ނައިންޓީ ޕްލަސް ގޯލްޑް ކަޕްގެ ދެ ވަނަ ބުރުގެ ގްރޫޕް ސްޓޭޖުގައި މިއަދު ހަވީރު ތ. ތިމަރަފުށި 0-1 އިން ބަލިކޮށް، ކ. ގުރައިދޫން މުބާރާތުގެ ކުއާޓާ ފައިނަލުން ޖާގަ ހޯދި ފުރަތަމަ ޓީމުގެ ޝަރަފް ހޯދައިފި އެވެ.
ގްރޫޕް އީގެ އެއް ވަނައިގައި މި ވަގުތު ގުރައިދޫ އޮޮތީ އެއް މެޗުން ތިން ޕޮއިންޓް ހޯދައިގެންނެވެ. ދެ ވަނައިގައި އޮތް ޏ. ފުވައްމުލަކު ސިޓީ އަށް އެއް މެޗުން ޕޮއިންޓެއް ލިބިފައިވާއިރު، ތިން ވަނައިގައި އޮތް ތިމަރަފުށްޓަށް ދެ މެޗުން ލިބުނީ ޕޮއިންޓެކެވެ.
މި ގްރޫޕުން ކުއާޓާގެ ޖާގަ ހޯދާނެ އަނެއް ޓީމު ކަނޑައެޅޭނީ ގުރައިދޫ އާއި ފުވައްމުލަކު ސިޓީ ކުޅޭ މެޗުންނެވެ. އެ މެޗުން، ގުރައިދޫން ދެ ގޯލުގެ ފަރަގަކުން ފުވައްމުލަކު ސިޓީ އަތުން މޮޅުވެއްޖެނަަމަ، ތިމަރަފުށި ކުއާޓާ އަށް ދަތުރުކުރާނެ އެވެ. އެ މެޗު އެއްވަރުކޮށްލައިގެން ވެސް އަނެއް ބުރަށް ދިއުުމުގެ ފުރުސަތު ފުވައްމުލަކަށް އެބައޮތެވެ. އަނެއްކޮޅުން، 1-0 ނޫން ގޮތަކަށް އެއް ގޯލުގެ ފަރަގަކުން ފުވައްމުލަކު ބަލިވި ނަމަވެސް އެ ޓީމުން ކުއާޓާގެ ޖާގަ ލިބޭނެ އެވެ.
ގުރައިދޫ ޓީމުގެ ނާއިމް (ކ) ތިމަރަފުށީގެ އަފްލާޒް ކައިރިން ބޯޅަ ހިފައިގެންދަނީ.
ގަލޮޅު ރަސްމީ ދަނޑުގައި މިއަދު ހަވީރު ކުޅުނު މެޗުގައި ގުރައިދޫން ޖެހި ހަމައެކަނި ގޯލު ފުރަތަމަ ހާފުގައި ކާމިޔާބުކުރީ ގުރައިދޫގެ ބިދޭސީ ފޯވާޑް، އަހުމަދު އިބްރާހިމް އެވެ. މި ބުރަށް ޓީމަށް ކުޅުންތެރިން އިތުރު ކުރަން ލިބުނު ފުރުސަތުގައި ގުރައިދޫން ޓީމުގައި ޖެހި، އެ ރަށަށް އުފަން، ގައުމީ ފުޓްބޯޅަ ޓީމުގެ ވެސް ތަރި، މުހައްމަދު ނާއިމް ދިން ބޯޅަ އޭރިއާތެރެއިން ކޮންޓްރޯލް ކުރުމަށް ފަހު އަހުމަދު އިބްރާހިމް ވަނީ ހަމަޖެހިލައިފައި ގޯލަށް ބޯޅަ ފޮނުވާލައިފަ އެވެ.
މި މެޗަށް ތިމަރަފުށިން ނުކުންނަން ޖެހުނީ އެ ޓީމުގެ ފުރަތަމަ އެގާރައިގައި ކުޅޭ ދެ މިޑްފީލްޑަރުން ކަމަށްވާ އިބްރާހިމް ސިނާހު (ސިނާ) އާއި އަލީ އިލްމާން މޫސާ ނުލަ އެވެ. ވިކްޓަރީ ސްޕޯޓްސް ކްލަބާއި ނިއު ރޭޑިއަންޓް ސްޕޯޓްސް ކްލަބަށް ދެ ވަނަ ޑިވިޝަނުގައި ކުޅެފައިވާ ސިނާ އާއި ވިކްޓަރީ އަށް ކުޅެފައިވާ އިލްމާން ސަސްޕެންޑްވީ ދެ ކާޑު ހަމަވުމުގެ ސަބަބުންނެވެ.
ތިމަރަފުށީގެ ކުޅުންތެރިންނަށް މި މެޗުގައި، ގުރައިދޫގެ ގޯލު ބެލެހެއްޓި ހުސެއިން ރިފާއު ކައިރިން ގޯލެއް ކާމިޔާބު ކުރެވޭ ގޮތެއްނުވި އެވެ.
މި ފަހަރުގެ ގޯލްޑް ކަޕްގައި ތިމަރަފުށި ކުޅުނު ފަސް މެޗުގެ ތެރެއިން މޮޅުވީ ފުރަތަމަ ބުރުގެ ގްރޫޕް ސްޓޭޖުގައި ބ. ތުޅާދޫ އަތުންނެވެ. ފުރަތަމަ ބުރުގެ ގްރޫޕް ސްޓޭޖުގައި، ބ. އޭދަފުށްޓާއި މާލެ ސިޓީ އަތުން ތިމަރަފުށި ބަލިވިއިރު، ދެ ވަނަ ބުރުގެ ގްރޫޕް ސްޓޭޖުގައި ކުޅުނު ފުރަތަމަ މެޗުން ފުވައްމުލަކު ސިޓީއާ ވަނީ އެއްވަރުވެފަ އެވެ.
ގޯލްޑް ކަޕްގެ ދެ ވަނަ ބުރަކީ، 12 ޓީމުގެ މެދުގައި ކުޅޭ ގްރޫޕް ސްޓޭޖު ބުރެކެވެ. ހަތަރު ގްރޫޕަށް ބެހިފައިވާއިރު، ކޮންމެ ގްރޫޕެއްގައި ހިމެނެނީ ތިން ޓީމެވެ. އޭގެ ތެރެއިން ދެ ޓީމެއް ކުއާޓާ ފައިނަލަށް ދަތުރުކުރާނެ އެވެ.
