އިއްޔެ ހިނގި އަލިފާނުގެ ހާދިސާގައި ތިން މިނިސްޓްރީއެއްގައި އަލިފާން ރޯވެ، އެ އޮފީސްތަކުގެ ހުރިހާ ތަކެއްޗެއްހެން އަނދައި ހުލިވުމުން އެ ތަންތަނުން ދެމުން ދިޔަ ހިދުމަތްތައް ހުއްޓިއްޖެ އެވެ.
އިއްޔެ ހެނދުނު ރޯވި އަލިފާނުގައި އެއްކޮށް އަނދައިގެން ގޮސްފައި ވަނީ ހައުސިން އާއި އިންފްރާސްޓްރަކްޗާ މިނިސްޓްރީ ހިންގަމުން ދިޔަ، ޓިނުން ހަދާފައިވާ އިމާރާތެވެ. އެ އިމާރާތުގެ ގޯތިތެރޭގައި ހުރި ސިޓީ ކައުންސިލްގެ އިމާރާތްތަކަށް ވެސް އަލިފާނުގެ އަސަރުކޮށްގެންނާއި ފަނުގެ އަސަރުކޮށްގެން ބައެއް ލިޔުންތައް ހަލާކުވެފައިވެ އެވެ.
އޭގެ އިތުރުން ރޯވި ޓިނު އިމާރާތާ އިންވެގެން ހުރި އެންވަޔަރަމެންޓު މިނިސްޓްރީ ހިންގަމުން ދިޔަ ގްރީން ބިލްޑިންގުގައި ރޯވެ، އެ މިނިސްޓްރީ އާއި އެތަނުގައި ހިންގަމުން ދިޔަ އީޕީއޭގެ ހުރިހާ ތަކެއްޗެއްހެން ވަނީ ހަލާކުވެފަ އެވެ.
އެންވަޔަރަމެންޓު މިނިސްޓްރީގެ އޮފިޝަލަކު ބުނި ގޮތުން ސަލާމާތް ކުރެވުނީ އެތަނުގެ ތިރީ ފަންގިފިލާގައި ހުރި ބައެއް ތަކެއްޗެވެ.
އެހެންވެ، މި އޮފީސްތަކުގެ ހިދުމަތް ވަގުތީ ގޮތުން ވަނީ ހުއްޓިފަ އެވެ. ސިޓީ ކައުންސިލްގެ ހުއްޓިފައި ވަނީ އިމާރާތްތަކާ ގުޅޭ ބައެއް ހިދުމަތްތަކެވެ. އުފަންދުވަހުގެ ސެޓްފިކެޓު ހެއްދުމުގެ މަސައްކަތް ސިޓީ ކައުންސިލްގެ ހުޅުމާލޭ އޮފީހުގައި ވަނީ ފަށައިފަ އެވެ.
އަލިފާނުގައި އަނދައި ހުލުވި އޮފީސްތައް ވަގުތީ ގޮތުން ދަރުބާރުގެއަށް ބަދަލު ކުރުމަށް، ދަރުބާރުގެ ތައްޔާރުކުރުމުގެ މަސައްކަތް ވަނީ ފަށައިފަ އެވެ.
ސަރުކާރުގެ މުހިންމު ތިން މިނިސްޓްރީގެ މަސައްކަތްތައް އަލުން ފަށާނެ ތާރީހުތައް މިހާތަނަށް ހާމަކޮށްފައި ނުވެ އެވެ.
އަލިފާނުގެ ހާދިސާ ހިނގީ އިއްޔެ ވަރަށް ހެނދުނާ އެވެ.
