ނައިންޓީ ޕްލަސް ގޯލްޑް ކަޕްގެ ދެ ވަނަ ބުރުގެ ގްރޫޕް ސްޓޭޖުގައި ރޭ ކުޅުނު މެޗުން ޅ. ކުރެންދޫ އަތުން 1-0 އިން މޮޅުވެ، ރ. އަލިފުށިން މި ބުރުގެ ފެށުން ރަނގަޅުކޮށްފި އެވެ.
މުބާރާތުގެ ފުރަތަމަ ގްރޫޕް ސްޓޭޖުގައި، އަލިފުށިން ވަނީ މޮޅަށް ކުޅެ ފުރަތަމަ ދެ މެޗުން، ބ. ކެންދޫ އާއި ޅ. ނައިފަރު ބަލިކޮށްފަ އެވެ. އެކަމަކު، ގްރޫޕްގެ ފަހު މެޗުން އަލިފުށި ވަނީ ކ. މާފުށި އަތުން ބަލިވެފަ އެވެ. އެހެންކަމުން، އަލުން ފޯމަކަށް އެޅެން ރޭގެ މެޗަށް ނުކުތްއިރު އަލިފުށްޓަށް އޮތީ ނަތީޖާ ނެރެން މުހިންމު ކަމަކަށް ވެފަ އެވެ.
ގަލޮޅު ދަނޑުގައި ރޭ ކުޅުނު މެޗުގެ ފުރަަތަމަ ހާފު ނިމިގެން ދިޔައިރު، ކުރެންދޫ އާއި އަލިފުށްޓަށް ގޯލެއް ޖެހޭގޮތެއްނުވި އެވެ. އެކަމަކު، ދެ ޓީމުން ވެސް ވަނީ ނުރައްކާތެރި ހަމަލާތަކެއް ފޮނުވާލައިފަ އެވެ.
މެޗުގައި ފެނިގެންދިޔަ ހަމައެކަނި ގޯލު އަލިފުށީ ޓީމުން ޖެހީ ދެ ވަަނަ ހާފުގަ އެވެ. މި ގޯލު މެޗުގެ 63 ވަނަ މިނިޓްގައި ޖެހީ އަލިފުށީގެ ފޯވާޑް، އަހުމަދު ހުސާމް (ހުސާންކޮ) އެވެ. ފުރަތަމަ ޑިވިޝަނުގައި ސުޕަ ޔުނައިޓެޑް ސްޕޯޓްސް (ސަސް) އާއި ދަ ގްރާންޑޭ ސްޕޯޓްސް ކްލަބަށް ކުޅުނު ޒުވާން ގައުމީ ޓީމުގެ ކުރިގެ ފޯވާޑް، ހުސާންކޮ، އޭރިއާތެރެއިން ފުރަތަމަ ޖައްސާލި ބޯޅަ ރަނގަޅަށް ގޯލާ އަމާޒުކޮށްލެވޭ ގޮތް ނުވި ނަމަވެސް އަލުން އެ ބޯޅަ ހޯދައި، ގޯލަށް ފޮނުވާލި އެވެ.
ގޯލްޑް ކަޕްގެ ދެ ވަނަ ބުރަކީ، 12 ޓީމުގެ މެދުގައި ކުޅޭ ގްރޫޕް ސްޓޭޖު ބުރެކެވެ. ހަތަރު ގްރޫޕަށް ބެހިފައިވާއިރު، ކޮންމެ ގްރޫޕެއްގައި ހިމެނެނީ ތިން ޓީމެވެ. އޭގެ ތެރެއިން ދެ ޓީމެއް ކުއާޓާ ފައިނަލަށް ދަތުރުކުރާނެ އެވެ. ކުރެންދޫ އާއި އަލިފުށީގެ އިތުރުން ދެން މި ގްރޫޕްގައި އޮތީ، މާލެ ސިޓީ އެވެ.
