މިދިޔަ އަންގާރަ ދުވަހު ޕަބްލިކް ސާވިސް މީޑިއާ (ޕީއެސްއެމް) ބްރޯޑްކާސްޓުކުރި އިނގިރޭސި ހަބަރު ސެގްމަންޓުގައި ބަރަހަނާ މަންޒަރެއް ދެއްކިގެން އެ ކުންފުނިން މައާފަށް އެދި، އިހުމާލުވި ދެ މުވައްޒަފަކު ސަސްޕެންޑު ކޮށްފި އެވެ.
ޕީއެސްއެމްއިން ނެރުނު ނޫސް ބަޔާނެއްގައި ބުނީ ދެއްކުނު މަންޒަރަކީ ކުންފުނީގެ ކޮންޓެންޓް ޕޮލިސީ އާއި އެޑިޓޯރިއަލް ޕޮލިސީއާ ހިލާފު ސީރިއަސް މައްސަލައެއް ކަމަށެވެ.
"މި މައްސަލައިގައި ކަން ހިނގާދިޔަ ގޮތް ބެލުމަށްފަހު، މި މައްސަލައިގައި އިހުމާލުވި ދެ މުވައްޒަފަކު ސަސްޕެންޑުކޮށް، އެ މުވައްޒަފުންގެ މައްސަލަ މިހާރު ވަނީ ކުންފުނީގެ ކަމާބެހޭ ކޮމިޓީއަށް ފޮނުވާ، އެ މައްސަލަ ބަލާ، ފިޔަވަޅު އަޅަންޖެހޭ ފަރާތްތަކާ މެދު އިތުރަށް އަޅަން ޖެހޭ ފިޔަވަޅުތައް އެޅުމަށް ފޮނުވިފައި،" ބަޔާނުގައިވެ އެވެ.
ޕީއެސްއެމްއިން ބުނީ ކުންފުނީގެ އެކިއެކި ޑިޕާޓްމަންޓުތަކުގައި މިހާރު އަމަލު ކުރަމުންދާ އެސްއޯޕީތައް އިސްލާހުކޮށް، މިފަދަ ކަންކަން ތަކުރާރު ނުވާނެ ގޮތްތަކަށް ކުންފުނީގެ އޮޕަރޭޝަނަލް ކަންކަން ތަރުތީބު ކުރަމުންދާ ކަމަށެވެ.
ޕީއެސްއެމްގެ ޗެނަލްތަކުން ގެނެސްދިން ކޮންޓެންޓެއްގައި ކީރިތި ގުރުއާނުގެ ކަލިމައެއް އުނިވެފައިވާތީ، އެ މައްސަލަ ބެލުމަށްފަހު އެކަމުގައި އިހުމާލުވި މުވައްޒަފުންތަކެއް މިދިޔަ ހަފްތާގައި ސަސްޕެންޑުކޮށް މައާފަށް އެދުނެވެ.
ޕީއެސްއެމްއިން ބުނީ ގުރުއާނުގެ ކަލިމައެއް އުނިވީ ލައިވްކޮށް ގެނެސްދިންއިރު އެއް ކޮންޓްރޯލް ރޫމުން އަނެއް ކޮންޓްރޯލް ރޫމަށް ސިގްނަލް ބަދަލުކުރުމުގެ ތެރޭގައި ކަމަށެވެ.
