ނައިންޓީ ޕްލަސް ގޯލްޑް ކަޕްގެ ދެ ވަނަ ބުރުގެ ގްރޫޕް ސްޓޭޖުގައި މިއަދު ހަވީރު 2-0 އިން ދ. މީދޫ ބަލިކޮށް، ޅ. ނައިފަރުން މުބާރާތުގެ ކުއާޓާ ފައިނަލުގެ ޖާގައެއް ޔަގީންކޮށްފި އެވެ.
މި ގްރޫޕްގެ ފުރަތަމަ މެޗުން އައްޑޫ ސިޓީ އާއި މީދޫ ވަނީ 3-3 އިން އެއްވަރުވެފަ އެވެ. މިއަދުގެ މެޗާ އެކު، މީދޫ އަށް ދެ މެޗު ހަމަވިއިރު، ލިބިފައިވަނީ، އެއް ޕޮއިންޓެވެ. ނައިފަރުން މި ވަނީ ކުޅުނު ފުރަތަމަ މެޗުން ވެސް ތިން ޕޮއިންޓް ހޯދައިފަ އެވެ. މި ގްރޫޕްގައި ދެން އޮތީ އައްޑޫ އާއި ނައިފަރު ކުޅޭ މެޗެވެ. އެ މެޗުން ނައިފަރު މޮޅުވެގެން ނޫން ގޮތަކަށް ދެން މީދޫ އަށް ކުއާޓާގެ ޖާގައެއް ނުލިބޭނެ އެވެ. އައްޑޫ އަށް އެ މެޗުން ޕޮއިންޓެއް ހޯދައިގެން ވެސް ކުއާޓާގެ ޖާގަ ހޯދޭނެ އެވެ.
ގަލޮޅު ދަނޑުގައި މިއަދު ހަވީރު ކުޅުނު މެޗު ފަށައިގެން ނައިފަރުން ދިޔައީ، އެޓޭކް ކުރަމުންނެވެ. އެ ގޮތުން، ނައިފަރު ޓީމަށް ކުޅޭ، މުހައްމަދު ނަދީމް ފޮނުވާލި ބޯޅައެއް ހުރަސްދަނޑިއަށް އަމާޒުވިއިރު، އެ ޓީމުގެ އިމްރާން މުހައްމަދަށް ލިބުނު ފުރުސަތުން ވެސް ގޯލެއް ނުޖެހުނެވެ.
މީދޫ ޓީމަށް މި ފަހަރުގެ މުބާރާތުގައި މޮޅު ކުޅުމެއް ދައްކަމުން އަންނަ އިބްރާހިމް އިމްރާން (އިންމި) ބޯޅަ ހިފައިގެން އޭރިއާތެރެއަށް ވަދެ ފޮނުވާލި ބޯޅަ ނައިފަރު ކުޅުންތެރިއަކު ގައިގައި ޖެހިފައި ދިޔައީ ބޭރަށެވެ.
ނައިފަރުން މި މެޗުގައި ލީޑުނެގީ ފުރަތަމަ ހާފުގެ އިތުރު ވަގުތުގަ އެވެ. ނައިފަަރަށް ލިބުނު ކޯނަރަކުން މީދޫ ކުޅުންތެރިން ކައިރިން ނައިފަރުގެ މުހައްމަދު އިޒާން އަލީ ބޮލުން ފޮނުވާލި ބޯޅަ މީދޫ ކުޅުންތެރިންނަށް ސަލާމަތްނުކުރެވި ވަނީ ގޯލަށެވެ. މި ގޯލު ޖެހުމުގެ އިރުކޮޅެއް ކުރިން، ނައިފަރު ޓީމު އިޒާނަށް ލިބުނު އަނިޔާއަކަށް ފަރުވާދޭން އަށިގަނޑުގައި ވަނީ ބާލައިފަ އެވެ. އިޒާނަކީ 20 އަހަރުން ދަށުގެ ގައުމީ ޓީމުގެ ކުޅުންތެރިއެެކެވެ.
ދެ ވަނަ ހާފުގައި ވެސް ރަނގަޅު ކުޅުމެއް ދެއްކި ނައިފަރުން ވަނީ، އިމްރާން ދިން ބޯޅައަކުން އޭރިއާބޭރުން ތިރިތިރިން ގޯލަށް ބޯޅަ ފޮނުވާލައިގެން ނަދީމް ޖެހި ގޯލަކުން ލީޑުފުޅާކޮށްފަ އެވެ.
ނައިފަރުން ލީޑުފުޅާކުރިތާ މާގިނައިރުތަކެއްނުވެ، އެ ޓީމުގެ އިބްރާހިމް ޝަރީފް (އިއްބެ) އަށް ވަނީ ދެ ވަނަ ރީނދޫ ކާޑާ އެކު ރަތް ކާޑެއް ދައްކައިފަ އެވެ. ކްލަބް އީގަލްސް އާއި އޮޑި ސްޕޯޓްސް ކްލަބަށް ކުޅެފައިވާ އިއްބެ އަށް ފުރަތަމަ ރީނދޫ ކާޑު ދެއްކީ ފުރަތަމަ ހާފުގަ އެވެ.
މެޗުގެ ފަހު ހާފުގެ ބޮޑުބައި ނައިފަރުން ކުޅުންތެރިއަކު މަދުކޮށް ކުޅުނު ނަމަވެސް މީދޫ އަށް ލަނޑެއް ޖެހޭގޮތެއްނުވި އެވެ.
ނައިފަރަކީ މި ފަހަރުގެ ގޯލްޑް ކަޕްގެ ކުއާޓާ އިން ޖާގަ ހޯދި ދެ ވަނަ ޓީމެވެ. މީގެ ކުރިން، ކ. ގުރައިދޫ އިން ވެސް ވަނީ މުބާރާތުގެ ގަދަ އަށް ޓީމުގެ ތެރެއިން ފުރުސަތު ހޯދައިފަ އެެވެ.
