މެޑްރިޑް (ޑިސެމްބަރު 15) - ސްޕެނިޝް ލީގުގައި ރޭ ރަޔޯ ވަޔެކާނޯ އިން 3-3 އިން އެއްވަރުކޮށް، ރެއާލް މެޑްރިޑުން ލީގުގެ އެއް ވަަނަ އަށް އެރިޔަ ނުދީ ހުއްޓުވައިފި އެވެ.
ރޭގެ މެޗުން މޮޅުވެގެން ރެއާލަށް ލީގުގެ އެއް ވަނަ އަށް އަރަން ފުރުސަތު އޮތެވެ. އެކަމަކު، އެއްވަރުވެ، ދެ ޕޮއިންޓް ގެއްލުމުން ރެއާލް އޮތީ ދެ ވަނައިގަ އެވެ. އެއް ވަނައިގައި އޮތް ބާސެލޯނާ އަށް 17 މެޗުން 38 ޕޮއިންޓް ލިބިފައިވާއިރު، ދެ ވަނައިގައި އޮތް ރެއާލަށް 17 މެޗުން ލިބިފައިވަނީ 37 ޕޮއިންޓެވެ.
ވަޔެކާނޯ ދަނޑުގައި ކުޅުނު މެޗުގެ ހަތަރު ވަނަ މިިނިޓްގައި އުނާއީ ލޮޕޭޒް ވަނީ އެ ޓީމަށް ލީޑުނަގައިދީފަ އެވެ. މެޗުގެ 36 ވަނަ މިނިޓްގައި އަބްދުލް މޫމިން ވަނީ ވަޔެކާނޯގެ ލީޑުފުޅާކޮށްދީފަ އެވެ.
މެޗުގައި ވަޔެކާނޯ އިން ދެ ވަނަ ގޯލު ޖެހިތާ ތިން މިނިޓް ފަހުން ރެއާލުން ފުރަތަމަ ގޯލު ޖެހި އެވެ. މި ލަނޑު ޖެހީ 39 ވަނަ މިނިޓްގައި ފެޑެެރީކޯ ވަލްވޭޑޭ އެވެ. މިއީ އޭރިއާބޭރުން ފޮނުވާލި ބޯޅައަކުން ވަލްވޭޑޭ ޖެހި ގޯލެކެވެ.
އަދި ފުރަތަމަ ހާފުގެ ފަހު މިނިޓްގައި ޖޫޑް ބެލިންހަމް ވަނީ ލަނޑު ޖަހައި ރެއާލަށް އެއްވަރުކޮށްދީފަ އެެވެ. މިއީ ލީގުގައި ބެލިންހަމް ޖެހިޖެހިގެން ލަނޑު ޖެހި ހަ ވަަނަ މެޗެވެ. މިއީ، 2016 ވަނަ އަހަރު ކަރިމް ބެންޒެމާ އަށް ފަހު ލީގުގައި ޖެހިޖެހިގެން ރެއާލްގެ ކުޅުންތެރިއަކު ހަ މެޗުގައި ލަނޑު ޖެހި ފުރަތަމަ ފަހަރެވެ.
އަނިޔާގެ ސަބަބުން ކީލިއަން އެމްބާޕޭ ނުލައި ރެއާލުން ކުޅުނު މި މެޗުގައި، އެ ޓީމަށް ދެ ވަނަ ހާފުގައި ލީޑުނަގައިދިނީ ރޮޑްރީގޯ އެވެ. އެކަމަކު، ވަޔެކާނޯގެ އިސީ ޕަލާޒޯން ވަނީ ލަނޑެއް ޖަހައި އެއްވަރުކޮށްދީފަ އެެވެ.
