ނައިންޓީ ޕްލަސް ގޯލްޑް ކަޕްގެ ދެ ވަނަ ބުރުގެ ގްރޫޕް ސްޓޭޖުގައި މިރޭ ކުޅުނު މެޗުން، ހއ. ދިއްދޫން 2-0 އިން ކ. މާފުށި ބަލިކުުރުމާ އެކު، މި ގްރޫޕުން ކުއާޓާ ފައިނަލަށް ދަތުރުކުރާ ޓީމުތައް ކަނޑައެޅުމުގައި ފޯރިގަދަ މެޗަކާ ކުރިމަތިލާން ޖެހިއްޖެ އެވެ.
ގޯލްޑް ކަޕްގެ ދެ ވަނަ ބުރުގައި، 12 ޓީމު ހަތަރު ގްރޫޕަކަށް ބަހާލެވިފައިވާއިރު، ކޮންމެ ގްރޫޕެއްގައި ހިމެނެނީ ތިން ޓީމެވެ. ކުއާޓާ ފައިނަަލަށް ދާނީ ގަދަ ދެ ޓީމެވެ.
ގްރޫޕް އެފްގެ އެއް ވަނައިގައި މި ވަގުތު އޮތީ އެއް މެޗުން ތިން ޕޮއިންޓާއި ފައިދާ ދެ ގޯލާ އެކު، ދިއްދޫ އެވެ. ދެ ވަނައިގައި އޮތް މާފުށްޓައް ވަނީ ދެ މެޗުން ތިން ޕޮއިންޓް ލިބިފަ އެވެ. ތިން ވަނައިގައި އޮތް އޭދަފުށްޓަށް އެއް މެޗު ކުޅުނުއިރު އަދި ޕޮއިންޓެއް ނުލިބެ އެވެ.
މި ގްރޫޕްގައި ބާކީ އޮތީ ދިއްދޫ އާއި އޭދަފުށި ކުޅޭ މެޗު އެކަންޏެވެ. އެ މެޗުން މޮޅުވާން އޭދަފުށްޓަށް މަޖުބޫރުވެފައިވާއިރު، ގްރޫޕްގެ ތިން ޓީމު އެއްވަރުވެދާނެ ހާލަތެއް ކުރިމަތިވުމުގެ ފުރުސަތު ވެސް އޮތީ ހުޅުވިފަ އެެވެ.
ގަލޮޅު ދަނޑުގައި މިރޭ ކުޅުނު މެޗުގައި ދިއްދޫ އިން ދެ ގޯލު ވެސް ޖެހީ ފުރަތަމަ ހާފުގަ އެވެ. އެ ގޮތުން، ދިއްދޫގެ ފުރަތަމަ ގޯލު ޖެހީ، ގައުމީ 20 އަހަރުން ދަށުގެ ޓީމަށް މި ފަހުން މޮޅު ކުޅުމެއް ދައްކައި، މި މުބާރާތުގައި ދިއްދޫ އަށް ވެސް ރަނގަޅު ކުޅުމެއް ދައްކަމުން އަންނަ އަހުޒަމް ރަޝީދު (އަހޫ) އެވެ. އޭރިއާތެރެއަށް ހުރަސްވި ބޯޅަ އަހޫ ވަނީ ބޮލުން ގޯލަށް ފޮނުވާލައިފަ އެވެ.
މާފުށިން ވެސް އެޓޭކްތަކެއްކޮށް ގޯލު ޖަހަން ގިނަ މަސައްކަތްތަކެއް ކުރި މި މެޗުގައި، އެ ޓީމުން ޖެހި ގޯލެއް ވަނީ އޮފްސައިޑް ކަމަށް ނިންމައިފަ އެވެ.
ފުރުސަތުތަކުގެ ބޭނުންހިފައި އެޓޭކްގައި ރަނގަޅަށް މަސައްކަތްކުރަމުން އައި، ދިއްދޫން ދެ ވަނަ ގޯލު ޖެހީ ހާފުގެ މެދެއްހާ ހިސާބުން ފޮނުވާލި ބޯޅައަކުންނެވެ. އެ ގޮތުން، ދިއްދޫ ޓީމުގެ އާދަމް އާޒިމް، މެދު ރޮނގުން ކުރިއަށް ބޯޅަ ދިޔަތަނާ ލިބުނު ފުރުސަތުގައި ޖެހި ބޯޅަ ގޯލަށް ވައްދާލީ މާފުށީގެ ކީޕަރު، އިސްމާއިލް ޝިހާމް ބޯމަތިންނެވެ.
ދިއްދޫ ހާފުގެ ތެރޭގައި މާފުށީގެ އިސްމާއިލް މަފާޒް އިބްރާހިމް އާއި އިސްމާއިލް ނަޒީހަށް ލިބުނު ބޯޅަތަކުގައި އެޓޭކްކުރަން ކުރި މަސައްކަތުގައި ގޯލެއް ކާމިޔާބު ކުރެވޭ ގޮތެއްނުވި އެވެ. އަދި މާފުށީގެ އިސްމާއިލް ޒަރީރު ފޮނުވާލި ބޯޅައެއް ވެސް ވަނީ ބްލޮކްވެފަ އެވެ.
ގޯލްޑް ކަޕްގެ ކުއާޓާ ފައިނަލުން ޖާގަ ހޯދި ހަމައެކަނި ޓީމަކީ ކ. ގުރައިދޫ އެވެ.
