ނައިންޓީ ޕްލަސް ގޯލްޑް ކަޕްގެ ދެ ވަނަ ބުރުގެ ގްރޫޕް ސްޓޭޖުގައި މިއަދު ހަވީރު މޮޅުވާން މަޖުބޫރު މެޗަކަށް ނުކުމެ، ބ. އޭދަފުށިން ފެންވަރު ދައްކާލައި 4-1 އިން ހއ. ދިއްދޫ ބަލިކޮށް މުބާރާތުގެ ކުއާޓާ ފައިނަލަށް ދަތުރުކޮށްފި އެވެ.
މި ގްރޫޕްގެ ފުރަތަމަ މެޗުން އޭދަފުށި ވަނީ 2-0 އިން ކ. މާފުށި އަތުން ބަލިވެފަ އެވެ. ގްރޫޕްގެ ދެ ވަނަ މެޗުގައި ދިއްދޫން ވަނީ 2-0 އިން މާފުށި ބަލިކޮށްފަ އެވެ. އެހެންކަމުން، މިއަދުގެ މެޗަށް ނުކުތްއިރު ކުއާޓާ ފައިނަލުގެ ޖާގައެއް ބޭނުންނަމަ އޭދަފުށްޓަށް މަދުވެގެން ދެ ގޯލުގެ ފަރަގަކުން މޮޅުވުން ނޫން ގޮތެއް ނެތެވެ.
ގަލޮޅު ދަނޑުގައި މިއަދު ކުޅުނު މެޗަށް އޭދަފުށިން ގިނަ އަދަދެއްގެ ސަޕޯޓަރުން އަ އެވެ. އެ ސަޕޯޓަރުންގެ ހިތްވަރުގެ އިތުރުން، ދެން ޓީމަށް ލިބުނު ފުރިހަމަ ކަމަކަށް ވެފައި އޮތީ ކްލަބް އީގަލްސް އިން ރިލީސް ދިނުމުން ގައުމީ ޓީމުގައި ވެސް ހިމެނުނު ނިޝާމް މުހައްމަދު (ޕޮގްބާ) އަށް ކުޅެވުމެވެ.
ފުރަތަމަ މިނިޓުން ފަށައިގެން މެޗުގެ ކޮންޓްރޯލް ނަގައިގެން ކުޅުނު އޭދަފުށިން ވަނީ 21 ވަނަ މިނިޓްގައި ލީޑުނަގައިފަ އެެވެ. މި ގޯލު ޖެހީ އިޝާން އިބްރާހިމް (ސައްޓު) ދިން ބޯޅައަކުން އޭރިއާތެރެއިން އަލީ ނަސީމް (އައްޔަ) އެވެ. އޭނާ ވަނީ ދުރު ކަނަށް ބޯޅަ ފޮނުވާލައިފަ އެވެ.
މާފުށި މެޗުގައި އޭދަފުށީގެ ކީޕަރު އަލީ އަޖުފާން އަމްޖަދު އަށް ދެއްކި ރަތް ކާޑުގެ ސަބަބުން އޭނާ ވަނީ އެއް އަހަރަށް ސަސްޕެންޑްކޮށްފަ އެވެ. މި މެޗުގައި އޭދަފުށީގެ ގޯލު ބެލެެހެއްޓީ ފުރަތަމަ ޑިވިޝަނުގެ ގިނަ ކްލަބްތަކަށް ކުޅުނު އަބްދުﷲ ޒިޔަޒަން އެވެ.
އޭދަފުށިން މެޗުގެ 65 ވަނަ މިނިޓްގައި ލީޑުފުޅާކުރީ ސައްޓު ނެގި ހުރަހެއް ދިފާއުކުރަން އުޅުމުގެ ތެރޭގައި އޭރިއާތެރެއިން ދިއްދޫ ކުޅުންތެރިއަކު ފައިގައި ޖެހިފައި، ޖައުޝަން މުހައްމަދު (ޖައުޅޭ) އަށް ލިބުމުން ކާމިޔާބުކުރި ގޯލެކެވެ.
މެޗުގެ 85 ވަނަ މިނިޓްގައި އޭދަފުށީގެ ތިން ވަނަ ލަނޑު ޖެހީ ދިއްދޫގެ ކީޕަރު މޫސާ ރަޝީދު ކައިރިން ނައްޓާލުމަށް ފަހު ކާމިޔާބުކުރީ މުހައްމަދު ފާސިރު (ފާއްޓޭ) އެވެ. އިތުރު ވަގުތުގެ ހަތަރު ވަނަ މިނިޓްގައި، ފާއްޓޭ ވަނީ އިތުރު ގޯލެއް ޖަހައި، އޭދަފުށްޓަށް ޕްރެޝަރު ކަނޑުވާލައިފަ އެވެ.
އިތުރު ވަގުތުގެ ނުވަ ވަނަ މިނިޓްގައި ދިއްދޫގެ ހަމައެކަނި ލަނޑު ޖެހީ، އޭރިއާތެރެއިން ގޯލުގެ ދުރު ކަނަށް ބޯޅަ ފޮނުވާލައިގެން، ހުސެއިން ޒިމްޔާން އެވެ.
މިއަދުގެ މެޗުން އޭދަފުށި މޮޅުވެ، ގްރޫޕްގެ އެއް ވަނައިގެ ގޮތުގައި ކުއާޓާ ފައިނަލަށް ދިޔައިރު، ގްރޫޕްގެ ދެ ވަނައިގެ ގޮތުގައި ކުއާޓާގެ ޖާގަ ލިބުނީ މާފުށްޓަށެވެ. މި ދެ ޓީމުގެ އިތުރުން ކުއާޓާގެ ފުރުސަތު ދެން ހޯދާފައިވަނީ ކ. ގުރައިދޫ އާއި ޅ. ނައިފަރު އެވެ.
