ރިވަައިވަލް ސްޕޯޓްސް ކްލަބްގައި ހިމެނޭ އުންމީދީ ބެޑްމިންޓަން ކުޅުންތެރިޔާ، ހަަސަން ޒަޔާން، ޓްރެއިނިން ފުރުސަތެއްގައި އިންޑިއާގެ އޮޑިޝާ އަށް ގޮސްފި އެވެ.
މިއީ، ރިވައިވަލް ސްޕޯޓްސް ކްލަބުން އިސްވެ ކުރި މަސައްކަތުން، އޮޑިޝާގެ ހޯލީ ޗައިލްޑް ބެޑްމިންޓަން އެކެޑަމީން ހޯދި ދެ މަސް ޓްރެެއިނިން ދުވަހުގެ ޓްރެއިނިން ފުރުސަތެކެވެ.
ފުލް ޓައިމް ޓްރެއިނިނެއްގެ ގޮތުގައި، ޒަޔާނަށް ލިބިގެން މިދިޔަ ފުރުސަތުގައި، އޭނާ އަށް އަންނަ އަހަރު ރިވައިވަލް އިން ވާދަކުރާ އަދި ރާއްޖޭގައި ކުރިއަށްދާ ބެޑްމިންޓަން މުބާރާތްތަކަށް ތައްޔާރުވާން ރަނގަޅު ޓްރެއިނިން އެއް ލިބޭނެ ކަމަށް ރިވައިވަލް އިން ވަނީ ބުނެފަ އެވެ.
މީގެ އަށް މަސް ކުރިން، މިިދިޔަ އޭޕްރީލް މަހު، ހަތަރު އަހަރުގެ ކޮންޓްރެކްޓެއްގައި ރިވައިވަލްއާ ގުޅުނު ޒަޔާނަކީ މީގެ ކުރިން ގައުމީ ބެޑްމިންޓަން ސްކޮޑުގައި ހިމެނުނު ކުޅުންތެރިއެއް ނަމަވެސް، ކުރިއެރުމަށް ބަލާއިރު، ރިވައިވަލްއާ ގުޅުނު ފަހުން އޭނާ އަންނަނީ މުބާރާތްތަކުގައި ނަތީޖާ ނެރެމުންނެވެ.
މިދިޔަ ޖުލައި މަހު، ކުރިއަށްދިޔަ، ފެލޭޓް މޮރިޝަސް އިންޓަނޭޝަނަލް މުބާރާތުގައި ޒަޔާން ވަނީ ތާރީހީ ކުރިއެރުމެއް ހޯދައިފަ އެވެ. ޒަޔާން ވަނީ، ކޮލިފައިން ބުރުގެ ފުރަތަމަ މެޗުން މޮޅުވެފަ އެވެ. އެއީ، މޮރިޝަސްގެ ޖެފްރޭ ޖޯސެފްއާ ވާދަކޮށް، 21-12، 21-12 އިންނެވެ. މިއީ، ބައިނަލްއަގުވާމީ މެޗަކުން ޒަޔާންގެ ފުރަތަމަ މޮޅެވެ. އެކަމަކު، ކޮލިފައިން ދެ ވަނަ މެޗުގައި އިންޑިއާގެ އަދިތުޔާ ބަޕިނީޑޫ އަތުން ހަސަން ޒަޔާން ބަލިވީ، 21-11، 21-06 އިންނެވެ. އެ މުބާރާތުގައި، ޒަޔާން ޒަކީ އާއި ހަސަން ޒަޔާން ވަނީ ފިރިހެން ޑަބަލްސް ކުއާޓާ ފައިނަލުގައި ކުޅެފަ އެވެ.
އޭގެ ފަހުން، ސެޕްޓެމްބަރު މަހު، ޔޫގާންޑާގައި ކުރިއަށްދިޔަ ކެމްޕާލާ އިންޓަނޭޝަނަލްގެ ފިރިހެން ސިންގަލްސް ބައިގެ ކޮލިފިކޭޝަނުގައި ކުޅުނު ތިން މެޗުން ޔޫގާންޑާ ކުޅުންތެރިން ބަލިކުރުމަށް ފަހު ޒަޔާން މުބާރާތުގެ މެއިން ޑްރޯ އިން ޖާގަ ހޯދި އެވެ. އެއީ، ގަދަ 32 ކުޅުންތެރިން ވާދަކުރާ ބުރުންނެވެ.
