ސައިބާ ކްރައިމް އާއި ކަމާގުޅޭ އެ ނޫން ވެސް ކުށްތަކާއި އިލެކްޓްރޯނިކް ހެކި އެކުލެވިގެންވާ ކުށްތައް ހުއްޓުވުމަށް ފިޔަވަޅު އެޅުމަށް ޓަކައި ޒާތީ މައުލޫމާތު އިންޓަސެޕްޓްކޮށް މީހުންނަށް ފާރަލެވޭ ގޮތަށް ގާނޫނުތަކެއް ބަދަލުކުރުމަށް ރައްޔިތުންގެ މަޖިލީހަށް ސަރުކާރުން ހުށަހެޅި ބިލުތައް މިއަދު ފާސްކޮށްފި އެވެ.
މިއަދު ދެ ބިލެއް މަޖިލީހުން ވަނީ ފާސްކޮށްފަ އެވެ. އެއީ ޖިނާއީ އިޖުރާއަތުގެ ގާނޫނަށް އިސްލާހު ގެނައުމުގެ ބިލާއި, ގާނޫނުލްއުގޫބާތަށް އިސްލާހު ގެނައުމުގެ ބިލާއި ޖިނާއި މައްސަލަތަކުގައި ގާނޫނީ އެހީތެރިކަން ބަދަލުކުރުމުގެ ގާނޫނަށް އިސްލާހު ގެނައުމުގެ ބިލެވެ.
މި ގާނޫނުތައް ބަދަލުކުރުމާ އެކު ސައިބާ ކްރައިމަކީ ކުށެއްގެ ގޮތުގައި ކަނޑައަޅައި އެ ކުށުގެ ބާވަތްތައް ބަޔާންކޮށް އެފަދަ ކުށްތައް ހުއްޓުވުމަށް ގިނަ ކަންކަން ކުރުމުގެ ބާރު ތަހުގީގީ އިދާރާތަކަށް ލިބިގެންދާނެ އެވެ. މައިގަނޑުގެ ގޮތެއްގައި ކުށް ހުއްޓުވުމަށް މީހުންގެ ޒާތީ މައުލޫމާތަށް އެކްސެސްވެވޭނެ މަގުފަހިވެގެންދާނެ އެވެ. މި ބިލުތަކާ ގުޅޭގޮތުން ބައެއް ފަރާތްތަކުން ވަނީ ކަންބޮޑުވުން ފާޅުކޮށްފަ އެވެ.
ޖިނާއީ އިޖުރާއަތުގެ ގާނޫނު ބަދަލުކުރުމަށް ދެ ބިލެއް މަޖިލީހަށް ހުށަހެޅުމުން އެ ދެ ބިލަށް ވޯޓަށް އެހީ އެއްކޮށެވެ. އެ ހުށަހެޅުން ފާސްކުރީ 58 މެންބަރުންގެ ވޯޓާއެކު އެވެ. ޖުޑީޝަރީ ކޮމިޓީން ދިރާސާކުރި މި ދެ ބިލަށް ވެސް މާ ބޮޑު އިސްލާހުތަކެއް ކޮމިޓީ މަރުހަލާގައި ގެނެސްފައި ނުވެ އެވެ.
މަނަދޫ ދާއިރާގެ މެންބަރު ހުސްނީ މުބާރިކު ހުށަހެޅުއްވި ބިލަކީ ސައިބް ސްޕޭސްގައި ކުރާ ކުށްތައް ހުއްޓުވުމަށް އިޖުރާއަތްތަކެއް ކަނޑައަޅައި ތަންފީޒީ އިދާރާތަކަށް ގިނަ ބާރުތަކެއް ދީފައިވާ ބިލެކެވެ.
ބިލުގައި އިތުރުކުރި އިޖުރާއަތްތައް
- ޒާތީ މައުލޫމާތު އިންޓަސެޕްޓް ކުރުމުގައި މިހާރު އަމަލުކުރާ އުސޫލުތައް
- މުއާސަލާތީ ހިދުމަތް ދޭ ފަރާތްތަކުން ކަސްޓަމަރުންގެ މައުލޫމާތު އަދި މުއާސަލާތީ ޑޭޓާ ރިޓެއިން ކުރުމާ ގުޅޭ އިޖުރާއަތް
- ރައްކާ ކޮށްފައިވާ ކޮމްޕިއުޓާ ޑޭޓާ ޕްރިޒާވުކޮށް ޓްރެފިކް ޑޭޓާ ވަކި މިންވަރަކަށް ހާމަކުރުމަށް އެންގުމޭ ގުޅޭ އިޖުރާއަތް
- ކޮމްޕިއުޓާ ޑޭޓާ އާއި ސަބްސްކްރައިބަރުންގެ މައުލޫމާތު ހޯދުމާށް ޕްރޮޑަކްޝަން އަމުރު ހޯދުމާއި އެ އަމުރު ތަންފީޒު ކުރުމުގެ އިޖުރާއަތް
- ރައްކާ ކޮށްފައިވާ ކޮމްޕިއުޓަރު ޑޭޓާ ބަލައި ފާސްކުރުމާއި އެ ޑޭޓާ ހިފެހެއްޓުމާ ގުޅޭ އިޖުރާއަތް
- އިންޓަނެޓް ޓްރެފިކް ޑޭޓާ ވަގުތުން ވަގުތަށް ނުވަތަ ރިއަލް-ޓައިމްގައި ނެގުމަށް ކޯޓު އަމުރު ހޯދުމާއި އެ އަމުރު ތަންފީޒު ކުރުމުގެ އިޖުރާއަތްތައް.
ދެވަނަ ބިލަކީ ގަލޮޅު އުތުރު ދާއިރާގެ މެންބަރު މުހައްމަދު އިބްރާހިމް ހުށަހެޅުއްވީ ސްކޭމް މައްސަލަތަކުގައި ހިމެނޭ މީހުންގެ އެކައުންޓުތައް ހިފެހެއްޓުމަށް ކޯޓު އަމުރު ނެރެ އެ އަމުރު ތަންފީޒު ކުރުމާ ގުޅޭ އިޖުރާއަތްތައް އިތުރުކުރަން ހިމަނާފައި އޮތް ބިލެކެވެ.
ގާނޫނުލްއުގޫބާތު ބަދަލުކުރުމުގެ ބިލު ފާސްކުރީ 58 މެންބަރުންގެ ވޯޓާއެކު އެވެ. އެ ބިލުގައި މައިގަނޑު ގޮތެއްގައި ކަނޑައަޅާފައިވަނީ ސައިބާ ކްރައިމްއާ ގުޅުންހުރި އަމަލުތަކަކީ ކުށްތަކެއް ކަމަށެވެ.
