ހަންގޭރީގައި މިހާރު ކުރިއަށްދާ ވޯލްޑް އެކުއަޓިކްސް ސްވިމިން ޗެމްޕިއަންޝިޕްގައި ގައުމީ ސްވިމިން ޓީމުގެ ހަމްނާ އަހުމަދު، އެއް އިވެންޓަކުން ގައުމީ ރެކޯޑް ދެ ވަނަ ފަހަރަށް އާ ކޮށްފި އެވެ.
މިހާތަނަށް މި ފަހަރުގެ ވޯލްޑް އެކުއަޓިކްސް މުބާރާތުގައި ރާއްޖޭގެ ފެތުންތެރިން ހަ ފަހަރަށް ގައުމީ ރެކޯޑް ވަނީ އާ ކޮށްފަ އެވެ. އޭގެ ތެރެއިން، ތިން ރެކޯޑެއް އާ ކުރީ ހަމްނާ އެވެ.
އެ ގޮތުން، ހަމްނާ އެންމެ ފުރަތަމަ އާ ކުރީ، އަންހެނުންގެ ޝޯޓްކޯސް 100 މީޓަރު ބްރެސްޓްސްޓްރޯކް އިވެންޓުގެ ގައުމީ ރެކޯޑް އެވެ. ޙަމްނާ އެ ރެކޯޑް އާ ކުރީ، 01:20.69 ނިންމައިގެންނެވެ. މި އިވެންޓުގެ ގައުމީ ރެކޯޑް އެންމެ ފަހުން އާކޮށްފައިވަނީ ވެސް ޙަމްނާ އެވެ. އެއީ، މިދިޔަ މަހު ހަންގޭރީގައި ބޭއްވުނު އެ ޤައުމުގެ 20 ވަނަ ނެޝަނަލް ޝޯޓްޓްރެކް ޗެމްޕިއަންޝިޕް ގައި 01:22.65 އިން ރޭސް ފުރިހަމަ ކޮށްގެންނެވެ.
އޭގެ ފަހުން، އަންހެނުންގެ ޝޯޓްކޯސް 50 މީޓަރު ބްރެސްޓްސްޓްރޯކް އިވެންޓުގެ ގައުމީ ރެކޯޑް ޙަމްނާ ވަނީ ދެ ފަހަރެއްގެ މަތިން އާ ކޮށްފަ އެވެ. ހަމްނާ މި ރެކޯޑް މި މުބާރާތުގައި ފުރަތަމަ އާ ކުރީ، 100 މީޓަރު ބްރެސްޓްސްޓްރޯކު އިވެންޓުގެ ފުރަތަމަ 50 މީޓަރު 00:36.84 އިން ނިންމައިގެންނެވެ. އޭގެ ފަހުން، ހަމްނާ މިރެކޯޑު އާކޮށްފައިވަނީ 00:36.55 އިން ރޭހެއް ނިންމައިގެންނެވެ.
ދެން، މި ފަހަރުގެ ވޯލްޑް އެކުއަޓިކްސް މުބާރާތުގައި ގައުމީ ރެކޯޑް ހަދާފައިވަނީ، މުހައްމަދު އާން ހުސެއިން ދެ ރެކޯޑާއި ރިހާން ޝިހާމް އެއް ރެކޯޑް އެވެ.
އެ ގޮތުން، އާން، ފިރިހެނުންގެ ޝޯޓްކޯސް 100 މީޓަރު ފްރީސްޓައިލް އިވެންޓުގެ ޤައުމީ ރެކޯޑް އާކޮށްފައިވަނީ 00:52.29 އިން ރޭސް ނިންމައިގެންނެވެ. މި އިވެންޓުގެ ޤައުމީ ރެކޯޑް އެންމެ ފަހުން އާކޮށްފައިވަނީ ވެސް އާން އެވެ. އެއީ، މިދިޔަ މަހު ހަންގޭރީގައި ބޭއްވުނު އެ ޤައުމުގެ 20 ވަނަ ނެޝަނަލް ޝޯޓްޓް ރެކް ޗެމްޕިއަންޝިޕް ގައި 00:53.45 އިން ރޭސް ފުރިހަމަ ކޮށްގެންނެވެ.
އާން ވަނީ، ފިރިހެނުންގެ ޝޯޓްކޯސް 50 މީޓަރު ފްރީސްޓައިލް އިވެންޓުގެ ޤައުމީ ރެކޯޑް ވެސް އާކޮށްފަ އެވެ. އާން، މި ރެކޯޑް އާކޮށްފައިވަނީ 00:23.35 އިން ރޭސް ނިންމައިގެންނެވެ. މި އިވެންޓުގެ ގައުމީ ރެކޯޑް އެންމެ ފަހުން އާކޮށްފައިވަނީވެސް އާން އެވެ. އެއީ، މިދިޔަ މަހު ހަންގޭރީގައި ބޭއްވުނު އެ ގައުމުގެ 20 ވަނަ ނެޝަނަލް ޝޯޓް ޓްރެކް ޗެމްޕިއަންޝިޕް ގައި 00:23.76 އިން ރޭސް ފުރިހަމަ ކޮށްގެންނެވެ.
މި ފަހަރުގެ ވޯލްޑް އެކުއަޓިކްސްގައި، ފިރިހެނުންގެ ޝޯޓްކޯސް 200 މީޓަރު ބަޓަފްލައި އިވެންޓުގެ ގައުމީ ރެކޯޑް ރިޙާން އާކޮށްފައިވަނީ 02:17.93 އިން ރޭސް ނިންމައިގެންނެވެ. މި އިވެންޓުގެ ޤައުމީ ރެކޯޑް އެންމެ ފަހުން އާކޮށްފައިވަނީ ވެސް ރިޙާން އެވެ. އެއީ، މިދިޔަ އޮކްޓޫބަރު މަހު ބޭއްވުނު އޭޝިއަން އޯޕަން ސްކޫލްސް އިންވިޓޭޝަނަލް (އޭއޯއެސްއައި) ޝޯޓްކޯސް (25 މީޓަރު) އޭޖް ގްރޫޕް ސްވިމިންް ޗެމްޕިއަންޝިޕްސްގައި ވާދަކޮށް 02:21.75 އިން ރޭސް ފުރިހަމަކޮށްގެންނެވެ.
