ނައިންޓީ ޕްލަސް ގޯލްޑް ކަޕްގެ ދެ ވަނަ ބުރުގެ ގްރޫޕް ސްޓޭޖުގައި އިބްރާހިމް އިމްރާން (އިންމި) ތަފާތު ދައްކައި ހެދި ހެޓްރިކާ އެކު، ދ. މީދޫން 3-3 އިން އައްޑޫ ސީޓީއާ އެއްވަރުކޮށްފި އެވެ.
މި މެޗުގައި ހެދި ހެޓްރިކާ އެކު، ގައުމީ 19 އަހަރުން ދަށުގެ ޓީމުގެ ކުރީގެ ފޯވާޑް އިންމި ވެފައިވަނީ މި ފަހަރުގެ ގޯލްޑް ކަޕްގައި އެންމެ ރަނގަޅު ކުޅުމެއް ކޮންމެ މެޗެއްގައި ވެސް ދައްކަމުން އަންނަ ކުޅުންތެރިޔާ އަށެވެ.
ކްލަބް އީގަލްސް އާއި ޓީސީ ސްޕޯޓްސް ކްލަބަށް ވެސް ކުޅެފައިވާ އިންމި ވަނީ މި ފަަހަރުގެ ގޯލްޑް ކަޕްގައި މީދޫ ޓީމަށް އަށް ގޯލު ޖަހައިދީފަ އެވެ. ލަނޑު ލިސްޓުގެ ކުރީގައި އޮތީ އިންމި އާއި ފުވައްމުލަކު ސިޓީ ޓީމަށް ކުޅޭ ގާނާގެ ފޯވާޑް، ކޯފީ އޮވޫސޫ އެެވެ. ދެ ކުޅުންތެރިން ވެސް ވަނީ އަށް ގޯލު ޖަހައިފަ އެެވެ. އެކަމަކު، ކޯފީ ވަނީ އިންމި އަށް ވުރެ އެއް މެޗު އިތުރަށް ކުޅެފަ އެވެ.
ގަލޮޅު ދަނޑުގައި މިއަދު ހަވީރު ކުޅުނު މެޗުގައި އައްޑޫ އަށް ލީޑުނަގައިދިނީ ކްލަބް އީގަލްސް އިން ރިލީސް ހޯދައިގެން މިއަދުގެ މެޗުގައި ކުޅުނު އިބްރާހިމް މަހުދީ (ފޭދޫ އިއްބެ) ޖެހި ގޯލުންނެވެ. އީގަލްސް އަށް އައްޑޫ އިން ވަނީ ރިލީސް ފީގެ ގޮތުގައި 100،000 ރުފިޔާ ދައްކައިފަ އެވެ. ދެ ވަނަ ހާފުގައި އިސްމާއިލް އީސާ (މެސީ) ވަނީ އައްޑޫގެ ލީޑުފުޅާކޮށްދީފަ އެވެ.
މީދޫން 63 ވަނަ މިނިޓްގައި ފުރަތަމަ ގޯލު ޖެހީ އިންމި އަށް ކުރި ފައުލަކަށް ލިބުނު ޕެނަލްޓީ އަކުންނެވެ. އޭނާ ވަނީ ހަމަޖެހިލައިފައި މަތީ ކަނަށް ޕެނަލްޓީން ބޯޅަ ފޮނުވާލައިފަ އެވެ. އޭގެ ދެ މިނިޓް ފަހުން، ހާފުގެ މެދެއްހާ ހިސާބުން އިންމި ފޮނުވާލި ބޯޅަ އައްޑޫގެ ކީޕަރު ބޯމަތިން އޮއްސިގެންނެވެ.
އޭގެ ފަހުން، ފުރަތަމަ ޑިވިޝަނުގައި މާޒިޔާ ސްޕޯޓްސް އެންޑް ރެކްރިއޭޝަނާއި ޓީސީ އަށް ވެސް ކުޅުނު އަލީ ނާފިއު (ކަޅޭ) ވަނީ އޭރިއާބޭރުން އެއް ފަހަރުން ގޯލުގެ މަތީ ކަނަށް ބޯޅަ ފޮނުވާލައިގެން އައްޑޫ އަށް އަލުން ލީޑުނަަގައިދީފަ އެވެ. މީދޫ އަށް އެއްވަރުކޮށްދިން ގޯލު އިތުރު ވަގުތުގައި، އިންމި ކާމިޔާބުކުރީ ޕެނަލްޓީ އަކުން މަތީ ކަނަށް ބޯޅަ ފޮނުވާލައިގެންނެވެ.
މި ގްރޫޕްގައި ދެން ހިމެނެނީ، ޅ. ނައިފަރު އެވެ.
ގޯލްޑް ކަޕްގެ ދެ ވަނަ ބުރަކީ، 12 ޓީމުގެ މެދުގައި ކުޅޭ ގްރޫޕް ސްޓޭޖު ބުރެކެވެ. ހަތަރު ގްރޫޕަށް ބެހިފައިވާއިރު، ކޮންމެ ގްރޫޕެއްގައި ހިމެނެނީ ތިން ޓީމެވެ. އޭގެ ތެރެއިން ދެ ޓީމެއް ކުއާޓާ ފައިނަލަށް ދަތުރުކުރާނެ އެވެ.
