ނައިންޓީ ޕްލަސް ގޯލްޑް ކަޕްގެ ދެ ވަނަ ބުރުގެ ގްރޫޕް ސްޓޭޖުގައި ރޭ ކުޅުނު މެޗުން ކ. މާފުށިން 2-0 އިން ބ. އޭދަފުށި ބަލިކޮށްފި އެވެ.
އޭދަފުށްޓަކީ މި ފަހަރުގެ ގޯލްޑް ކަޕްގައި ރޭގެ މެޗާ ހަމައަށް ކުޅުނު ތިން މެޗުން ވެސް މޮޅުވެގެން އައި ޓީމެކެވެ. އެކަމަކު، ރޭ މާފުށްޓާ ދެކޮޅަށް ކުޅެން ޖެހުމުން އޭދަފުށްޓަށް އެންމެ ރަނގަޅު ކުޅުމެއް ނުދެއްކި މުބާާރާތުގެ ފުރަތަމަ ނާކާމިޔާބާ ކުރިމަތިލާން ޖެހުނީ އެެވެ.
ގަލޮޅު ދަނޑުގައި ރޭ ކުޅުނު މެޗުގައި މާފުށިން ވަނީ ފުރަަތަމަ ހާފުގައި ލީޑުނަގައިފަ އެވެ. އެ ގޮތުން، މެޗުގެ 33 ވަނަ މިނިޓްގައި މާފުށީގެ ފުރަތަމަ ލަނޑު ޖެހީ، ފުރަތަމަ ޑިވިޝަނުގައި ސުޕަ ޔުނައިޓެޑް ސްޕޯޓްސް (ސަސް) އަށް ކުޅޭ އިބްރާހިމް އަތީގް ހަސަން (އިއްބެ) އެވެ. އަރިމަތިން ބޯޅަ ހިފައިގެން ދެ ކުޅުންތެރިއަކު ކައިރިން ދެމިގަތުމަށް ފަހު އިއްބެ ތިރިތިރިން ޖެހި ބޯޅަ އަމާޒުވީ ގޯލުގެ ދުރު ކަނަށެެވެ.
ފުރަތަމަ ހާފުގައި މާފުށްޓަށް ދެ ވަަނަ ގޯލެއް ޖަހަން ވެސް ރަނގަޅު ފުރުސަތެއް ލިބުނެވެ. އެ ގޮތުން، އިއްބެ ބޮލުން ޖެހި ބޯޅައެއް އޭދަފުށީ ކީޕަރު، އަލީ އަޖުފާން އަމްޖަދު އަތުގައި ޖެހިފައި ގޯލު ކުރިމަތިން ލިބުނު ރީބައުންސް މުސްރިފު މޫސާ އަށް ލިބުމުން ފޮނުވާލި ބޯޅަ ދިޔައީ ގޯލު ކުރިމަތިން ހުރަސްވެގެންނެވެ.
މެޗުގެ ތިން ޕޮއިންޓް މާފުށްޓަށް ޔަގީންކޮށްދިން ލަނޑު ޖެހީ ބަދަލަކަށް ކުޅެން އެރި އިސްމާއިލް މަފާޒް އިބްރާހިމް އެވެ. ފުރަަތަމަ ޑިވިޝަނުގައި ދަ ގްރާންޑޭ ސްޕޯޓްސް ކްލަބްގެ ނަމުގައި ކުޅުނު ގިނަ ކުޅުންތެރިން ހިމެނޭ މާފުށީ ޓީމަށް މަފާޒް މި ގޯލު ޖަހައިދިނީ، އޭރިއާތެރެއިން ލިބުނު ފުރުސަތެއްގަ އެވެ.
އޭދަފުށިން މެޗު ނިންމާލީ އެއް ކުޅުންތެރިއަކު މަދުކޮށެވެ. އެއީ އެ ޓީމުގެ ކީޕަރު އަޖުފާން އަށް ސީދާ ރަތް ކާޑެއް ދެއްކުމުންނެވެ. އަޖުފާނަށް ރަތް ކާޑު ދެއްކީ މާފުށީގެ އަހުމަދު އަބްދުލްސައްތާރަށް ނުރައްކާތެރި ފައުލެއް ކުރުމުންނެވެ.
އަހުމަދު ޝަރީފް (ޑުންގާ)ގެ ކޯޗުކަމުގައި ކުޅޭ މާފުށިން މި ވަނީ މިފަހަރުގެ މުބާރާތުގައި ވަރުގަދަކޮށް ފެނުނު ދެ ޓީމެއް ބަލިކޮށްފަ އެވެ. އެއީ އަލިފުށްޓާއި އޭދަފުށްޓެވެ.
ގޯލްޑް ކަޕްގެ ދެ ވަނަ ބުރަކީ، 12 ޓީމުގެ މެދުގައި ކުޅޭ ގްރޫޕް ސްޓޭޖު ބުރެކެވެ. ހަތަރު ގްރޫޕަށް ބެހިފައިވާއިރު، ކޮންމެ ގްރޫޕެއްގައި ހިމެނެނީ ތިން ޓީމެވެ. މާފުށްޓާއި އޭދަފުށީގެ އިތުރުން ދެން މި ގްރޫޕްގައި ހިމެނެނީ، ހއ. ދިއްދޫ އެވެ.
