ނައިންޓީ ޕްލަސް ގޯލްޑް ކަޕް ފުޓްބޯޅަ މުބާރާތުގެ ދެ ވަނަ ގްރޫޕް ސްޓޭޖުގައި ހުރިހާ ގޮތަކުން އެއްވަރުވި، ތ. ތިމަރަފުށްޓާއި ފުވައްމުލަކު ސިޓީގެ މެދުގައި ލި ގުރުއަތުލުން ކާމިޔާބުކޮށް، ފުވައްމުލަކުން ގްރޫޕްގެ ދެ ވަނަ ހޯދައި ކުއާޓާ ފައިނަލަށް ދަތުރުކޮށްފި އެވެ.

މި ގްރޫޕްގައި ކުޅުނު ފުރަތަމަ މެޗުން ފުވައްމުލަކާއި ތިމަރަފުށި ވަނީ 1-1 އިން އެއްވަރުވެފަ އެވެ. ދެ ވަނަ މެޗުން ތިމަރަފުށި އަތުން 1-0 އިން މޮޅުވެ، ރޭގެ މެޗަށް ނުކުުތްއިރު ވެސް ގުރައިދޫ އަށް އޮތީ ކުއާޓާ ފައިނަލުގެ ޖާގަ ލިބިފަ އެވެ.

ގުރައިދޫން ފުވައްމުލައް 1-0 ބަލިކޮށް ގްރޫޕްގެ އެއް ވަނަ ކަށަވަރުކުރިއިރު، މި ގްރޫޕުގެ ދެ ވަނަ ޓީމު ކަނޑަ އެޅީ މިއަދު ހަވީރު ދަނޑުގައި ބޭއްވި ގުރުއަތުލުމަކުންނެވެ. ގުރުއަތުލާން ޖެހުނީ، ފުވައްމުލަކާއި ތިމަރަފުށި ހުރިހާ ގޮތަކުން އެއްވަރުވުމުންނެވެ.

މިއާ އެކު، ގޯލްޑް ކަޕްގެ ކުއާޓާ ފައިނަލްގެ އަށް ޖާގައިގެ ތެރެއިން، ފަސް ޖާގައެއް މި ވަނީ ޔަގީންވެފަ އެވެ. އެއީ، ފުވައްމުލަކުގެ އިތުރުން ޅ. ނައިފަރު، ކ. ގުރައިދޫ، ކ. މާފުށި އަދި ބ. އޭދަފުށްޓެވެ.

އަލިފުށްޓާއި މާލެ ސިޓީ ކުޅޭ މެޗު ފަސްކޮށްފި؛ މާލެ ސިޓީގެ މައްސަލައެއް ބަލަނީ!

ގޯލްޑް ކަޕްގައި މިއަދު ހަވީރު ކުޅެން އޮތް މާލެ ސިޓީ އާއި ރ. އަލިފުށި ބައްދަލުކުރަން އޮތް މެޗު ވަނީ ފަސްކޮށްފަ އެވެ. އެއީ، މި ގްރޫޕްގައި، ޅ. ކުރެންދޫ 1-0 އިން މާލެ މޮޅުވި މެޗުގައި، މާލެ ޓީމުގައި އެހެން ރަށެއްގެ ރަޖިސްޓްރީގައި ހިމެނޭ ދެ ކުޅުންތެރިއަކު ކުޅުވާފައިވާތީ، އެ މައްސަލަ ބަލަން ކުރެންދޫން ހުށަހަޅާފައިވާތީ އެވެ.

ކުރެންދޫން، ގޯލްޑް ކަޕް އިންތިޒާމްކުރާ ނައިންޓީ ޕްލަސް އަށް މައްސަލަ ހުށަހެޅިއިރު، ފާހަގަކޮށްފައިވަނީ މާލެ ސިޓީ ޓީމުގެ އަހުމަދު މާއިޝް ރަޝީދު (މާއި) އާއި އަހުމަދު ނާހިލް އިބްރާހިމް އަކީ ދ. ހުޅުދެލީގެ ރަޖިސްޓަރީގައި އޮތް ދެ ކުޅުންތެރިން ކަމަށެވެ. ކުރެންދޫން ވަނީ އެކަމުގެ ހެކި ވެސް ހުށަހަޅައިފަ އެވެ. އެއީ، ކުރެންދޫ އާއި މާލެ ކުޅުނު މެޗާ ހަމައަށް، މާއި އާއި ނާހިލްގެ ރަޖިސްޓްރީ އޮތީ ހުޅުދެލީ އިރުވާގޭގަ އެވެ.

މި މައްސަލައިގައި ކުރެންދޫ އަށް އަދި ރަސްމީ ޖަވާބެއް ލިބިފައިނުވާއިރު، މި ގްރޫޕްގެ މިއަދުގެ މެޗުގައި އަލިފުށިން މާލެ ސިޓީއާ ދެކޮޅަށް ކުޅެން ނުކުތުމުގެ ކުރިން އަލި އަޅުވާލީ މެޗަށް އެ ޓީމުން ތައްޔާރުވާންވީ ހާލަތެއް ސާފުނުވާތީ އެވެ.