ވެލާނާ އިންޓަނޭޝަނަލް އެއާޕޯޓުގެ ކުނި އުކުމަށް ދުވާލަކު 250،000ރ. ގެ މަގުން 14 މިލިއަނެއްހައި ރުފިޔާ ފާއިތުވި ދޮޅު މަސްދުވަސް ތެރޭގައި މޯލްޑިވްސް އެއާޕޯޓްސް ކޮމްޕެނީން ހަރަދުކޮށްފި ކަމަށް އިއްޔެ ރިޕޯޓްކުރި އެވެ.
"އަދަދު" ނޫހަށް ލިބިފައިވާ މައުލޫމާތުން އެނގޭ ގޮތުގައި އެ އަގުގައި މަސައްކަތް ހަވާލުކޮށްފައި ވަނީ އައި އެންޑް ސީ ޓްރޭޑިން ޕްރައިވެޓް ލިމިޓެޑް ކިޔާ ކުންފުންޏަކާ އެވެ. އައިއެންޑްސީ ކުންފުނިން އެ މަސައްކަތް ބެލީޒާ ޕްލަސް ކިޔާ ކުންފުންޏަކާ ހަވާލުކޮށްގެން ކުރުވަމުން ދިޔައީ ދުވާލަކަށް 230،000ރ. ރޭޓުންނެވެ.
ކުނި އުކުމުގެ ހިދުމަތް އޮކްޓޫބަރު 15، ގައި ވެމްކޯއިން ހުއްޓައިލުމާ ހަމައިން، މި ފާއިތުވި 54 ދުވަހަށް އަގު ހަދާލާއިރު، ކޮންމެ ދުވަހަކަށް ދޭން އެއްބަސްވެފައި އޮތް 250،000ރ. އާއި ޖީއެސްޓީ 15،000ރ. 54 ދުވަހާ ގުނަ ކޮށްލުމުން ޖުމުލަ އަގު 14،310،000ރ. (ސާދަ މިލިއަން ތިން ލައްކަ ދިހަ ހާސް ރުފިޔާ) އަށް އަރަ އެވެ.
