ނައިންޓީ ޕްލަސް ގޯލްޑް ކަޕްގެ ދެ ވަނަ ބުރުގެ ގްރޫޕް ސްޓޭޖުގައި މިރޭ ފުވައްމުލަކު ސިޓީ 1-0 އިން ބަލިކޮށް، ކ. ގުރައިދޫން ގްރޫޕްގެ އެއް ވަނަ ހޯދިއިރު، މި ގްރޫޕުން ދެން ކުއާޓާ ފައިނަލްގެ ޖާގަ ލިބޭ ޓީމެއް ކަނޑައަޅަން ތ. ތިމަރަފުށްޓާއި ފުވައްމުލަކުގެ މެދުގައި ގުރުއަތުލާން ޖެހިއްޖެ އެވެ.
މި ގްރޫޕްގައި ކުޅުނު ފުރަތަމަ މެޗުން ފުވައްމުލަކާއި ތިމަރަފުށި ވަނީ 1-1 އިން އެއްވަރުވެފަ އެވެ. ދެ ވަނަ މެޗުން ތިމަރަފުށި އަތުން 1-0 އިން މޮޅުވެ، މިރޭގެ މެޗަށް ނުކުުތްއިރު ވެސް ގުރައިދޫ އަށް އޮތީ ކުއާޓާ ފައިނަލުގެ ޖާގަ ލިބިފަ އެވެ. ގުރައިދޫން ފުވައްމުލައް ބަލިކޮށް ގްރޫޕްގެ އެއް ވަނަ ކަށަވަރުކުރިއިރު، މި ގްރޫޕުގެ ދެ ވަނަ ޓީމު ކަނޑައަޅާނީ ގުރުއަތުލުމަކުންނެވެ. އެއީ، ފުވައްމުލަކާއި ތިމަރަފުށި ހުރިހާ ގޮތަކުން އެއްވަރުވުމުންނެވެ.
ގަލޮޅު ދަނޑުގައި މިރޭ ކުޅުނު މެޗުގައި ފެނިގެންދިޔަ ހަމައެކަނި ލަނޑު ޖެހީ އަހުމަދު ޝުއޫން އެވެ. ހާފުގެ މެދެއްހާ ހިސާބުން ގުރައިދޫގެ މުހައްމަދު ނާއިމް ފޮނުވާލި ހިލޭ ޖެހުމަކުން، ފުވައްމުލަކު ކުޅުންތެރިއަކު ގައިގައި ޖެހިފައި ޝޫއޫން އަށް ލިބުމުން އޭނާ ވަނީ ގޯލުގެ ތެރެއަށް ބޯޅަ ފޮނުވާލައިފަ އެވެ.
ފުވައްމުލަކުން ވެސް ގިނަ ހަމަލާތަކެއް ފޮނުވާލި މި މެޗުގައި، ގުރައިދޫގެ ކީޕަރު، އަހުމަދު ސަމީރު ވަނީ ރަނގަޅު ބޯޅަތަކެއް ހުއްޓުވައިފަ އެވެ. އެ ގޮތުން، ފުވައްމުލަކު ޓީމުގައި ހިމެނޭ މި މުބާރާތުގައި އެންމެ ގިނަ ގޯލު ޖެހި ގާނާގެ ފޯވާޑް، ކޯފީ އޮވޫސޫ ފޮނުވާލި ހަމަލާއެއް ވެސް ވަނީ މަތަކޮށްފަ އެވެ.
ދެ ވަނަ ހާފުގައި ގުރައިދޫ އަށް ކުޅޭ ޒުވާން ގައުމީ ޓީމުގެ މިޑްފީލްޑަރު، އިޝްއާފް މުހައްމަދު ފިރާގު ފޮނުވާލި ބޯޅައެއް ވަނީ ގޯލުގެ ހުރަސްދަނޑިއަށް އަމާޒުވެފަ އެވެ.
ގޯލްޑް ކަޕްގެ ކުއާޓާ ފައިނަލްގެ އަށް ޖާގައިގެ ތެރެއިން، ހަތަރު ޖާގައެއް ވަނީ ޔަގީންވެފަ އެވެ. އެއީ، ޅ. ނައިފަރު، ކ. ގުރައިދޫ، ކ. މާފުށި އަދި ބ. އޭދަފުށްޓެވެ.
