އަލްބޭނިއާގައި ސަރުކާރާ ދެކޮޅަށް ކުރަމުންދާ މުޒާހަރާތަކުގައި، މުޒާހަރާގެ ބައިވެރިންނާއި ފުލުހުންނާ ދެމެދު ކުރިމަތިލުންތައް ހިނގާތާ މިއަދަށް ހަތް ދުވަސް ވެއްޖެ އެވެ.
ބޮޑުވަޒީރު އެޑީ ރާމާގެ އިސްތިއުފާއަށް ގޮވާލައި ކުރަމުންދާ މި މުޒާހަރާތަކުގައި ގިނައީ ހައިސްކޫލްތަކާއި ޔުނިވާސިޓީތަކުގެ ދަރިވަރުންނެވެ. ރަސްމީ ހިސާބުތަކުން ދައްކާ ގޮތުގައި، ހޯމަ ދުވަހުގެ ހަމަނުޖެހުންތަކުގެ ކުރިން ވެސް 295 މީހަކަށް ވަނީ އެކިވަރުގެ އަނިޔާތައް ލިބިފަ އެވެ. މީގެ ތެރޭގައި 186 ފުލުހުން ހިމެނެ އެވެ.
އާދީއްތަ ދުވަހު ފުލުހުންގެ އިސްވެރިންނާ ބައްދަލުކުރައްވައި ބޮޑުވަޒީރު ރާމާ ވިދާޅުވީ، ހަމަނުޖެހުން ހިންގާ ފަރާތްތަކާއެކު ދައުލަތުން މަޝްވަރާކުރަން ފަށާ ހިސާބަކީ ދައުލަތް ނެތިދާނެ ވަގުތު ކަމަށެވެ.
ވެރިރަށް ތިރާނާގައި ހުންނަ ފުލުހުންގެ މަރުކަޒަކަށާއި ސަރުކާރުގެ އިމާރާތްތަކަށް މުޒާހަރާގެ ބައިވެރިން ވަނީ ހަމަލާދީފަ އެވެ. މި މުޒާހަރާތަކަކީ ޔުނިވާސިޓީތަކުގެ ހާލަތު ރަނގަޅުކުރުމަށާއި، ކޮރަޕްޝަނާ ދެކޮޅަށް އަދި ބޮޑުވަޒީރު ރާމާގެ އިސްތިއުފާއަށް ގޮވާލައި ކުރަމުންދާ މުޒާހަރާތަކެކެވެ.
ބޮޑުވަޒީރު ރާމާ ތުހުމަތު ކުރެއްވި ގޮތުގައި، މުޒާހަރާގެ ބައިވެރިންގެ ތެރޭގައި ޔޫރަޕާއި އެމެރިކާގެ "ނުބައި ބާރުތަކުން" ހަރުކަށި ފިކުރު ފަތުރާފައިވާ ޒުވާނުން ހިމެނެ އެވެ. އަދި އަލްބޭނިއާއަކީ ރޭވުންތެރިކަމާއެކު ދެމުންދާ ހަމަލާއެއްގެ އަމާޒަކަށް ވެފައިވާ ކަމަށް ވެސް އޭނާ ވިދާޅުވި އެވެ.
ނަމަވެސް އިންސާނީ ހައްގުތަކާ ބެހޭ ވަކީލު ޖެންޓިއަން ސެޖްރާނީ ވިދާޅުވީ، ފުލުހުންގެ އަމަލުތައް ގިނަ ފަހަރަށް ހުންނަނީ ގޯސްކޮށް ކަމަށެވެ. އޭނާ ދަނީ ހައްޔަރުކޮށްފައިވާ 100 އަށް ވުރެ ގިނަ މީހުންނަށް ގާނޫނީ އެހީތެރިކަން ފޯރުކޮށްދެމުންނެވެ.
އޭނާ ބުނި ގޮތުގައި ކޯޓުތަކުގައި ފުލުހުންނަށް ހެކި ހުށަހެޅެނީ ވަރަށް މަދު ފަހަރަކު އެވެ. އޭނާގެ ކްލައިންޓުންގެ ތެރޭގައި، ބަސް ހުއްޓާ ސަރަހައްދަށް ދަނިކޮށް ހައްޔަރުކުރި މީހަކު ވެސް ހިމެނޭ ކަމަށާއި، އެއީ މުޒާހަރާއާ އެއްވެސް ގުޅުމެއް ނެތް މީހެއް ކަމަށް އޭނާ ބުންޏެވެ.
ސެޖްރާނީ އިތުރަށް ބުނީ، ފުލުހުންނާ ދިމާލަށް އެއްޗެހި އުކާ މީހުން އަތުލައިގަނެވެނީ ވަރަށް މަދުން ކަމަށެވެ. އެއީ އެމީހުން ބާރަށް ދުވެ ފިލާތީ ކަމަށް އޭނާ ފާހަގަކުރި އެވެ.
ބޮޑުވަޒީރު ރާމާ ވެރިކަމުގައި ހުންނަވާތާ މިހާރު 13 އަހަރު ވެއްޖެ އެވެ. އަދި މި ގަރުނު ފެށުނީއްސުރެ އޭނާއަކީ އަލްބޭނިއާގެ ސިޔާސީ މަސްރަހުގައި އެންމެ ނުފޫޒުގަދަ އެއް ޝަހުސިއްޔަތެވެ.
އޭނާ ވަނީ 2030 ވަނަ އަހަރާ ހަމައަށް އަލްބޭނިއާއަށް ޔޫރަޕިއަން ޔޫނިއަންގެ މެންބަރުކަން ހޯދައިދޭނެ ކަމަށް ވައުދުވެވަޑައިގެންފަ އެވެ. އަދި އެކަން ކުރެވޭނެ ހަމައެކަނި މީހަކީ އޭނާ ކަމަށް ވެސް އޭނާ ވިދާޅުވެ އެވެ.
