އިބްރާހިމް ވަހީދު ހަސަން (އިއްބެ)ގެ ގޯލުތަކާ އެކު، 7-2 އިން ޅ. ނައިފަރު ބަލިކޮށް ނައިންޓީ ޕްލަސް ގޯލްޑް ކަޕްގެ ކުއާޓާ ފައިނަލުން އައްޑޫ ސިޓީ ޖާގަ ހޯދައިފި އެވެ.
މި ގްރޫޕްގެ ފުރަތަމަ މެޗުގައި، އައްޑޫ ވަނީ ދ. މީދޫއާ 3-3 އިން އެއްވަރުވެފަ އެވެ. ދެ ވަނަ މެޗުން، މީދޫގެ މައްޗަށް 2-0 އިން ކުރިހޯދައި، ނައިފަރުން ވަނީ ކުއާޓާ ފައިނަލުން ޖާގަ ޔަގީންކޮށްފަ އެވެ. ނައިފަރުން މިރޭ ބޮޑު ތަފާތަކުން އައްޑޫ ސިޓީ ބަލިކުރިނަމަ، މީދޫ އަށް ކުއާޓާ ފައިނަލުން ފުރުސަތު އޮތެވެ. އެކަމަކު، އައްޑޫ ނުކުތީ ވަރަށް ވަރުގަދަ ރޫހަކާ އެކު، އެވެ.
އައްޑޫން ގްރޫޕްގެ އެއް ވަނަ ހޯދީ ހަތަރު ޕޮއިންޓާ އެކު އެވެ. ނައިފަރަށް ދެ ވަނަ ލިބުނީ ތިން ޕޮއިންޓުންނެވެ. މި ގްރޫޕުން ކެޓި މީދޫ އަށް އެއް ޕޮއިންޓް ލިބުނެވެ.
ގަލޮޅު ދަނޑުގައި މިރޭ ކުޅުނު މެޗުގައި އައްޑޫ ޓީމުގެ ތަރި އަކީ އިއްބެ އެވެ. ކޮންމެ ޓީމަކަށް ވެސް ބޭރުން ދެ ކުޅުންތެރިން ލިސްޓުގައި ހިމަނަން ލިބޭ ފުރުސަތުގައި އައްޑޫން ޖެހީ އިއްބެގެ ނަމެވެ. އިއްބެ ވަނީ ކުޅުނު ކޮންމެ މެޗެއްގައި އައްޑޫ އަށް ތަފާތު ދައްކައިދީފަ އެވެ. އައްޑޫން ފަހަތުން އަރައި މޮޅުވި މެޗުގައި، ނައިފަރު ކޮޅަށް އިއްބެ ޖެހި ހަތަރު ގޯލުގެ ތެރޭގައި އިންޑިވިޖުއަލީ މޮޅު ގޯލުގެ އިތުރުން ޓީމު ގޯލުތައް ވެސް ހިމެނެ އެވެ.
އައްޑޫގެ އަނެއް ތިން ގޯލު ޖެހީ، އިބްރާހިމް މަހުދީ ހުސެއިން (ފޭދޫ އިއްބެ)، އިސްމާއިލް އީސާ (މެސީ) އާއި ހާޒިމް ފައުޒީ (ހަތީ) އެވެ.
މި މެޗުގައި ނައިފަރު ޓީމުގެ ގޯލުތައް ޖެހީ، މެޗުގެ ފުރަަތަމަ ގޯލު ޖެހި، ޒުވާން ގައުމީ ޓީމުގެ ފޯވާޑް، މުހައްމަދު އިޒާން އަލީ އެވެ. އަނެއް ލަނޑު ޖެހީ ނައިފަރުގެ ކެޕްޓަނެއްގެ ގޮތުގައި މި ފަހަރު ފެންނަ ފުރަތަމަ ޑިވިޝަނުގައި ކްލަބް އީގަލްސް އާއި ކްލަބް ވެލެންސިއާ އަދި ދެ ވަނަ ޑިވިޝަނުގައި ވިކްޓަރީން ފެނުނު ހުސެއިން ފައިސަލް (ފައިޓޯ) އެވެ.
ގޯލްޑް ކަޕްގެ ކުއާޓާ ފައިނަލްގެ އަށް ޖާގައިގެ ތެރެއިން، ހަ ޖާގައެއް މި ވަނީ ޔަގީންވެފަ އެވެ. އެއީ، ގުރުއަތުލައިގެން ކުއާޓާ އަށް ދިޔަ ފުވައްމުލައް ސިޓީ އާއި އައްޑޫ ސިޓީގެ އިތުރުން ޅ. ނައިފަރު، ކ. ގުރައިދޫ، ކ. މާފުށި އަދި ބ. އޭދަފުށްޓެވެ.
