގެ ކުޅުންތެރިންގެ ކަންކަން އޮތީ ރަނގަޅަށް ކަމަށެވެ.
ގަލޮޅު ދަނޑުގައި މިއަދު ހަވީރު ކުޅުނު މެޗުގައި މާލެ ސިޓީން ލީޑުނެގި އެވެ. މިއީ ކޯނަރަކުން އޭރިއާ ތެރެއަށް ހުރަސްވި ބޯޅައެއްގައި ތަޖުރިބާކާރު ޑިފެންޑަރު، އަލީ ޝަރީފް (އައްޔަ) ބޮލުން ޖެހި ގޯލެކެވެ. މާލެ ސިޓީ އަށް ދެ ވަނަ ލަނޑެއް ޖަހައިދޭން އެ ޓީމުގެ މިސްރު މިޑްފީލްޑަރު، ހަލީލް ޖަމާލް ފޮނުވާލި ޕެނަލްޓީ އަލިފުށީ ކީޕަރު، އަބްދުއްސައްދާދު އާދަމް ވަނީ މަތަކޮށްފަ އެވެ. މިއީ، އޭރިއާތެރެއިން އަލިފުށީގެ ކެޕްޓަން، މުހައްމަދު ރަޝީދު (ހޮކޭ) މާލެ ސިޓީގެ އަލީ ޝިޔާހު (ޝިޔަޅޭ) އަށް ކުރި ފައުލަކަށް ދިން ޕެނަލްޓީއެކެވެ.
އަލިފުށްޓަށް އެއްވަރުކޮށްދީނީ އެ ޓީމުގެ ހޮކޭ ހިލޭ ޖެހުމަކުން ކާމިޔާބުކުރި ގޯލަކުންނެވެ.
ދެ ވަނަ ހާފު ފެށުނުތަނާ މާލެ ސިޓީގެ ޑިފެންޑަރު، ހުސެއިން ފަޔާޒް (ފަޔާ) އަށް ވަނީ ދެ ވަނަ ރީނދޫ ކާޑާ އެކު ރަތް ކާޑެއް ދައްކައިފަ އެވެ. ދެ ވަނަ ހާުފުގެ ބޮޑުބައިގައި މާލެ ސިޓީ އަށް ކުޅުންތެރިއަކު މަދުކޮށް ކުޅެން ޖެހުމުގެ ފައިދާ އަލިފުށިން ނެގި އެވެ.
އަލިފުށިން ލީޑުނެގީ އޭރިއާތެރެއިން ލިބުނު ފުރުސަތެއްގައި، އިބްރާހިމް ސަލާމް ޖެހި ގޯލަކުންނެވެ. އަދި އަލިފުށީގެ ތިން ވަނަ ލަނޑު ޖެހީ އެ ޓީމުގެ ފޯވާޑް، އަހުމަދު ހުސާމް (ހުސާންކޮ) އެވެ. އޭނާ އަށް ލިބުނު ބޯޅަ ގޯލަށް ފޮނުވާލި މާލެ ސިޓީ ޓީމުގެ ކީޕަރު، ހަސަން ތޮލާލް (ޓޮޕްލަކް) ކައިރިން ނައްޓާލުމަށް ފަހު އެވެ.
ގޯލްޑް ކަޕްގެ ކުއާޓާ ފައިނަލް މެޗުތައް:
ބ. އޭދަފުށި - ޅ. ނައިފަރު
ކ. ގުރައިދޫ - މާލެ ސިޓީ
ރ. އަލިފުށި - ފުވައްމުލަކު ސިޓީ
އައްޑޫ ސިޓީ - ކ. މާފުށި
