އިޒްރޭލުން ނުސައިރަތު ކޭމްޕަށް ދިން ހަމަލާއެއްގައި 40 މީހުން މަރާލައިފި އެވެ.
ގާޒާގެ ހެލްތު މިނިސްޓްރީއާ ހަވާލާދީ "އަލްޖަޒީރާ" އިން ބުނީ ނުސައިރަތު ކޭމްޕަށް ދިން ހަމަލާގައި ގިނަ ބަޔަކު ޒަހަމްވެ، ހޮސްޕިޓަލުގައި ފަރުވާ ދެމުންދާ ކަމަށެވެ.
އަލްޖަޒީރާއިން ރިޕޯޓު ކުރާ ގޮތުގައި އިޒްރޭލުން އަންނަނީ މެދުނުކެނޑި ގާޒާގެ އެކި ސަރަހައްދުތަކަށް ހަމަލާދީ، މައުސޫމް އެތައް ބަޔަކު މަރަމުންނެވެ.
އިޒްރޭލުން ނުސައިރަތު ކޭމްޕަށް ދިން ހަމަލާ ގަތަރުގެ އިތުރުން އޯގަނައިޒޭޝަން އޮފް އިސްލާމިކް ކޯޕަރޭޝަން (އޯއައިސީ) އިން ވަނީ ކުށްވެރިކޮށްފަ އެވެ.
ގާޒާއަށް ދެމުން އަންނަ ހަމަލާތައް ހުއްޓާލުމަށް އިޒްރޭލަށް ގިނަ ގައުމުތަކުން ގޮވާލައި، އެކަމާ ގުޅޭ އެއްބަސްވުމެއް ހެދުމަށް މަސައްކަތް ކުރި ނަމަވެސް، މިހާތަނަށް އިޒްރޭލުން އެއްވެސް ގައުމަކަށް އިޖާބަ ދީފައެއް ނުވެ އެވެ.
ގާޒާއަށް މިދިޔަ އަހަރުގެ އޮކްޓޯބަރު 7، އިން ފެށިގެން އިޒްރޭލުން ދެމުން އަންނަ ހަމަލާތަކުގައި މިހާތަނަށް 44،875 މީހުން މަރުވެފައިވާއިރު، އޭގެ ތެރޭގައި ގިނައީ ކުޑަކުދިންނާއި އަންހެނުންނެވެ. ހަމަލާތަކުގައި ޒަހަމްވި މީހުންގެ އަދަދު 106،000 އަށް ވުރެ މަތިވެފައިވާއިރު، 11،000 އަށް ވުރެ ގިނަ މީހުން ގެއްލިފައިވެ އެވެ.
