ރައްޔިތުންގެ މަޖިލީހުގެ ޕީއެންސީ މެންބަރުންނަށް ރައީސް މުހައްމަދު މުއިއްޒު ކޮންމެ މަހަކު ބައިލައްކަ ރުފިޔާ ދެއްވާ ކަމަށް ބުނާ މައްސަލަ ބެލިއިރު އެކަމުގައި ކޮރަޕްޝަނުގެ އަމަލެއް އެކުނުލެވޭ ކަމަށް އެންޓި ކޮރަޕްޝަން ކޮމިޝަން (އޭސީސީ) އިން ބުނެފި އެވެ.
މައުލޫމާތު ހޯދައި ލިބިގަތުން (އާރްޓީއައި) ގެ ދަށުން އޭސީސީއަށް އަދަދު އިން ކުރި ސުވާލަކަށް ދިން ޖަވާބުގައި އެ ކޮމިޝަނުން ބުނީ ޕްރިލިމިނަރީ ތަހުގީގު މަރުހަލާއިން ބެލި ބެލުންތަކުން، މައްސަލައިގައި ކޮރަޕްޝަންގެ ކުށެއް އެކުލެވިގެން ނުވާ ކަމަށް ނިންމާފައިވާ ކަމަށެވެ.
"30 ޖުލައި 2026 ގައި ޕްރިލިމިނަރީ ތަހުގީގު މަރުހަލާއިން ބެލިބެލުންތަކުން، ކޮރަޕްޝަންގެ ކުށެއް އެކުލެވިގެންނުވާ މައްސަލައެއް [މެންބަރުންނަށް މުއިއްޒު ބައިލައްކަ ރުފިޔާ ދިން ކަމަށް ބުނާ މައްސަލަ] ކަމަށް ކަނޑައެޅިފައިވާތީ، މައްސަލައިގެ ތަހުގީގު ކުރިއަށް ނުގެންދިޔުމަށް ނިންމާފައި،" އޭސީސީން ބުންޏެވެ.
މެންބަރުންނަށް މުއިއްޒު ބައިލައްކަ ރުފިޔާ ދޭ ކަމަށާއި އެކަމުގެ ސަބަބުން ރައްޔިތުން އެންމެ ބޭނުންވާ ގޮތަށް ގާނޫނު ހެދުމާއި، ސަރުކާރުން ޖަވާބުދާރީ ކުރުވުމަށް ހުރަސް އެޅޭ ކަމަށް ބުނި މައްސަލަ އޭސީސީއަށް ހުށަހެޅި ކާކުކަން ނޭގޭ ގޮތަށެވެ.
އޭސީސީން ބުނީ އުސޫލެއްގެ ގޮތުން ކޮމިޝަނުން ނިންމާފައިވާ މައްސަލަތަކުގެ މައުލޫމާތު ކޮމިޝަނުން ހިއްސާކުރަނީ މައްސަލަ ހުށަހެޅި ފަރާތަށާއި މައްސަލަ ރައްދުވާ ފަރާތަށް ކަމަށެވެ.
ޕީއެންސީގެ މެންބަރުންނަށް މުއިއްޒު 50،000ރ. ދެނީ ނަގުދު ފައިސާއިން ކަމަށް މި ނޫހަށް އެނގިފައިވެ އެވެ. ބައެއް މަސްތަކުގައި މެންބަރުންނަށް 75،000ރ. ވެސް ދީފައިވެ އެވެ.
ޕީއެންސީގެ 75 މެންބަރުން މަޖިލީހުގައި ތިއްބަވާއިރު އެ މެންބަރުންނަށް ބައިލައްކަ ރުފިޔާ ދޭން މަހެއްގެ މައްޗަށް 3.75 މިލިއަން ރުފިޔާ ހޭދަވާނެ އެވެ.
މުއިއްޒު ދެއްވާ ފައިސާއާ ނުލައި ވެސް މަޖިލިސް މެންބަރަކަށް ކޮމެޓީ އެލެވެންސްގެ ގޮތުގައި ލިބޭ 20،000ރ. އާއެކު ކޮންމެ މަހަކު މުސާރައިގެ ގޮތުގައި 82،500ރ. ލިބޭނެ އެވެ.
